Shiv Sena Bhavan Police Action : दादर येथील शिवसेना भवन परिसरात पोलिसांनी आंदोलकांवर कारवाई केल्यानंतर ठाकरे शिवसेनेचे कार्यकर्ते आणि पोलीस यांच्यात जोरदार धुमश्चक्री झाल्याची माहिती समोर आली आहे. आंदोलकांवर कारवाई सुरू असतानाच शिवाजी पार्क परिसरात मनसेचे युवा नेते अमित ठाकरे यांनाही पोलिसांनी अडवलं. त्यानंतर दादरमध्ये पोलिसांनी आंदोलकांना रोखण्यासाठी कारवाई केली. या घडामोडींमुळे परिसरात तणावाचं वातावरण निर्माण झालं.
शिवसेना भवनात पोलीस घुसल्याचं समजताच ठाकरे शिवसेनेचे युवा नेते आदित्य ठाकरे घटनास्थळी उतरले. त्यांनी मोर्चाची जबाबदारी सांभाळत पोलिसांसह सरकारच्या विरोधात जोरदार घोषणाबाजी केली. पोलिसांच्या कारवाईनंतर ठाकरे शिवसेनेच्या कार्यकर्त्यांनी आक्रमक भूमिका घेतल्याचं चित्र दादर परिसरात पाहायला मिळालं.
आम्ही शांत बसणार नाहीत! आता मुंबई बंद करणार, पोलिसांवर गंभीर आरोप करत आदित्य ठाकरे आक्रमक
दरम्यान, मुंबई पोलिसांच्या अंगात दिल्लीचं भूत घुसलं आहे. पण आम्ही मागे हटणार नाही. ज्या आंदोलकांना ताब्यात घेतलं आहे. त्यांना सोडा. आम्ही रोज आंदोलन करणार. शिवाजी पार्कात रोज आंदोलन होणार, अमित ठाकरेंना ताब्यात घेण्यात आलं आहे, असं आदित्य ठाकरेंनी सांगितलं. अख्ख्या महाराष्ट्रात हे आंदोलन तुम्हाला पाहायला मिळेल, असं आदित्य ठाकरेंनी सांगितलं आहे. मुख्य निवडणूक आयुक्त ज्ञानेश कुमारांच्या कथित मतचोरी प्रकरणावरुन त्यांचा राजीनामा मागण्यासाठी हे सर्व आंदोलनं सुरु आहेत.
मुंबईत वणवा पेटला आहे. प्रत्येक नागरिक आपल्या हक्कासाठी लढताना दिसतो आहे, असं यावेळी आदित्य ठाकरेंनी सांगितलं आहे. वरुण सरदेसाई यांनीही सेना भवन परिसरात हजेरी लावली आहे. अनेक मोठे नेते आता शिवाजी पार्कच्या दिशेने निघाल्याची माहिती समोर आली आहे. त्यामुळे आता मुंबईत वातावरण आणखी तापण्याची शक्यता वर्तवण्यात आली आहे.