mega action-adventure film ‘Varanasi’ : एस. एस. राजामौली हे भारतीय चित्रपटसृष्टीतील मोजक्या दिग्दर्शकांपैकी एक असून त्यांनी ब्लॉकबस्टरची व्याख्याच बदलून टाकली आहे. भव्य कॅनव्हास, प्रभावी दृष्टीकोन आणि लक्षात राहणाऱ्या कथा यासाठी ओळखले जाणारे राजामौली आता आपल्या आगामी मेगा अॅक्शन-अॅडव्हेंचर चित्रपट ‘वाराणसी’ सह प्रेक्षकांसमोर येत आहेत. महेश बाबू, प्रियंका चोप्रा जोनस आणि पृथ्वीराज सुकुमारन यांच्या प्रमुख भूमिका असलेला हा चित्रपट आधीपासूनच देशातील सर्वाधिक चर्चेत आणि बहुप्रतिक्षित चित्रपटांपैकी एक ठरला आहे. आध्यात्मिक आणि ऐतिहासिक वारसा लाभलेल्या वाराणसीच्या पार्श्वभूमीवर आधारित हा चित्रपट पारंपरिक मुळे आणि आधुनिक, प्रेक्षकांना जवळची वाटणारी कथा यांचा सुंदर संगम घडवणार आहे.
चित्रपटाबाबतचा उत्साह सध्या शिखरावर असून, अलीकडेच प्रदर्शित झालेल्या कॅरेक्टर पोस्टर्सनंतर चर्चेला अधिकच वेग आला आहे. याच पार्श्वभूमीवर दिलेल्या एका मुलाखतीत एस. एस. राजामौली, महेश बाबू आणि प्रियंका चोप्रा जोनस यांनी चित्रपटाशी संबंधित अनेक रंजक गोष्टी उलगडून सांगितल्या. राजामौली यांनी हॉलीवूडचे दिग्गज दिग्दर्शक जेम्स कॅमेरॉन यांनी केलेल्या कौतुकाचा विशेष उल्लेख केला. ते म्हणाले, “जेम्स कॅमेरॉन ‘आरआरआर’बद्दल बोलताना मी ऐकलं आणि तो क्षण माझ्यासाठी खूप खास होता. आमच्यात सविस्तर चर्चा झाली आणि त्यांनी मला सांगितलं — तुम्ही ज्या प्रकारचे चित्रपट बनवत आहात, तेच बनवत राहा. ती गोष्ट आजही माझ्या लक्षात आहे.”
माझ्यासारखे 242 आमदार आहेत म्हणून तुझा मुख्यमंत्री… शिंदेंच्या आमदाराचा भाजपला इशारा
प्रियंका चोप्रा जोनस यांनी भारतीय चित्रपटसृष्टीत पुनरागमन केल्याचा आनंद व्यक्त करत सांगितले, “मी गेली सहा वर्षे कोणताही भारतीय चित्रपट केला नव्हता. मी एसएसआर यांना खास विचारलं की, तुम्ही मला नृत्य करायला लावाल का?” यावर महेश बाबू हसत म्हणाले, “आम्ही एक गाणं शूट केलं आहे आणि ते सतत आमच्या डोक्यात घोळत राहतं. प्रियंका तर ते नेहमी गुणगुणत असते.”
‘वाराणसी’ने भारताबाहेरही आधीच आपली छाप पाडली आहे. चित्रपटाची पहिली झलक पॅरिसमधील ‘ले ग्रँड रेक्स’ येथे झालेल्या ट्रेलर फेस्टिव्हलमध्ये दाखवण्यात आली, जिथे प्रेक्षकांचा प्रतिसाद प्रचंड उत्स्फूर्त होता. पहिल्याच फ्रेमपासून थिएटर टाळ्या, शिट्ट्या आणि जल्लोषाने दुमदुमून गेले, ज्यातून चित्रपटाबाबतची जागतिक पातळीवरील उत्सुकता स्पष्टपणे दिसून आली.
महेश बाबू यांचा रुद्र आणि भगवान रामाच्या रूपातील प्रभावी लूक, पृथ्वीराज सुकुमारन यांचा भयावह खलनायक ‘कुंभा’चा अवतार आणि प्रियंका चोप्रा जोनस यांचा वाराणसीची ‘मंदाकिनी’ म्हणून सशक्त लूक आधीच समोर आला असून, त्याने सोशल मीडियावर प्रचंड खळबळ उडवली आहे. या झलक्यांमुळे चित्रपटाबाबतची उत्सुकता आणखी वाढली आहे. आता प्रेक्षकांना 7 एप्रिल 2027 रोजी मोठ्या पडद्यावर येणाऱ्या या भव्य सिनेमाई अनुभवाची आतुरतेने प्रतीक्षा आहे.