A Perfect Murder : “हिचकॉक म्हणजे थ्रिलचा राजा! त्यांच्या कलाकृतींमध्ये असलेला गूढपणा, रोमांच आणि भीतीचा सूक्ष्म खेळ नेहमीच मला मोहवतो,” असं अभिनेत्री दिप्ती भागवत सांगतात. त्या लवकरच रंगभूमीवर “अ परफेक्ट मर्डर” या नाटकातून मीरा ही मध्यवर्ती भूमिका साकारणार आहेत आणि ही भूमिका प्रेक्षकांना रहस्याच्या नव्या जगात घेऊन जाणार आहे. हे नाटक सुप्रसिद्ध चित्रपटकार सर अल्फ्रेड हिचकॉक यांच्या क्लासिक कथानकावर आधारित असून लेखक नीरज शिरवईकर आणि दिग्दर्शक विजय केंकरे यांनी त्याला मराठी रंगभूमीचा साज चढवला आहे. “मूळ कथेचा आत्मा कायम ठेवून, मराठी संवेदनांना साजेसं रूपांतर करणं ही मोठी कसोटी होती आणि आमच्या टीमने ती उत्कृष्टरीत्या पार पाडली,” असं दिप्ती म्हणतात.
दिप्तीची ‘मीरा’ (Deepti Bhagwat) ही एक बहुरंगी व्यक्तिरेखा आहे . श्रीमंती, सौंदर्य आणि आत्मविश्वासाने झगमगणारी, पण अंतर्मनात असंख्य प्रश्न आणि भावनांच्या वादळांनी ढवळलेली. “ती दोषी आहे की बळी हे समजून घेणंही नाटकाचा भाग आहे,” असं दिप्ती गूढ स्मितासह सांगतात. या भूमिकेसाठी त्यांना भावनिक खोली आणि संयम दोन्हीची गरज भासली. “प्रत्येक दृश्य हे प्रेक्षकांशी संवाद साधणारं आहे. काही संवाद शब्दात नाहीत, ते नजरेत आहेत नाटकातील प्रत्येक थांबा, प्रत्येक शांतता काहीतरी सांगून जाते,” असं त्या सांगतात.
दिग्दर्शक विजय केंकरे (Vijay Kenkare) यांच्यासोबतचा अनुभव त्या “शिकण्याचा प्रवास” म्हणतात. “प्रत्येक तालमीत विजय सरांनी पात्राची नवी बाजू दाखवली. त्यामुळे ‘मीरा’ला खऱ्या अर्थाने मी आतून जगू शकले.” बदाम राजा प्रोडक्शनसह, अनिकेत विश्वासराव, श्वेता पेंडसे, राहुल पेठे, सुबोध पंडे आणि पुष्कर श्रोत्री या सहकलाकारांसोबत काम करणं ‘सहज आणि प्रेरणादायी’ असल्याचं त्या सांगतात. “अ परफेक्ट मर्डर हा फक्त रहस्य नाटक नाही तो एक भावनांचा आणि सस्पेन्सचा सजीव खेळ आहे. तो रंगमंचावर अनुभवताना प्रेक्षक श्वास रोखून बसतील,” असा विश्वास दिप्ती व्यक्त करतात.
लागणार लॉटरी अन् मिळणार कोट्यवधींचं बक्षीस; ICC महिला क्रिकेट विश्वचषक 2025 बक्षीस रक्कम जाहीर
विशेष म्हणजे रॉयल ऑपेरा हाऊस हे एक आयकॉनिक थिएटर आहे, जिथे मराठी नाटकांचे प्रयोग फार कमी होतात. प्रेक्षकांचा उत्तम प्रतिसाद मिळत असल्याने 5 नोव्हेंबर रोजी सायंकाळी 7.00 वाजता रॉयल ऑपेरा हाऊसला ‘अ परफेक्ट मर्डर’चा 6 वा प्रयोग आयोजित केला आहे. थ्रिल, नात्यांचा गुंता आणि अभिनयाचा उत्कट संगम “अ परफेक्ट मर्डर” हे नाटक मराठी रंगभूमीवर एक संस्मरणीय अनुभव ठरणार आहे.