4-year-old girl murdered after being raped : एकीकडे राज्यभरात महाराष्ट्र दिनाचा उत्साह असताना, पुणे जिल्ह्यातील भोर तालुक्यातून समोर आलेल्या एका भीषण घटनेने संपूर्ण महाराष्ट्राला हादरवून सोडलं आहे. नसरापूर गावात अवघ्या चार वर्षांच्या निष्पाप चिमुरडीवर अत्याचार करून तिची अत्यंत क्रूरपणे हत्या करण्यात आल्याची धक्कादायक माहिती समोर आली आहे. या घटनेमुळे केवळ परिसरातच नव्हे, तर संपूर्ण राज्यात संतापाची तीव्र लाट उसळली आहे. मिळालेल्या प्राथमिक माहितीनुसार, गावातीलच एका 65 वर्षीय व्यक्तीने हे अमानुष कृत्य केल्याची माहिती आहे.
घरासमोर खेळत असलेल्या चिमुकलीला त्याने फूस लावून जवळच्या गोठ्यात नेले. तेथे तिच्यावर अत्याचार केल्यानंतर आरोपीने पुरावा नष्ट करण्याच्या उद्देशाने दगडाने ठेचून तिचा खून केला. या कृत्यानंतर त्याने चिमुरडीचा मृतदेह शेणाच्या ढिगाऱ्याखाली लपवून ठेवला, जेणेकरून हा प्रकार कुणाच्याही लक्षात येऊ नये. दुपारच्या सुमारास चिमुरडी अचानक दिसेनाशी झाल्याने तिच्या कुटुंबीयांनी आणि नातेवाईकांनी चिंतेतून शोधाशोध सुरू केली. गावकऱ्यांनीही शोधमोहीम राबवली.
काही वेळानंतर गोठ्यात संशयास्पद परिस्थितीत चिमुरडीचा मृतदेह आढळून आला आणि एकच खळबळ उडाली. त्यानंतर तात्काळ पोलिसांना याची माहिती देण्यात आली. दरम्यान, परिसरातील सीसीटीव्ही फुटेज तपासण्यात आले असता आरोपी त्या चिमुरडीला गोठ्याकडे घेऊन जाताना स्पष्टपणे दिसत असल्याचे समोर आले. या पुराव्यामुळे संशय अधिकच बळावला आणि आरोपीचे नाव पुढे आले. पोलिसांनी तत्काळ हालचाली करत आरोपीला ताब्यात घेतल्याची माहिती सूत्रांकडून मिळत आहे, मात्र अधिकृत पुष्टीची प्रतीक्षा आहे.
14 लाख विद्यार्थ्यांसाठी मोठा दिवस, दुपारी 1 वाजता जाहीर होणार बारावीचा निकाल
या घटनेतील आणखी एक हृदयद्रावक बाब म्हणजे ही चिमुरडी उन्हाळ्याच्या सुट्टीसाठी आपल्या आजीकडे आली होती. सुट्टीचा आनंद घेण्यासाठी आलेल्या या निष्पाप जीवावर अशी क्रूर वेळ ओढवेल, याची कल्पनाही कुणाला नव्हती. घरासमोर खेळत असताना तिच्यावर हा भीषण प्रकार घडल्याने गावातील प्रत्येक व्यक्ती सुन्न झाली आहे. घटनेची माहिती गावभर पसरताच संतप्त ग्रामस्थांनी मोठ्या संख्येने रस्त्यावर उतरून आंदोलन सुरू केले. पुणे-बेंगळुरू महामार्गावर रास्ता रोको करण्यात आला, ज्यामुळे काही काळ वाहतूक ठप्प झाली.
आरोपीला त्वरित फाशीची शिक्षा द्या, पीडितेला न्याय मिळालाच पाहिजे अशा जोरदार घोषणा देत नागरिकांनी आपला रोष व्यक्त केला. याचवेळी मोठा जमाव पोलीस ठाण्याबाहेर जमा झाला आणि पोलीस प्रशासनाला जाब विचारला. संतप्त नागरिकांनी चिमुरडीचा मृतदेहही पोलीस ठाण्याबाहेर आणून ठेवला आणि आरोपीला कठोरात कठोर शिक्षा होईपर्यंत आंदोलन सुरू ठेवण्याचा निर्धार व्यक्त केला. काही ठिकाणी वातावरण तणावपूर्ण बनले होते, त्यामुळे अतिरिक्त पोलीस बंदोबस्त तैनात करण्यात आला आहे.
पोलीस प्रशासनाकडून परिस्थिती नियंत्रणात ठेवण्याचा प्रयत्न सुरू असून, नागरिकांना शांतता राखण्याचे आवाहन करण्यात आले आहे. या प्रकरणाचा तपास जलदगतीने करण्यात येईल आणि दोषींवर कडक कारवाई केली जाईल, अशी ग्वाही अधिकाऱ्यांनी दिली आहे. दरम्यान, या घटनेमुळे महिला आणि बाल सुरक्षेचा प्रश्न पुन्हा एकदा ऐरणीवर आला आहे. अशा प्रकारच्या घटनांना आळा घालण्यासाठी अधिक कठोर कायदे, प्रभावी अंमलबजावणी आणि समाजातील जागरूकता यांची नितांत गरज असल्याची भावना व्यक्त केली जात आहे.