नोबेल शांतता पुरस्कार विजेते कैलाश सत्यार्थी (Satyarthi) यांना प्रतिष्ठित ‘लता दीनानाथ मंगेशकर पुरस्कार २०२६’ प्रदान करण्यात येणार असल्याची घोषणा पद्मश्री पं. हृदयनाथ मंगेशकर यांनी केली. हा पुरस्कार मास्टर दीनानाथ मंगेशकर यांच्या ८४व्या स्मृतिदिनानिमित्त प्रदान केला जाणार आहे.
मास्टर दीनानाथ मंगेशकर स्मृती प्रतिष्ठान आणि हृदयेश आर्ट्स यांच्या वतीने, सकाळ मीडिया समूहाच्या सहकार्याने आयोजित हा सोहळा देशातील एक अत्यंत मानाचा सांस्कृतिक उपक्रम मानला जातो. कला, साहित्य आणि समाजकार्यात उल्लेखनीय योगदान देणाऱ्या व्यक्तींचा गौरव करण्याची ही परंपरा आहे. भावगंधर्व’ स्वरूपातील या कार्यक्रमातून मंगेशकर कुटुंबाचा समृद्ध वारसा अधोरेखित होतो. लता मंगेशकर, आशा भोसले यांच्यापासून ते आजच्या पिढीतील कलाकारांपर्यंत भारतीय संगीताचा हा तेजस्वी प्रवास या सोहळ्यातून साकार होतो.
यंदाच्या पुरस्कार विजेत्यांमध्ये संगीतासाठी महेश काळे, नृत्यासाठी शमा भाटे, नाटक व चित्रपटासाठी सुबोध भावे, चित्रपटासाठी रवीना टंडन आणि प्राजक्ता माळी, पत्रकारितेसाठी सुशील कुलकर्णी, साहित्यासाठी अच्युत गोडबोले, विशेष पुरस्कारासाठी डॉ. धनंजय केळकर, समाजकार्यासाठी ठाणे येथील वसुंधरा संजीवनी मंडळाचे आनंद भागवत यांचा समावेश आहे. तसेच ‘मोहन वाघ पुरस्कार – उत्कृष्ट नाट्य निर्मिती’ हा सन्मान जिगीषा अष्टविनायक निर्मित ‘भूमिका’ या नाटकासाठी दिली जाणार असून, या नाटकात सचिन खेडेकर यांनी प्रमुख भूमिका साकारली आहे. निर्माते दिलीप जाधव आणि श्रीपाद पद्माकर यांनाही गौरविण्यात येणार आहे.
जूनिअर कॉलेज अन् क्लासेसच्या टाय-अप, इंटिग्रेटेड पद्धतीवर प्रा. दुर्गेश मंगेशकरांनी सूचवला पर्याय
या सोहळ्याचे प्रमुख आकर्षण म्हणजे ‘लता दीनानाथ मंगेशकर पुरस्कार’ (५वे वर्ष) कैलाश सत्यार्थी यांना प्रदान करण्यात येणार आहे. बालहक्क आणि सामाजिक न्यायासाठी त्यांनी केलेल्या जागतिक पातळीवरील कार्याचा गौरव म्हणून हा सन्मान दिला जात आहे. लता दीनानाथ मंगेशकर पुरस्कार’ हा राष्ट्रीय सन्मानाचे प्रतीक मानला जातो आणि समाजावर दीर्घकालीन प्रभाव टाकणाऱ्या व्यक्तींचा गौरव करतो.
पुण्यातील एमआयटी वर्ल्ड पीस युनिव्हर्सिटीचे संस्थापक-अध्यक्ष डॉ. विश्वनाथ कराड हे प्रमुख पाहुणे म्हणून उपस्थित राहणार आहेत. विज्ञान, अध्यात्म आणि मूल्याधिष्ठित शिक्षण यांचा संगम घडवण्याच्या त्यांच्या दृष्टिकोनासाठी ते ओळखले जातात. कार्यक्रमात “मी लता दीनानाथ…” हा विशेष संगीत कार्यक्रम सादर होणार असून, पं. हृदयनाथ मंगेशकर यांच्या संकल्पनेतून लता मंगेशकर यांच्या अमर गीतांना आदरांजली वाहिली जाणार आहे.
या कार्यक्रमात विभावरी जोशी, मधुरा दातार, सावनी रवींद्र, श्रेयसी पावगी, मनीषा निश्चल, ऋतुजा तारे आणि डॉ. उन्मेष करमरकर हे कलाकार सादरीकरण करणार आहेत. कार्यक्रमाचे सूत्रसंचालन मिलिंद कुलकर्णी करणार असून, सुप्रिया चित्राव उद्घोषिका म्हणून कार्यभार सांभाळतील. हा सोहळा शुक्रवार, २४ एप्रिल २०२६ रोजी सायंकाळी ५.०० ते रात्री १०.०० या वेळेत, गणेश कला क्रीडा मंदिर, स्वारगेट, पुणे येथे संपन्न होणार आहे.