Shraddha Kapoor to portray the legendary artist Etha Bai : काही कहाण्या सांगितल्या जातात, काही जगल्या जातात, तर काही इतिहासाच्या पानांवर आपली अमिट छाप उमटवून दंतकथा बनतात! अशीच एका असामान्य कलावंताची प्रेरणादायी कहाणी घेऊन आले आहेत मैडॉक फिल्म्स आणि कठपुतली क्रिएशन्स. श्रद्धा कपूर अभिनीत ‘ईठा’चा भव्य ट्रेलर प्रदर्शित झाला असून, या चित्रपटात श्रद्धा कपूर महान लावणी कलावंत ईठा बाईंच्या भूमिकेत झळकणार आहे. लावणीच्या समृद्ध परंपरेतील एका दिग्गज कलाकाराच्या आयुष्यापासून प्रेरित असलेला हा संगीतमय चित्रपट एका अशा स्त्रीचा प्रवास उलगडतो, जिने समाजाच्या रूढींना आव्हान दिले, प्रत्येक अडचणीचा धैर्याने सामना केला आणि आपल्या कलेच्या जोरावर इतिहासात अढळ स्थान निर्माण केले.
ट्रेलरमध्ये ईठा बाईंच्या रंगतदार आणि भारदस्त जगाची झलक पाहायला मिळते. इथे महत्त्वाकांक्षेची संघर्षाशी टक्कर होते, आवडीतून ताकद निर्माण होते आणि प्रत्येक कलाविष्कारातून धैर्याची नवी कहाणी समोर येते. लक्षवेधी दृश्ये, मनाला भिडणारे संगीत आणि भावनांचा जबरदस्त आविष्कार यामुळे ‘ईठा’ हा चित्रपट प्रेक्षकांना मोठ्या पडद्यावर एक भव्य सिनेमॅटिक अनुभव देण्याचे आश्वासन देतो. श्रद्धा कपूर आपल्या आजवरच्या सर्वात वेगळ्या भूमिकांपैकी एका भूमिकेत दिसणार असल्याने या चित्रपटाबद्दलची उत्सुकता आणखी वाढली आहे.
चित्रपटाबद्दल बोलताना मैडॉक फिल्म्सचे निर्माते दिनेश विजान म्हणाले, “चित्रपटसृष्टीतील सर्वात रोमांचक गोष्ट म्हणजे कधीकधी अशी एखादी असामान्य कहाणी समोर येते की, जगाला तिच्याबद्दल आधीपासून माहिती का नाही, असा प्रश्न पडतो. माझ्यासाठी ईठा ही अशीच एक कहाणी आहे. मी पहिल्यांदा या कहाणीबद्दल ऐकले, तेव्हा लावणीचे अद्भुत जग, त्यातील संगीत, ताल, ऊर्जा आणि भारदस्त व्यक्तिमत्त्वे यांनी मला आकर्षित केलेच; पण या कलाप्रकाराला जिवंत ठेवणाऱ्या असामान्य महिलांच्या आयुष्यानेही मला तितकेच प्रभावित केले.
पुण्यात बंद कारमध्ये तरुणाचा मृतदेह आढळल्याने खळबळ, सारसबाग परिसरात दोन दिवसांपासून उभी होती कार
आपण पिढ्यान् पिढ्या त्यांच्या कलाविष्काराचा गौरव करत आलो आहोत. मात्र, त्यांच्या आयुष्याचा प्रवास समजून घेण्यासाठी आपण किती वेळा थांबलो आहोत? या महिलांचे धैर्य, त्याग, संघर्ष आणि अफाट ताकद ही त्यांच्या कलेइतकीच असामान्य आहे. संस्कृती, भावना आणि प्रभावी मानवी कहाण्यांनी समृद्ध असलेले हे जग हिंदी चित्रपटसृष्टीत आजवर फारसे उलगडले गेले नाही, याचे मला आश्चर्य वाटले. या जगाला आणि ते घडवणाऱ्या व्यक्तींना मोठ्या पडद्यावर आणण्याची ही एक उत्तम संधी होती.
आपण त्यांच्या कलेवर भरभरून प्रेम केले आहे. कदाचित आता त्यांच्या कहाण्यांनाही तितकेच प्रेम देण्याची वेळ आली आहे. माझ्यासाठी ईठाचा अर्थ हाच आहे. हा केवळ सत्य घटनांपासून प्रेरित चित्रपट नाही, तर एका असामान्य कलाप्रकाराचा आणि अशा उल्लेखनीय महिलांच्या आयुष्याचा गौरव आहे, ज्यांच्या कहाण्या जगासमोर यायला हव्यात, ऐकल्या जायला हव्यात आणि कायम स्मरणात राहायला हव्यात.”
ईठा बाईंची भूमिका साकारणारी श्रद्धा कपूर म्हणाली, “ही एका अशा स्त्रीची कहाणी आहे, जिची कला, धैर्य आणि स्वतंत्र व्यक्तिमत्त्व तिला कायम स्मरणात ठेवण्यासारखे बनवते. लक्ष्मण सरांनी मला या व्यक्तिरेखेबद्दल जितके सांगितले, तितकीच मी तिच्या जगाशी जोडली गेले. ही भूमिका साकारणे माझ्यासाठी खूप रोमांचक अनुभव ठरला आहे. प्रेक्षकांनी मोठ्या पडद्यावर तिचा प्रवास अनुभवावा, यासाठी मी खूप उत्सुक आहे. ‘स्त्री’ आणि ‘स्त्री 2’मधून आम्ही जी जादू निर्माण केली, त्यानंतर मैडॉक फिल्म्ससोबत पुन्हा काम करणे हा माझ्यासाठी एक खास पुनर्मिलनाचा क्षण आहे. संपूर्ण टीमने या चित्रपटासाठी प्रचंड मेहनत घेतली आहे. प्रेक्षकांना ईठाचे जग दाखवण्यासाठी मी आता आणखी वाट पाहू शकत नाही.”
ब्रेकिंग-1 नोव्हेंबरला दिल्ली जाम होणार? राहुल गांधींची आंदोलनाची घोषणा!
दिग्दर्शक लक्ष्मण उतेकर म्हणाले, “‘छावा’च्या ब्लॉकबस्टर यशानंतर, ज्याने एक भव्य सिनेमॅटिक अनुभव दिला, मला ‘ईठा’च्या माध्यमातून प्रेक्षकांना एका पूर्णपणे वेगळ्या जगात घेऊन जायचे होते. दोन्ही चित्रपटांची पार्श्वभूमी वेगळी असली, तरी त्यांच्या केंद्रस्थानी असलेल्या व्यक्तिरेखांची असामान्य ताकद हा समान धागा आहे. ‘ईठा’ ही एका अशा कलावंताची कहाणी आहे, जी स्वतः एक वारसा बनली. या चित्रपटातून प्रामाणिकपणा, भावना आणि भव्यता यांचा सुंदर मेळ साधण्याचा आम्ही प्रयत्न केला आहे, जेणेकरून प्रेक्षक या सिनेमॅटिक अनुभवात पूर्णपणे रमून जातील.”
कठपुतली क्रिएशन्सच्या निर्मात्या करिश्मा शर्मा म्हणाल्या, “भारत हा असामान्य कहाण्या, समृद्ध सांस्कृतिक परंपरा आणि मोठ्या पडद्यावर साजरा करण्यासारख्या व्यक्तिमत्त्वांचा खजिना आहे. आमच्यासाठी सर्वात रोमांचक कहाण्या त्या आहेत, ज्यांची मुळे आपल्या मातीशी घट्ट जोडलेली आहेत; पण ज्यांच्यात जगभरातील प्रेक्षकांचे मनोरंजन करण्याची आणि त्यांच्या मनाला भिडण्याची ताकद आहे. ‘ईठा’ याच भावनेचे प्रतिनिधित्व करतो. आपल्या सांस्कृतिक वारशातून आलेली ही एक विलक्षण कहाणी संगीत, नाट्य, भावना आणि भव्यतेच्या माध्यमातून मांडण्यात आली आहे. प्रेक्षकांना एक असे जग अनुभवायला मिळेल, जे अस्सल भारतीय आहे, पण त्यातील भावना सार्वत्रिक आहेत.”
‘स्त्री’ आणि ‘स्त्री 2’मधून प्रेक्षकांना रोमांचित करणारी श्रद्धा कपूर आणि ‘छावा’च्या ब्लॉकबस्टर यशानंतर एका वेगळ्याच विश्वात घेऊन जाणारे दिग्दर्शक लक्ष्मण उतेकर यांची ही नवी कलाकृती प्रेक्षकांसाठी खास ठरणार आहे. दिग्दर्शनाची धुरा लक्ष्मण उतेकर यांनी सांभाळली असून, दिनेश विजान आणि लक्ष्मण उतेकर यांनी चित्रपटाची निर्मिती केली आहे. मैडॉक फिल्म्स आणि कठपुतली क्रिएशन्स प्रस्तुत ‘ईठा’ हा चित्रपट 4 डिसेंबर 2026 रोजी चित्रपटगृहांत प्रदर्शित होणार आहे.