CM Devendra Fadnavis criticizes the opposition : 1 मे 2026, महाराष्ट्र दिनाचे औचित्य साधत मुंबई-पुणे द्रुतगती मार्गावरील अत्यंत महत्वाच्या मिसिंग लिंक प्रकल्पाचा लोकार्पण सोहळा मोठ्या उत्साहात पार पडला. या कार्यक्रमाला मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांची प्रमुख उपस्थिती होती. या सोहळ्यात बोलताना मुख्यमंत्री देवेंद्र फडणवीस यांनी या मिसिंग लिंकमुळे मुंबई ते पुणे प्रवास अधिक जलद, सुरक्षित आणि सुलभ होणार असल्याचे सांगितले. विशेष म्हणजे, या प्रकल्पामध्ये उभारण्यात आलेला बोगदा हा जगातील सर्वाधिक रुंद बोगद्यांपैकी एक असल्याने हा प्रकल्प ऐतिहासिक ठरणार असल्याचा दावा त्यांनी केला.
यावेळी मुख्यमंत्री फडणवीस यांनी विरोधकांवर अप्रत्यक्षपणे टीका करत, गेल्या अडीच वर्षांत अनेक विकास प्रकल्पांची गती मंदावली किंवा जाणीवपूर्वक थांबवण्यात आली, असा आरोप केला. त्यांनी स्पष्ट केले की, महायुती सरकार सत्तेत आल्यानंतर या प्रकल्पांना पुन्हा गती देण्यात आली आहे. उपमुख्यमंत्री एकनाथ शिंदे यांनी देखील विरोधकांवर जोरदार निशाणा साधला. पूर्वीच्या सरकारमध्ये विकासाच्या कामांवर ब्रेक लावला जात होता, पण आता आमचे सरकार एक्सलेटर दाबून काम करत आहे, असे म्हणत त्यांनी उद्धव ठाकरे यांच्या नेतृत्वाखालील आधीच्या सरकारच्या कार्यपद्धतीवर प्रश्नचिन्ह उपस्थित केले.
मुंबई-पुणे द्रुतगती मार्गावरील हा ‘मिसिंग लिंक’ प्रकल्प प्रवाशांसाठी अत्यंत महत्त्वाचा ठरणार असून, यामुळे वाहतूक कोंडी मोठ्या प्रमाणात कमी होईल, असा विश्वासही त्यांनी व्यक्त केला. याच पार्श्वभूमीवर, कार्यक्रमात मुख्यमंत्री फडणवीस यांनी खासदार सुप्रिया सुळे यांना उद्देशून आता इथून पुढे तुम्हाला वाहतूक कोंडीत अडकू देणार नाही, असे सांगत सध्याच्या ट्रॅफिक समस्येबद्दल दिलगिरी व्यक्त केली.
दरम्यान, या नव्या बोगद्यात वाहन चालवताना लेन शिस्त पाळणे बंधनकारक असणार आहे. लेन बदलताना नियम मोडल्यास दंड आकारला जाणार असल्याची माहितीही प्रशासनाकडून देण्यात आली आहे. विशेष म्हणजे, ‘मिसिंग लिंक’ ही संकल्पना नवीन नसून, तिची मांडणी 2010 सालीच करण्यात आली होती. मात्र, विविध कारणांमुळे हा प्रकल्प दीर्घकाळ रखडला होता. आता तो पूर्णत्वास आल्याने प्रवाशांना मोठा दिलासा मिळणार आहे.
या प्रकल्पाला ‘मिसिंग लिंक’ असे संबोधले जात असले तरी, प्रत्यक्षात हा दोन महत्त्वाच्या मार्गांना जोडणारा दुवा असल्याने याला ‘कनेक्टिंग लिंक’ असे म्हणणे अधिक योग्य ठरेल, असे मतही या वेळी व्यक्त करण्यात आले. एकूणच, महाराष्ट्र दिनी लोकार्पण झालेल्या या महत्त्वाकांक्षी प्रकल्पामुळे मुंबई-पुणे प्रवासात नवी क्रांती घडणार असल्याचे चित्र सध्या दिसून येत आहे.