Disney’s ‘Moana’ gets a new heroine : हॉलिवूडचा सुपरस्टार ड्वेन जॉन्सन अर्थात ‘द रॉक’ हा डिस्नेच्या लाइव्ह-अॅक्शन मोआनामध्ये पुन्हा एकदा माऊईची लोकप्रिय भूमिका साकारत असला, तरी या चित्रपटातील सर्वात मोठा शोध ठरली आहे 19 वर्षीय कॅथरीन लागाआया. मोआनाच्या मुख्य भूमिकेसाठी तब्बल 32 हजारांहून अधिक इच्छुकांमधून तिची निवड करण्यात आली. सिडनीमध्ये राहणारी आणि सामोअन वंशाची असलेली कॅथरीनचा या पात्राशी अनेक वर्षांपासून भावनिक संबंध आहे. 2016 मध्ये डिस्नेचा मूळ अॅनिमेटेड मोआना प्रदर्शित झाला तेव्हा ती अवघी नऊ वर्षांची होती. त्या पात्रामध्ये स्वतःचे प्रतिबिंब पाहिल्याने तिच्यावर खोलवर प्रभाव पडल्याचे तिने अनेकदा सांगितले आहे.
दिग्दर्शक थॉमस कैल यांनी तिची पहिली ऑडिशन टेप पाहिली तेव्हा ती केवळ 16 वर्षांची होती. याबद्दल ते म्हणाले, “तिच्यात एक खास गोष्ट आहे. ती गोष्ट शिकवता येत नाही, फक्त अधिक विकसित करता येते. तिची पहिली ऑडिशन टेप पाहताच मला ते जाणवले होते.” व्हिडीओ परिषदेदरम्यान कैल म्हणाले, “कॅथरीन लागाआया ऑडिशनसाठी खोलीत प्रवेश करताच मला वाटले की आम्हाला आमची मोआना सापडली आहे.” ऑडिशनमध्ये तिने लोकप्रिय ‘हाऊ फार आय विल गो’ हे गाणे सादर केले आणि दोन दृश्यांमध्ये अभिनयही केला. त्या क्षणाची आठवण सांगताना कैल म्हणाले, “तिने अतिशय सुंदर गायन केले, पण त्याहून महत्त्वाचे म्हणजे त्या गाण्यामागील भावना तिला खऱ्या अर्थाने समजल्या होत्या. तिचे गाणे ऐकल्यानंतर मी खुर्चीतून उठलो आणि म्हटलो, ‘मला वाटते, आपल्याला आपली मोआना मिळाली आहे.’
उपमुख्यमंत्री एकनाथ शिंदे यांची प्रकृती बिघडली; ठाण्यातील खासगी रुग्णालयात उपचार सुरू, सर्व कार्यक्रम रद्द
पीपलला दिलेल्या विशेष मुलाखतीत कैल यांनी सांगितले की, कॅथरीनला प्रत्यक्ष भेटल्यानंतर अवघ्या “दहा सेकंदांत” त्यांनी तिला नवीन मोआना म्हणून निश्चित केले. प्रेक्षकांच्या मनात घर केलेल्या आणि ऑस्कर नामांकन मिळालेल्या अॅनिमेटेड साहसी चित्रपटाच्या या नव्या लाइव्ह-अॅक्शन आवृत्तीचे दिग्दर्शन एमी आणि टोनी पुरस्कार विजेते थॉमस कैल (हॅमिल्टन) यांनी केले आहे. या चित्रपटाची निर्मिती ड्वेन जॉन्सन, डॅनी गार्सिया, बो फ्लिन, हिराम गार्सिया आणि लिन-मॅन्युएल मिरांडा यांनी केली असून, थॉमस कैल, स्कॉट शेल्डन, चार्ल्स न्युवर्थ तसेच अॅनिमेटेड *मोआना* आणि मोआना 2 मध्ये मोआनाला आवाज देणारी ऑली क्रावाल्हो यांनी कार्यकारी निर्माते म्हणून काम पाहिले आहे.
लिन-मॅन्युएल मिरांडा, ओपेटाया फोआई आणि मार्क मॅन्सिना यांनी रचलेल्या मूळ गीतांसह आणि मार्क मॅन्सिना यांच्या संगीतबद्ध पार्श्वसंगीतासह मोआनाची ही कथा नव्या पिढीसाठी अधिक भव्य स्वरूपात साकारण्यात आली आहे.
चित्रपटाचा ट्रेलर येथे पाहता येईल:
भारतभरातील प्रेक्षकांना *मोआना*चे नेत्रदीपक दृश्यवैभव, अविस्मरणीय गीते आणि रोमांचक साहसाचा अनुभव 10 जुलै 2026 पासून केवळ चित्रपटगृहांत इंग्रजी आणि हिंदी भाषेत घेता येणार आहे.