Nagpur MLC Election Result Update : नागपूर पदवीधर मतदारसंघाची निवडणूक केवळ भाजप आणि काँग्रेसमधील लढतीपुरती मर्यादित राहिलेली नाही. या निवडणुकीत अपक्ष उमेदवार नितेश कराळे मास्तर यांच्या भूमिकेनेही राजकीय गणितं बदलण्याची शक्यता निर्माण केली आहे. एकीकडे भाजपचा अंतर्गत सर्व्हे कराळे यांना पहिल्या पसंतीची 15 हजार मतं मिळण्याचा अंदाज वर्तवत असल्याची चर्चा आहे, तर दुसरीकडे मतदानाच्या काही तास आधी कराळे यांनी सोशल मीडियावर ढसाढसा रडतानाचा व्हिडीओ शेअर केला. या दोन घटनांमुळे नागपूरच्या निकालाकडे राजकीय वर्तुळाचं लक्ष लागलं आहे.
विजयासाठी भाजपकडून जोरदार तयारी
मुख्यमंत्री देवेंद्र फडणवीस यांचा बालेकिल्ला मानल्या जाणाऱ्या नागपूर पदवीधर मतदारसंघात भाजपने विजयासाठी जोरदार तयारी केली होती. भाजपचे सुधाकर कोहळे, काँग्रेसचे अभिजीत वंजारी आणि अपक्ष नितेश कराळे यांच्यात ही लढत झाली. भाजपकडून फडणवीस यांच्यासह केंद्रीय मंत्री नितीन गडकरी आणि चंद्रशेखर बावनकुळे यांनीही प्रचारात ताकद लावली. आमदार आणि नगरसेवकांवरही प्रचाराची जबाबदारी सोपवण्यात आली होती. त्यामुळे भाजपला आपल्या विजयाची खात्री असल्याचं चित्र होतं. मात्र, या सगळ्या राजकीय गणितांमध्ये नितेश कराळे यांना मिळणारी मतं महत्त्वाची ठरू शकतात असा अंदाज आहे.
भाजपच्या सर्व्हेत कराळेंना 15 हजार मतांचा अंदाज?
निवडणुकीच्या पार्श्वभूमीवर भाजपच्या प्राथमिक सर्व्हेत नितेश कराळे यांना पहिल्या पसंतीची सुमारे 15 हजार मतं मिळू शकतात, असा अंदाज व्यक्त करण्यात आल्याचं सांगितलं जात आहे. हा आकडा प्रत्यक्षात किती ठरतो, हे मतमोजणीनंतरच स्पष्ट होईल. मात्र, कराळे यांना मिळणाऱ्या मतांमुळे भाजप आणि काँग्रेस या दोन्ही पक्षांच्या विजयाच्या गणितावर परिणाम होऊ शकतो. पदवीधर मतदारसंघाच्या निवडणुकीत केवळ पहिल्या पसंतीची मतं निर्णायक ठरतीलच असं नाही. पहिल्या फेरीत कोणत्याही उमेदवाराला आवश्यक मतांचा कोटा पूर्ण करता आला नाही, तर नियमानुसार पुढील पसंतीच्या मतांचा विचार होऊ शकतो. त्यामुळे कराळे यांना पहिल्या पसंतीची मतं देणारे मतदार दुसऱ्या पसंतीसाठी कोणाला निवडतात, हेही महत्त्वाचं ठरणार आहे.कराळे यांची मतं भाजपकडे वळणार की काँग्रेसला त्याचा फायदा होणार, याबाबत स्पष्ट चित्र नाही. त्यामुळे भाजपच्या सर्व्हेत व्यक्त झालेला अंदाज आणि प्रत्यक्ष मतमोजणीतील आकडे यांची तुलना महत्त्वाची ठरणार आहे.
मतदानाआधी कराळे ढसाढसा रडले, भावनिक व्हिडीओची चर्चा
नितेश कराळे यांच्या उमेदवारीभोवतीचा वादही या निवडणुकीत चर्चेचा विषय ठरला. मतदानाच्या काही तास आधी शरद पवार गटाने त्यांना पक्षातून सहा वर्षांसाठी निलंबित केले. या निर्णयानंतर कराळे यांनी सोशल मीडियावर रडतानाचा व्हिडीओ शेअर केला. या व्हिडीओतून त्यांनी व्यक्त केलेल्या भावना आणि पक्षाच्या निर्णयामुळे निर्माण झालेला वाद याची चर्चा सुरू झाली. निवडणुकीच्या अगदी तोंडावर घडलेल्या या घटनेमुळे कराळे यांच्याबद्दल मतदारांमध्ये सहानुभूती निर्माण झाली का, हा प्रश्न उपस्थित होत आहे. त्यांच्या भावनिक आवाहनाचा मतदानावर परिणाम झाला असण्याची शक्यता नाकारता येत नाही. मात्र, त्याचा प्रत्यक्ष फायदा किती झाला, हे मतांच्या आकडेवारीतूनच स्पष्ट होईल.
नागपूरचा निकाल फिरणार की भाजपचा अंदाज खरा ठरणार?
नागपूर पदवीधर मतदारसंघात भाजपने संघटनात्मक ताकद पणाला लावली, तर काँग्रेसला चंद्रपूर, गोंदिया आणि गडचिरोलीसारख्या भागांतील मतदानाचा फायदा होण्याची अपेक्षा आहे. या पार्श्वभूमीवर कराळे यांना मिळणारी मतं आणि त्यानंतरच्या पसंतीक्रमाचं गणित निर्णायक ठरू शकतं. भाजपच्या सर्व्हेत कराळेंना 15 हजार मतांचा अंदाज, मतदानाआधीचा त्यांचा भावनिक व्हिडीओ आणि दुसऱ्या पसंतीच्या मतांचं अनिश्चित गणित या तीन गोष्टींमुळे नागपूरच्या निवडणुकीत उत्सुकता वाढली आहे. मात्र, कराळेंच्या भावनिक आवाहनाचा मतदारांवर किती परिणाम झाला आणि भाजपचा प्राथमिक अंदाज कितपत खरा ठरला, याचं उत्तर प्रत्यक्ष मतमोजणीनंतरच समोर येणार असून, निकाल काय लागतो याकडे आता सर्वांचे लक्ष लागले आहे.