Nagarparishad And Nagarpalika Election Pune : राज्यभरात नगरपरिषद आणि नगरपालिका निवडणुकांच्या प्रचाराचा धुराळा सुरू आहे. आरोप प्रत्यारोपांच्या फैरी पाहायला मिळत आहेत. अशातच पुण्यातील (Pune) आंबेगाव तालुक्यातील मंचर येथे काळ उपमुख्यमंत्री अजित पवार (Ajit Pawar) आणि एकनाथ शिंदे (Eknath Shinde) यांच्या प्रचारसभा झाल्या. या सभा चर्चेचा विषय ठरल्या आहेत. याचं कारणंही तसंच आहे. कारण उपमुख्यमंत्री एकनाथ शिंदे यांची सभा झाल्यानंतर लगेचच महिलांना साड्यांचे वाटप होत असल्याचं समोर आलंय. या सगळ्या घटनेचे काही व्हिडिओ देखील समोर आले आहेत. समोर आलेल्या व्हिडिओमध्ये काही महिला या सभा संपल्यानंतर साड्या घेऊन जात असल्याचं स्पष्ट दिसतंय. या घटनेमुळे आता नवा राजकीय वाद उभा राहिलाय.
मनसे-शिवसेनेची पुण्यात युती? थेट उमेदवारांची यादीच ठाकरेंना पाठवली
नगरपंचायत निवडणुकीच्या वातावरणात महिलांना साड्यांचं वाटप हे प्रकरण उमेदवारांना याचा राजकीय फायदा व्हावा यासाठीच असल्याचा आरोप स्थानिक पातळीवर केला जातोय. विशेष म्हणजे या साड्या ज्या पिशव्यांत दिल्या आहेत, त्या पिशव्यांवर उमेदवारांसह उपमुख्यमंत्री एकनाथ शिंदे यांचा फोटो देखील पाहायला मिळत आहे. तसेच लाडक्या बहिणींसाठी भाऊबीज असा मजकूर देखील या पिशव्यांवर छापलेला आहे. निवडणुकीच्या आचारसंहितेच्या पार्श्वभूमीवर घडलेल्या या प्रकारामुळे खळबळ उडाली असून, प्रशासनाने या प्रकरणाची चौकशी करून संबंधितांवर कारवाई करण्याची मागणी जोर धरू लागली आहे.