Kolkata Durga Puja Pandal Tragedy : कोलकाता येथे सप्तमीच्या संध्याकाळी चोरबागान सार्वजनिक दुर्गापूजा मंडपात मोठी दुर्घटना घडली. दर्शनासाठी जमलेल्या भाविकांची गर्दी वाढल्याने मंडपाचा काही भाग कोसळला आणि त्यानंतर चेंगराचेंगरीसदृश परिस्थिती निर्माण झाली. या दुर्घटनेत १७ जणांचा मृत्यू झाल्याचे वृत्त आहे. दुर्गापूजा उत्सवासाठी भाविक मोठ्या संख्येने एकत्र आले असताना हा प्रकार घडला. अचानक निर्माण झालेल्या गोंधळामुळे परिसरात धावपळ सुरू झाली.
दुर्घटनेत बाधित झालेल्या व्यक्तींना घटनास्थळावरून बाहेर काढून उपचारांसाठी कलकत्ता वैद्यकीय महाविद्यालयाच्या रुग्णालयात दाखल करण्यात आलं आहे. पूजा आयोजकांनी परिस्थिती नियंत्रणात आणण्यासाठी आणि बाधितांना मदत करण्यासाठी तातडीनं पावलं उचलल्याचं सांगण्यात येत आहे. घटनेची माहिती मिळताच पोलीस आणि आपत्ती व्यवस्थापन विभागाचे अधिकारी घटनास्थळी दाखल झाले. मात्र, जखमींची नेमकी संख्या किती आहे आणि मंडपाचा भाग कोसळण्यामागचं कारण काय, याबाबत अद्याप स्पष्ट माहिती समोर आलेली नाही.
घटनेच्या वेळी उपस्थित असलेल्या एका प्रत्यक्षदर्शीनं सांगितलं की, अनेक जण बेशुद्ध पडले होते. काहींना दुचाकींवरून उपचारांसाठी नेण्यात येत होतं. आपल्या आजूबाजूला अनेक जण बेशुद्ध पडल्याचं आणि त्यांना दुचाकींवरून हलवलं जात असल्याचं आपण पाहिल्याचं या प्रत्यक्षदर्शीनं सांगितलं. दरम्यान, पीटीआय वृत्तसंस्थेला पोलिसांच्या वरिष्ठ अधिकाऱ्यानं दिलेल्या माहितीनुसार, पाऊस सुरू होताच चोरबागान दुर्गापूजा मंडपाबाहेर दर्शनासाठी थांबलेल्या गर्दीनं पुढे जाण्यासाठी धाव घेतली. यामुळे काही जण रस्त्यावर पडले आणि चेंगराचेंगरीसदृश परिस्थिती निर्माण झाली.
पश्चिम बंगालच्या माजी मुख्यमंत्री ममता बॅनर्जी यांनी या दुर्घटनेबद्दल तीव्र दुःख व्यक्त केलं आहे. त्यांनी समाजमाध्यमावर केलेल्या संदेशात चोरबागान पूजा मंडपातील चेंगराचेंगरीची बातमी ऐकून मोठा धक्का बसल्याचं म्हटलं आहे. जखमी व्यक्ती लवकर बऱ्या व्हाव्यात, अशी प्रार्थना आपण दुर्गामातेकडे करत असल्याचं त्यांनी नमूद केलं. तसेच, या कठीण प्रसंगी जखमींच्या कुटुंबीयांना धैर्य आणि बळ मिळावं, अशी भावनाही त्यांनी व्यक्त केली.