Spider-Man: Brand New Day : सोनी पिक्चर्स एंटरटेनमेंटच्या ‘स्पायडर-मॅन: ब्रँड न्यू डे’ने भारतातील बॉक्स ऑफिसवर शानदार सुरुवात केली आहे. प्रदर्शनानंतर अवघ्या चार दिवसांतच या चित्रपटाने ३०० कोटींचा टप्पा ओलांडला होता. पहिल्या आठवड्यातच टॉम हॉलंडची मुख्य भूमिका असलेल्या या चित्रपटाने सहजपणे ३५० कोटींचा आकडा पार केला असून, आता या वीकेंडला ४०० कोटींच्या क्लबमध्ये सामील होण्याकडे त्याची नजर आहे. जागतिक स्तरावरही ‘स्पायडर-मॅन: ब्रँड न्यू डे’ हा या वर्षातील सर्वाधिक कमाई करणारा चित्रपट ठरला आहे. बॉक्स ऑफिसवरील सातव्या दिवशी ‘स्पायडर-मॅन: ब्रँड न्यू डे’ने २२ कोटींची (ग्रॉस) कमाई केली. या आकडेवारीवरून हे पुन्हा एकदा सिद्ध होते की, भारतात ‘स्पायडर-मॅन’ हा सर्वाधिक पसंतीचा सुपरहिरो आहे.
बॉक्स ऑफिसवरील कमाईचा तपशील
दिवस १ – ७३ कोटी रुपये |
दिवस २ – ५८.४ कोटी रुपये |
दिवस ३ – ८५ कोटी रुपये |
दिवस ४ – ९३ कोटी रुपये |
दिवस ५ – २८ कोटी रुपये |
दिवस ६ – २६.३ कोटी रुपये |
दिवस ७ – २२ कोटी रुपये |
एकूण: ३८६ कोटी रुपये (ग्रॉस)
‘स्पायडर-मॅन: ब्रँड न्यू डे’ भारतात इंग्रजी, हिंदी, तमिळ, तेलगू, मल्याळम आणि कन्नड भाषांमध्ये प्रदर्शित करण्यात आला. इंग्रजी आवृत्तीने बॉक्स ऑफिसवर जबरदस्त कामगिरी केली असली, तरी प्रादेशिक भाषांमधील आवृत्त्यांनाही तितकेच प्रेम मिळाले आहे. ‘स्पायडर-मॅन: ब्रँड न्यू डे’ने पहिल्या आठवड्यात अनेक विक्रम प्रस्थापित केले. यामध्ये भारतात हॉलिवूड चित्रपटाची आतापर्यंतची सर्वात मोठी ‘ओपनिंग डे’ (पहिल्या दिवसाची) कमाई, ‘ओपनिंग वीकेंड’ची (पहिल्या आठवड्याच्या शेवटी) सर्वाधिक कमाई आणि देशातील सर्वात मोठ्या प्रमाणावरील (वाइड) हॉलिवूड रिलीजचा समावेश आहे. लोकांकडून मिळणाऱ्या सकारात्मक प्रतिसादांमुळे (वर्ड-ऑफ-माउथ), हा चित्रपट दुसऱ्या वीकेंडलाही बॉक्स ऑफिसवर दमदार कामगिरी करेल अशी अपेक्षा आहे.