Pune News : बाजारभावापेक्षा अधिक दरमहा दीड टक्के जास्त परतावा देऊन फसवणुकीचे प्रकार पुण्यात घडत आहे. या गैरव्यवहारांत आता बांधकाम व्यावसायिकही उतरले आहेत. या बिल्डरांकडूनच असे उद्योग सुरू झाल्याने गुंतवणूकदार मात्र हवालदिल झाले आहेत. असाच एक धक्कादायक प्रकार पुण्यात घडला होता. जास्त परतावा देण्याचे आमिष दाखवून बांधकाम व्यावसायिक अमित लुंकड यांनी गुंतवणुकदारांकडून मोठ्या प्रमाणावर वेगवेगळ्या ठेव योजनांद्वारे कोट्यावधी रुपये घेतले. मात्र, काही वर्षांपासून त्यांनी ते पैसे परत करत नसल्याच्या तक्रारी पुणे शहर पोलीस दलातील आर्थिक गुन्हे शाखेकडे गुंतवणुकदारांकडून करण्यात आल्या आहेत. आतापर्यंत किमान 50 कोटी रुपयांच्या तक्रारी दाखल झाल्या आहेत. मात्र, या प्रकरणात तपास काही पुढे सरकायला तयार नाही.
अमित लुंकड यांच्याविरुद्ध यापूर्वी तक्रारी आल्या होत्या. त्यातील काही जणांनी नंतर तक्रारी मागे घेतल्या आहेत. आता नव्याने पुन्हा अनेक तक्रारी आल्या आहेत. त्या सर्व एकत्र करुन त्याचा तपास करण्यात येत आहे अशी माहिती आर्थिक गुन्हे शाखेचे पोलीस उपायुक्त विवेक मासाळ यांनी दिली.
मुंबईतील धक्कादायक घटना; नारायण राणेंच्या नावाचा वापर करुन 45 लाखांची झाली फसवणूक
आर्थिक गुन्हे शाखेत दाखल करण्यात आलेल्या तक्रारीमध्ये गुंतवणूकदारांनी अमित कांतीलाल लुंकड, अमोल कांतीलाल लुंकड आणि पुष्पा कांतीलाल लुंकड यांना प्रतिवादी केले आहे. याबाबत प्रविणचंद जैन यांनी सर्वप्रथम तक्रार दिली होती. लुंकड यांनी त्यांचा विश्वास संपादन करुन वेगवेगळ्या ठेव व गुंतवणुक योजनांबाबत आश्वासित केले. अमित आणि अमोल लुंकड यांनी दरमहा दीड टक्का आणि सध्या मार्केटमध्ये असलेल्या दरापेक्षा अधिक परतावा देऊ, असे आश्वासन दिले. नियमित व्याज देऊ असेही आश्वासन दिले. त्यानंतर लुंकड रियाल्टीमध्ये प्रविणचंद जैन यांनी 6 कोटी 81 लाख रुपयांची गुंतवणुक केली. सुरुवातीला त्यांच्याकडून व्याज येत होते. परंतु, 2019 पासून व्याज देण्यास अनियमितता होऊ लागली. त्यांनी दिलेले धनादेश बँकेत अपुरा निधी असल्याचे कारण देऊन ते धनादेश परत आले. त्यानंतर त्यांनी गेल्या वर्षी आर्थिक गुन्हे शाखेकडे तक्रार दिली होती.
अशाच प्रकारे अनेकांनी आपली कोट्यावधींची फसवणूक झाल्याच्या तक्रारी आर्थिक गुन्हे शाखेकडे केल्या आहेत. खिंससरा चव्हाण – 26 कोटी 70 लाख 37 हजार 973 रुपये आणि अशोक रायसोनी यांची 8 कोटी 38 लाख 30 हजार 756 रुपयांची फसवणूक झाल्याचा आरोप करण्यात आला आहे. सतीश सेलोत यांची 1 कोटी 22 लाख 61 हजार 162 रुपये, दीपक लुंकड यांची 1 कोटी 59 लाख 32 हजार 818 रुपये, स्मिता देशपांडे यांची 27 लाख 87 हजार 822 रुपये, प्रकाशचंद बोरा यांची 2 कोटी 47 लाख 59 हजार 79 रुपये, भरत चंगेडिया यांची 46 लाख 49 हजार 894 रुपये, गोकुळ बोथरा यांची 1 कोटी 20 लाख 62 हजार 934 रुपये अशा जवळपास 50 कोटी रुपयांच्या तक्रारी आर्थिक गुन्हे शाखेकडे दाखल आहेत. अनेक तक्रारी या ऑक्टोबर, नोव्हेंबर 2024 मध्ये दाखल करण्यात आल्या आहेत. तरीही आर्थिक गुन्हे शाखेकडून याचा तपास अतिशय संथगतीने सुरू आहे. अनेक तक्रारदारांना अजून गुन्हे शाखेने बोलवून त्यांचे म्हणणेही नोंदवून घेतले नाही, अशा या गुंतवणुकदारांच्या तक्रारी आहेत.
गौतम अदानींच्या अडचणीत वाढ; यूएसमध्ये लाचखोरी आणि फसवणूकीचे आरोप, अटक वॉरंट जारी
