Narnia The Magician’s Nephew Trailer: ग्रेटा गर्विग दिग्दर्शित ‘नार्निया: द मॅजिशियन्स नेफ्यू’ हा चित्रपट सी. एस. लुईस यांच्या प्रसिद्ध फॅन्टसी विश्वाची सफर मोठ्या पडद्यावर घडवून आणणार आहे. हा चित्रपट 12 फेब्रुवारी 2027 रोजी चित्रपटगृहांमध्ये प्रदर्शित होणार आहे.
बहुप्रतीक्षित ‘नार्निया: द मॅजिशियन्स नेफ्यू’ या चित्रपटाचा ट्रेलर प्रदर्शित झाला आहे. या ट्रेलरमधून प्रेक्षकांना ग्रेटा गर्विग यांनी साकारलेल्या नार्नियाच्या जादुई विश्वाची झलक पाहायला मिळते. सी. एस. लुईस यांच्या 1955 मध्ये प्रकाशित झालेल्या कादंबरीवर हा चित्रपट आधारित आहे. रहस्य, जादू, साहस आणि लक्षात राहतील अशा व्यक्तिरेखांनी भरलेली ही कथा प्रेक्षकांना एका वेगळ्याच दुनियेत घेऊन जाणार आहे. विशेष म्हणजे, या चित्रपटातून नार्नियाच्या जादुई विश्वाची सुरुवात कशी झाली, हेही उलगडणार आहे. नेटफ्लिक्सने या चित्रपटाची निर्मिती केली असून सोनी पिक्चर्स रिलीजिंग इंटरनॅशनल त्याचे वितरण करणार आहे.
आई अंबाबाईच्या भक्तीत रंगवणारं ‘अंबाबाई छंद तुझा लागला’ गाणे प्रेक्षकांच्या भेटीला!
ट्रेलरमध्ये प्रेक्षकांना नार्नियाच्या जादुई जगाची झलक पाहायला मिळते. डेव्हिड मॅकेना हा डिगरी किर्क, तर बीट्रिस कॅम्पबेल ही पॉली प्लमरच्या भूमिकेत दिसणार आहे. या दोघांचा प्रवास त्यांना नार्नियाच्या अद्भुत विश्वात घेऊन जातो. एम्मा मॅकी तरुण जॅडिस अर्थात व्हाइट विचची भूमिका साकारत आहे, तर डॅनियल क्रेग अंकल अँड्र्यूच्या भूमिकेत दिसणार आहे. याशिवाय कॅरी मुलिगन, कोबना होल्डब्रुक-स्मिथ आणि मेरिल स्ट्रीप यांच्याही महत्त्वाच्या भूमिका आहेत. त्यामुळे या चित्रपटात नव्या कलाकारांसोबतच अनुभवी कलाकारांची फळीही पाहायला मिळणार आहे.
‘बार्बी’सारख्या जागतिक स्तरावर गाजलेल्या चित्रपटाचे दिग्दर्शन करणाऱ्या ग्रेटा गर्विग यांनी आता सी. एस. लुईस यांच्या लोकप्रिय फॅन्टसी विश्वाला आपल्या खास शैलीत मोठ्या पडद्यावर आणले आहे. सोनी पिक्चर्स आणि नेटफ्लिक्स यांनी चित्रपटाची पहिली झलक प्रसिद्ध केल्यानंतर आता ट्रेलरही प्रेक्षकांच्या भेटीला आला आहे. पहिल्या झलकमध्ये डिगरी, पॉली आणि जॅडिस यांच्यासह चित्रपटातील जादुई वातावरणाची ओळख करून देण्यात आली होती. आता ट्रेलरमधून चित्रपटातील व्यक्तिरेखा आणि ग्रेटा गर्विग यांनी उभे केलेले हे अनोखे विश्व अधिक जवळून पाहण्याची संधी प्रेक्षकांना मिळणार आहे.
STAGE OTT : ‘प्रेमायण’ मधून उलगडणार एक सत्य प्रेमकथा; भिमराव मुडेंची नवी कलाकृती ‘स्टेज ओटीटीवर’
प्रकाशनाच्या क्रमवारीनुसार, ‘द मॅजिशियन्स नेफ्यू’ ही सी. एस. लुईस यांच्या ‘द क्रॉनिकल्स ऑफ नार्निया’ या पुस्तक मालिकेतील सहावी कादंबरी आहे. मात्र, या कथेतील घटना ‘द लायन, द विच अँड द वॉर्डरोब’ या कादंबरीतील घटनांपूर्वी घडतात. नार्नियाच्या निर्मितीची कथा या पुस्तकात मांडण्यात आली आहे. या जादुई विश्वाची सुरुवात कशी झाली आणि त्यामागे कोणत्या घटना घडल्या, याची माहिती या कथेतून मिळते.
नेटफ्लिक्सची निर्मिती आणि सोनी पिक्चर्स रिलीजिंग इंटरनॅशनलचे वितरण असलेला ‘नार्निया: द मॅजिशियन्स नेफ्यू’ हा चित्रपट भारतात 12 फेब्रुवारी 2027 रोजी चित्रपटगृहांमध्ये प्रदर्शित होणार आहे.