दिग्दर्शक झॅक क्रेगरने केले रेसिडेंट इव्हीलमध्ये महत्त्वाचे बदल, म्हणाला, ‘आता हा चित्रपट मलाही अधिक आवडतोय’

Director Zach Cregger made significant changes to Resident Evil : बहुप्रतीक्षित ‘Resident Evil’ चित्रपट 18 सप्टेंबर 2026 रोजी इंग्रजीसह हिंदी, तमिळ आणि तेलुगू भाषांमध्ये प्रदर्शित होणार आहे. झॅक क्रेगर दिग्दर्शित या चित्रपटात ऑस्टिन अब्राम्स मुख्य भूमिकेत दिसणार आहे. जगभरातील प्रेक्षकांना गेली अनेक वर्षे थरार आणि भीतीचा अनुभव देणारी ‘Resident Evil’ फ्रँचायझी आता नव्या रूपात मोठ्या पडद्यावर परतण्यासाठी सज्ज झाली आहे. सर्व्हायव्हल हॉरर प्रकाराला नव्याने सादर करणारा हा चित्रपट यंदाच्या बहुप्रतीक्षित चित्रपटांपैकी एक मानला जात आहे. विशेष म्हणजे ‘Barbarian’ आणि ‘Weapons’ यांसारख्या चित्रपटांसाठी ओळखला जाणारा दिग्दर्शक झॅक क्रेगर या नव्या ‘Resident Evil’ची धुरा सांभाळत आहे.

टेस्ट स्क्रीनिंगनंतर चित्रपटात झाले महत्त्वाचे बदल

झॅक क्रेगरच्या याआधीच्या ‘Barbarian’ आणि ‘Weapons’ या चित्रपटांमध्ये भयपटासोबत विनोदाचाही प्रभावी वापर पाहायला मिळाला होता. मात्र, ‘Resident Evil’च्या सुरुवातीच्या टेस्ट स्क्रीनिंगदरम्यान प्रेक्षकांकडून काही वेगळ्या प्रतिक्रिया समोर आल्या. प्रेक्षकांना चित्रपट आवडला, पण चित्रपटात विनोदाचे प्रमाण अपेक्षेपेक्षा जास्त असल्याचे त्यांना जाणवले. याच प्रतिक्रियांचा विचार करत क्रेगरने चित्रपटातील अनेक विनोदी प्रसंग आणि जोक्स कमी करण्याचा निर्णय घेतला.

आता सरकारी फाईल दाबून ठेवता येणार नाही! 7 दिवसांची मुदत, दिरंगाई केल्यास अधिकाऱ्यांवर कारवाई

याबाबत त्याने सांगितले की, टेस्ट स्क्रीनिंगमध्ये लोकांना चित्रपट खूप आवडत असल्याचे लक्षात आले; मात्र त्यांना तो जरा जास्तच विनोदी वाटत होता. त्यामुळे पुढील टेस्टिंग प्रक्रियेदरम्यान शक्य तितके विनोदी प्रसंग काढून टाकण्यात आले. त्यानंतर प्रेक्षकांचा चित्रपटाला मिळणारा प्रतिसाद आणखी सकारात्मक झाला आणि स्वतः क्रेगरलाही चित्रपटाची नवी आवृत्ती अधिक आवडली. त्याच्या मते, हॉरर चित्रपटामध्ये थोडासा विनोद प्रभावी ठरू शकतो; मात्र त्याचा अतिरेक होऊ नये. चित्रपटातून काढून टाकलेल्या एकाही विनोदी प्रसंगाची आता उणीव जाणवत नसल्याचेही त्याने स्पष्ट केले.

काय आहे नव्या ‘Resident Evil’ची कथा?

‘Weapons’ आणि ‘Barbarian’मधून आपली वेगळी ओळख निर्माण करणाऱ्या झॅक क्रेगरच्या दिग्दर्शनाखाली ‘Resident Evil’ फ्रँचायझीची ही एक नवी आणि भयावह मांडणी असणार आहे. चित्रपटाची कथा पूर्णपणे नव्या पात्रांभोवती फिरते. यामध्ये ब्रायन नावाच्या मेडिकल कुरिअरची भूमिका ऑस्टिन अब्राम्स साकारत आहे. एका दुर्दैवी आणि भयावह रात्री ब्रायन अनपेक्षितपणे अशा परिस्थितीत अडकतो, जिथे त्याच्याभोवती सर्व काही वेगाने कोसळू लागते. वाढता गोंधळ, जीवघेणे धोके आणि प्रत्येक क्षणी समोर येणारी नवी संकटे यामुळे त्याच्यासाठी ती रात्र अक्षरशः जगण्यासाठीची शर्यत बनते. अॅक्शन आणि हॉररने भरलेल्या या प्रवासात ब्रायनला स्वतःचा जीव वाचवण्यासाठी सतत संघर्ष करावा लागणार आहे.

मुंबईला निघालेल्या मनोज जरांगेंची प्रकृती खालावली; उपचार घेण्यास नकार, पाटोद्यात मुक्काम कायम

18 सप्टेंबरला मोठ्या पडद्यावर

Columbia Pictures आणि Constantin Film निर्मित, तसेच TriStar Pictures च्या सहयोगाने तयार झालेला ‘Resident Evil’ १८ सप्टेंबर २०२६ रोजी चित्रपटगृहांमध्ये प्रदर्शित होणार आहे. भारतात चित्रपटाचे वितरण Sony Pictures Entertainment India करणार असून, भारतीय प्रेक्षकांसाठी हा चित्रपट इंग्रजी, हिंदी, तमिळ आणि तेलुगू या चार भाषांमध्ये प्रदर्शित केला जाणार आहे.