Priyadarshan was impressed : बॉलिवूड अभिनेता सैफ अली खान लवकरच ‘Haiwaan’ या चित्रपटातून प्रेक्षकांच्या भेटीला येणार आहे. दिग्दर्शक प्रियदर्शन यांच्या या चित्रपटात सैफ एका दृष्टिबाधित व्यक्तीची भूमिका साकारताना दिसणार आहे. चित्रपटातील त्याचा लूक अत्यंत साधा आणि आरामदायी ठेवण्यात आला आहे. विशेष म्हणजे, सैफच्या या ऑनस्क्रीन लूकची कल्पना त्याच्या खऱ्या आयुष्यातील कपड्यांवरूनच घेण्यात आल्याचा मजेशीर किस्सा आता समोर आला आहे.
नुकत्याच प्रदर्शित झालेल्या ‘Rangiyara’ या गाण्यामध्ये सैफ अली खान काळ्या रंगाचा कुर्ता आणि पांढरा पायजमा परिधान केलेला दिसतो. त्याचा हा साधा लूक चाहत्यांचे लक्ष वेधून घेत आहे. मात्र, या लूकसाठी वेगळ्या पद्धतीने कॉस्च्युम डिझाइन करण्याऐवजी सैफच्या वैयक्तिक स्टाइलमधूनच प्रेरणा घेण्यात आली होती.
सैफ अली खानने त्याच्या पहिल्याच Instagram Live दरम्यान यामागचा किस्सा सांगितला. ‘Haiwaan’च्या शूटिंगला सुरुवात होण्यापूर्वी दिग्दर्शक प्रियदर्शन सैफच्या घरी गेले होते. त्यावेळी सैफने घातलेले कपडे प्रियदर्शन यांना इतके आवडले की त्यांनी चित्रपटातही त्याच प्रकारचा लूक ठेवण्याचा निर्णय घेतला.
पुण्यात DJ वादाला हिंसक वळण! कॅमेऱ्यासमोर विद्यानंद बापटांना मारहाण; सुप्रिया सुळे संतापल्या
याबाबत बोलताना सैफने सांगितले की, प्रियदर्शन घरी आले आणि त्याने परिधान केलेले कपडे पाहून प्रभावित झाले. “तू जे कपडे घातले आहेत ते मला आवडले. चित्रपटातही हेच घाल. अशाच लूकमध्ये ये,” असे प्रियदर्शन यांनी आपल्याला सांगितल्याचा किस्सा सैफने शेअर केला. त्यामुळे ‘Haiwaan’मधील सैफचा साधा आणि आरामदायी लूक प्रत्यक्षात त्याच्या रिअल लाइफ स्टाइलवर आधारित असल्याचे स्पष्ट झाले.
या संवादादरम्यान सैफने त्याच्या ‘Race’ चित्रपटातील रणवीर सिंह या व्यक्तिरेखेच्या स्टाइलबद्दलही भाष्य केले. आजवर साकारलेल्या एखाद्या व्यक्तिरेखेची फॅशन स्टाइल खऱ्या आयुष्यात पुन्हा स्वीकारायची झाली, तर आपण ‘Race’मधील रणवीरची स्टाइल निवडू, असे त्याने सांगितले. “तो ज्या पद्धतीने कपडे घालायचा, ती स्टाइल मला आवडते,” असे सैफ म्हणाला.
दरम्यान, सैफ अली खान आता ‘Haiwaan’मधून पुन्हा एकदा मोठ्या पडद्यावर झळकण्यासाठी सज्ज झाला आहे. हा चित्रपट 11 सप्टेंबर रोजी प्रेक्षकांच्या भेटीला येणार आहे. या चित्रपटात सैफसोबत अक्षय कुमारदेखील महत्त्वाच्या भूमिकेत झळकणार आहे. प्रियदर्शन यांच्या दिग्दर्शनाखाली सैफ आणि अक्षयची जोडी मोठ्या पडद्यावर काय कमाल करते, याकडे आता चाहत्यांचे लक्ष लागले आहे.