चंद्रपूर महापालिकेत कुणालाच बहुमत मिळालं नाही. (Election) दरम्यान, या त्रिशंकू अवस्थेत असलेल्या महापालिकेत भाजपने ऑपरेशन लोटस सुरू केलं आहे. भाजपचे ज्येष्ठ नेते सुधीर मुनगंटीवार यांनी काँग्रेसचे अनेक नगरसेवक आमच्या संपर्कात असल्याचा दावा केला. मात्र, यावर संजय राऊत आणि काँग्रेसनेही भाजपवर पलटवार केला आहे.
एकीकडे शिवसेना उबाठा गटासोबत चर्चा सुरू असल्याचं सांगत काँग्रेस नगरसेवकांचा एक गट आपल्या संपर्कात असल्याचं सांगून भाजप नेते सुधीर मुनगंटीवार यांनी खळबळ उडवून दिली. मात्र, महापौर पदाबाबत कुठलीही तडजोड करणार नाही, तो भाजपचाच होणार हे त्यांनी स्पष्ट केले. भाजपच्या दाव्यावर उत्तर देताना, शिवसेना ठाकरे गटाचे खासदार संजय राऊत यांनी मात्र चंद्रपुरात आपल्याशिवाय महापौर बसणार नाही हे लक्षात आणून दिलं.
पुण्यात पती-पत्नी, सख्ख्या भावांसह सासू-सुना देखील महापालिका सभागृहात दिसणार एकत्र
विशेष म्हणजे भाजपसोबत जाण्याची शक्यता त्यांनी फेटाळून लावली नाही. पक्षप्रमुख याबाबत निर्णय घेतील असं सांगत ठाकरे गटासाठी सर्व दारे खुली असल्याचेच त्यांनी अप्रत्यक्षपणे सांगितलं. चंद्रपूर महानगरपालिकेत सर्वात मोठा पक्ष असलेल्या काँग्रेसच्या विजय वडेट्टीवार यांनी मात्र काँग्रेस सत्ता स्थापनेसाठी तयार असल्याचं सांगितलं. भाजपचेच काही नगरसेवक आपल्या संपर्कात असल्याचा दावा त्यांनी केला.
सोबतच भाजप देखील दोन गटांमध्ये विभागलं गेल्याचं सांगायला वडेट्टीवार विसरले नाहीत. एकूण 66 नगरसेवक संख्या असलेल्या चंद्रपूर महापालिकेत सत्ता स्थापनेसाठी विविध पक्षांच्या पडद्यामागे जोरदार हालचाली सुरू आहेत. त्यातही आपल्या पक्षातले नगरसेवक राखून दुसऱ्या पक्षातले नगरसेवक जोडण्याची मोठी कसरत सर्वच राजकीय पक्षांना करावी लागणार आहे.
चंद्रपूर महानगरपालिका अंतिम निकाल-
एकूण – 66
भाजप – 23
शिवसेना – 1
काँग्रेस – 30
ठाकरे गट – 6
बसपा – 1
वंचित – 2
एमआयएम – 1
अपक्ष – 2