Premala Conditions Apply Review: प्रेम आणि करिअर या दोन गोष्टी एकमेकांना पूरक असाव्यात, अशी सर्वसाधारण अपेक्षा असते. मात्र वास्तवात अनेकदा याच दोन गोष्टी एकमेकांसमोर उभ्या ठाकतात. विशेषतः कॉर्पोरेट जगतातील नियम, व्यावसायिक स्पर्धा आणि वैयक्तिक आयुष्य यांच्यातील समतोल साधताना अनेक तरुणांना संघर्ष करावा लागतो. या बदलत्या वास्तवाला केंद्रस्थानी ठेवत झी 5 मराठीवरील (ZEE5) ‘प्रेमाला Conditions Apply’ ही वेबसीरिज आधुनिक प्रेमाची एक वेगळी बाजू उलगडण्याचा प्रयत्न करते.
ही मालिका पारंपरिक प्रेमकथा सांगत नाही. उलट, आजच्या Gen-Z पिढीच्या बदलत्या नातेसंबंधांचा, करिअरकेंद्रित जीवनशैलीचा आणि कॉर्पोरेट संस्कृतीचा अभ्यास करण्याचा प्रयत्न करते. प्रेम, महत्त्वाकांक्षा, स्वप्ने आणि व्यावसायिक जबाबदाऱ्या यांचा मेळ घालताना निर्माण होणारे प्रश्न हीच मालिकेची मध्यवर्ती संकल्पना आहे.
मालिकेतील सर्वात लक्षवेधी कल्पना म्हणजे कंपनीची ‘No Dating Policy’कार्यालयात काम करणाऱ्या कर्मचाऱ्यांनी एकमेकांशी प्रेमसंबंध ठेवू नयेत, या नियमामुळे कथेला एक वेगळाच ट्विस्ट मिळतो. एका साध्या प्रेमकथेला कॉर्पोरेट नियमांची चौकट मिळाल्यामुळे कथानक अधिक उत्सुकता निर्माण करते. प्रेमासाठी करिअरचा त्याग करायचा की करिअरसाठी प्रेमावर मर्यादा घालायाच्या, हा प्रश्न मालिकेतील प्रमुख पात्रांसमोर उभा राहतो आणि याच संघर्षातून कथा पुढे सरकते.
सिद्धार्थ मेनन आणि जान्हवी उदय यांनी आपल्या भूमिका अत्यंत सहजतेने साकारल्या आहेत. दोघांमधील ऑन-स्क्रीन केमिस्ट्री ही मालिकेचा सर्वात मोठा प्लस पॉइंट ठरते. त्यांच्या नात्यातील संकोच, आकर्षण, भावनिक गुंतवणूक आणि संघर्ष हे सर्व प्रसंग अतिशय नैसर्गिक वाटतात. त्यामुळे प्रेक्षक सहजपणे त्यांच्या प्रवासाशी जोडले जातात. सहाय्यक कलाकारांनीही आपल्या भूमिका परिणामकारकरित्या साकारत कथेला आवश्यक आधार दिला आहे.
दिग्दर्शनाच्या दृष्टीने पाहिल्यास मालिका आजच्या शहरी तरुणाईच्या जीवनशैलीशी प्रामाणिक राहण्याचा प्रयत्न करते. ऑफिसचे वातावरण, आधुनिक कार्यसंस्कृती, कॅफे, मीटिंग्स, डिजिटल संवाद आणि शहरातील वेगवान जीवनशैली यांचे चित्रण वास्तववादी वाटते. छायांकन, रंगसंगती आणि दृश्यरचना मालिकेला एक स्टायलिश आणि समकालीन लूक देतात. त्यामुळे प्रत्येक फ्रेम आकर्षक वाटते आणि मालिकेचा प्रॉडक्शन व्हॅल्यूही उठून दिसतो.
मात्र, चांगली संकल्पना असूनही पटकथा काही ठिकाणी कमी पडते. सुरुवातीला निर्माण झालेली उत्सुकता पुढे जाताना काही प्रमाणात कमी होते. कथानकाची पुनरावृत्ती जाणवू लागते आणि अनेक प्रसंगांचा शेवट आधीच ओळखता येतो. त्यामुळे मालिकेतील नाट्य अपेक्षेइतके प्रभावी राहत नाही. काही भागांमध्ये कथा मुख्य विषयापासून भरकटल्यासारखी वाटते आणि त्यामुळे तिची पकड सैल झाल्याची जाणीव होते.
Gen-Z पिढीचे बदलते नातेसंबंध, डेटिंग अॅप्सचा प्रभाव, सोशल मीडियामुळे बदललेली प्रेमाची व्याख्या, करिअरला दिले जाणारे प्राधान्य आणि भावनिक अस्थिरता या अनेक महत्त्वाच्या विषयांना स्पर्श करण्याची संधी या मालिकेकडे होती. मात्र त्यांचा सखोल वेध घेण्याऐवजी कथा सुरक्षित चौकटीतच राहते. त्यामुळे मालिकेचा आशय अधिक प्रभावी होण्याची संधी काही प्रमाणात दवडली गेली आहे.
संवादलेखनही काही ठिकाणी प्रभावी असले तरी अनेक संवादांची पुनरावृत्ती जाणवते. काही प्रसंग अनावश्यकपणे लांबवले गेले असल्याने मालिकेचा वेग कमी होतो. जर पटकथा अधिक घट्ट आणि संपादन अधिक धारदार असते, तर ही मालिका आणखी प्रभावी ठरू शकली असती.
तरीही, ‘प्रेमाला Conditions Apply’ ही केवळ प्रेमकथा नाही; ती आजच्या तरुणांच्या आयुष्यातील महत्त्वाच्या द्वंद्वाची गोष्ट आहे. प्रेम आणि करिअर यांच्यातील संघर्ष वास्तववादी पद्धतीने मांडण्याचा तिचा प्रयत्न कौतुकास्पद आहे. दमदार प्रमुख कलाकार, आकर्षक सादरीकरण आणि आधुनिक विषयामुळे ही मालिका शेवटपर्यंत खिळवून ठेवते. पटकथेतील काही उणिवा आणि संथ गतीकडे दुर्लक्ष केल्यास आधुनिक मराठी वेबसीरिजच्या यादीत ही एक पाहण्या जोगी मालिका ठरते.
लिटिल थिंग्स या गाजलेल्या सिरीजचा सहलेखक आणि आरपार या सिनेमाचा दिग्दर्शक असलेल्या गौरव पत्की याने मॉडर्न लव्हस्टोरी मांडताना त्याचे दिग्दर्शकीय कंगोरे उत्तम पद्धतीने हाताळले आहेत.
आपल्याकडे त्याच त्याच चेहऱ्यांची नवीन लव स्टोरी असं म्हणून ओल्ड वाईन इन न्यू बॉटल असा फॉर्म्युला आपल्यासमोर मांडला जातो. झी 5 मराठीचे खरंतर कौतुक करायला पाहिजे. सिद्धार्थ मेनन याने साकारलेला ऋषी हा आत्ताचा आहे. तो अत्यंत सहज, स्वाभाविक आणि विचारपूर्वक केलेला जाणवतो. तो अत्यंत गुणी अभिनेता आहे… हे त्याच्या सादरीकरणात जाणवतं त्याची आणि जानवी उदयची केमिस्ट्री तितकीच खरीखुरी जिवंत रसरसलेली वाटते. जानवी उदय हा फ्रेश चेहरा आहे. तिच्या वावरण्यातला असणारा स्फुर्तपणा हा एक सीरीजला नवा तजेला देतो. गणेश यादव, चिन्मय सुमित, देविका दप्तरदार हे अनुभवी कलावंत यांचा स्वतःचा रंग घेऊन येतात आणि सिरीजला एका वेगळ्या उंचीवर घेऊन जातात त्यांच्या वागण्यातील बोलण्यातला असणारा सहजपणा सिरीजमध्ये जान आणतो.
विजय सोनीसारखा अनुभवी आणि जाणकार सिनेमॅटोग्राफर असल्यामुळे रंगसंगती आणि छाया प्रकाशाचा खेळ हा अधिक बहारदार झाला आहे. जयंत जठार च्या संकलनाने सिरीजमध्ये नेमकेपणा आणला आहे. टेलिव्हिजन आणि फिल्म निर्मितीतील अनुभवी निर्माता म्हणून सुनील भोसले यांनी या सिरीजमध्ये आपली भूमिका चूक बजावलेली दिसते. शिरसा असणारा लुक अँड फील आणि त्यातील टोन सेट करण्याची भूमिका चोख बजावली आहे. झी 5 मराठीने हा प्रयोग केला आहे. ५० भागांची लाँग फॉरमॅट सिरीज, दर बुधवारी ५ नवीन भाग प्रदर्शित होतील. त्यामुळे आता जे भाग प्रदर्शित झाले आहेत… त्यानुसार केलेली की लिटमस टेस्ट आहे.
अमित भंडारी, समीक्षक
————–
प्रेमाला कंडीशन्स अप्लाय
दिग्दर्शक गौरव पत्की
लेखिका कल्याणी पंडित
छायाचित्रण विजय सोनी
संकलक जयंत जठार
कलाकार
सिद्धार्थ मेनन, जान्हवी उदय, चिन्मय सुमित, गणेश यादव, देविका दफरदार
का पाहावी ?- दमदार परफॉर्मन्स, उत्तम केमिस्ट्री आणि समकालीन विषय हाताळला आहे.
का टाळावी ? कथानकात पुनरावृत्ती, नाविन्यपूर्णतेचा अभाव, जेन झीच्या प्रश्न आणि त्यांच्या जगाचा उंबरठा ओलांडण्यात अपयश
थोडक्यात का? आधुनिक लव्हस्टोरीच्या चौकटीत करिअर आणि कॉर्पोरेट संस्कृतीचा वेगळा पैलू दाखवणारी मनोरंजक मालिका आहे.
रेटिंग : ⭐⭐⭐☆☆ (3/5)