New Kore song ‘Glory of My Marathi’ is coming on February 27th : मराठी ही केवळ आपल्या राज्याची अधिकृत भाषा नसून तिला नुकताच ‘अभिजात भाषा’ हा बहुमान प्राप्त झाला आहे. या ऐतिहासिक निर्णयाचा आनंद द्विगुणित करण्यासाठी आणि 27 फेब्रुवारी रोजी साजऱ्या होणाऱ्या ‘मराठी भाषा गौरव दिना’चे औचित्य साधून, श्री गुरु एस. नायर यांच्या प्रॉडक्शनतर्फे ‘गौरव माय मराठीचा’ हे भव्य गीत रसिक प्रेक्षकांच्या भेटीला येत आहे. विशेष म्हणजे गुरु एस. नायर यांनीच या गीताचे दिग्दर्शनही केले आहे.
मराठी भाषेचा सांगीतिक जागर
गेल्या अनेक वर्षांपासून कला क्षेत्रात सक्रिय असलेले आणि अनेक नामवंत कलावंतांचे यशस्वी स्टेज शो आयोजित करणारे गुरु नायर यांनी मराठी भाषेच्या प्रेमापोटी या गीताची निर्मिती केली आहे. मराठी भाषेचा समृद्ध इतिहास, विविधतेने नटलेली परंपरा आणि भाषेचा गौरव मांडण्याचा एक प्रामाणिक प्रयत्न या गाण्यातून करण्यात आला आहे. हे गीत बालकलाकार कुमार आदित्य जी. नायर आणि कोरस यांनी गायले असून, मराठी साहित्याचे आणि संस्कृतीचे दर्शन यातून घडणार आहे.
बालकलाकार आदित्यची भरारी
गायक कुमार आदित्य जी. नायर याने अत्यंत कमी वयात आपल्या गायकीची मोहोर उमटवली आहे. त्याने यापूर्वी कविता पौडवाल, उत्तरा केळकर, वैशाली सामंत, नागेश मोरवेकर आणि अभिजीत सावंत यांसारख्या दिग्गज गायकांसोबत गाणी गायली आहेत. आता ‘गौरव माय मराठीचा’ या गाण्यातून तो पुन्हा एकदा आपल्या आवाजाने रसिकांना मंत्रमुग्ध करण्यास सज्ज झाला आहे.
Pune Traffic Police : पुणे पोलीस अॅक्शन मोडमध्ये; दंड न भरल्यास लायसन्स होणार रद्द
दिग्गज तंत्रज्ञांची साथ
या गीताचे शब्द आणि संगीत किशोर मोहिते (वादक, महाराष्ट्राची हास्य जत्रा फेम) यांनी दिले आहे. किशोर मोहिते यांनी यापूर्वीही आदित्यच्या अनेक गीतांना संगीतबद्ध केले आहे. संगीताची अधिक रंगत वाढवण्याचे काम संगीत संयोजक सुदेश गायकवाड यांनी केले आहे. या वैशिष्ट्यपूर्ण गीताचे दिग्दर्शन स्वतः गुरु एस. नायर यांनी केले आहे.
कुठे पाहता येईल?
मराठी भाषेचा आदर वाढावा आणि भाषेची महती सर्वांपर्यंत पोहोचावी, या सामाजिक भावनेतून निर्माण केलेले हे गीत आदित्य नायर ह्यांच्या अधिकृत यूट्यूब चॅनेलवर उपलब्ध होणार आहे. मराठी संस्कृतीचा वारसा सांगणाऱ्या या गीताला सर्व मराठी प्रेमींनी उदंड प्रतिसाद द्यावा आणि आपल्या गोड प्रतिक्रिया द्याव्यात, अशी अपेक्षा निर्माते गुरु नायर यांनी व्यक्त केली आहे.