Ramayana Movie : प्राइम फोकस स्टुडिओजने निर्माता नमित मल्होत्रा यांच्या बहुप्रतीक्षित ‘रामायण’ चित्रपटाच्या भारताबाहेरील जागतिक वितरणाची जबाबदारी आता सोनी पिक्चर्स सांभाळणार असल्याची घोषणा केली आहे. जगातील सर्वात प्राचीन आणि प्रभावशाली महाकाव्यांपैकी एक असलेल्या रामायणावर आधारित हा भव्य सिनेमॅटिक अनुभव प्रेक्षकांसमोर सादर केला जाणार आहे.
या फँटसी अॅक्शन-अॅडव्हेंचर चित्रपटाची निर्मिती प्राइम फोकस स्टुडिओजचे संस्थापक आणि आठ वेळा ऑस्कर विजेत्या व्हिज्युअल इफेक्ट्स कंपनी DNEG चे ग्लोबल CEO नमित मल्होत्रा यांनी केली आहे. या चित्रपटात रणबीर कपूर, यश आणि साई पल्लवी प्रमुख भूमिकांमध्ये झळकणार आहेत. दिग्दर्शन नितेश तिवारी यांनी केले असून संगीत ऑस्कर विजेते हान्स झिमर आणि ए. आर. रहमान यांनी दिले आहे. ‘रामायण’ हा चित्रपट सुरुवातीपासूनच जागतिक प्रेक्षकांना लक्षात घेऊन तयार करण्यात आला आहे. हा चित्रपट अनेक भाषांमध्ये प्रदर्शित होणार असून त्यामध्ये विशेष इंग्रजी आवृत्तीचाही समावेश असेल.
जगभरातील कोट्यवधी लोकांसाठी रामायण हे केवळ एक महाकाव्य किंवा धार्मिक ग्रंथ नसून, पिढ्यान्पिढ्या जपली गेलेली एक जिवंत सांस्कृतिक परंपरा आहे. हजारो वर्षांपासून कर्तव्य, धैर्य, करुणा, त्याग आणि धर्म या मूल्यांद्वारे या महाकाव्याने लोकांना प्रेरित केले आहे. आता प्रथमच ही कालातीत कथा इतक्या भव्य स्वरूपात जागतिक प्रेक्षकांसमोर सादर केली जाणार आहे.
दिग्दर्शक नितेश तिवारी यांच्या या चित्रपटासाठी जागतिक दर्जाची निर्मिती टीम एकत्र आली आहे. चित्रपटाचे संगीत हान्स झिमर आणि ए. आर. रहमान यांनी दिले आहे. अॅक्शनची जबाबदारी टेरी नोटरी आणि गाय नॉरिस यांनी सांभाळली आहे, तर प्रॉडक्शन डिझाइन रामसे एव्हरी आणि रवी बन्सल यांनी केले आहे. याशिवाय जगभरातील हजारो कलाकार आणि तांत्रिक तज्ज्ञांनी या चित्रपटासाठी योगदान दिले आहे. या चित्रपटाची निर्मिती नमित मल्होत्रा यांनी प्राइम फोकस स्टुडिओजच्या बॅनरखाली केली आहे. त्यांच्या नेतृत्वाखाली DNEG ने Dune, Dune: Part Two, Blade Runner 2049, Interstellar, Inception, Ex Machina, First Man आणि Tenet यांसारख्या जागतिक गाजलेल्या चित्रपटांसाठी उत्कृष्ट व्हिज्युअल इफेक्ट्स देत आंतरराष्ट्रीय स्तरावर विशेष ओळख निर्माण केली आहे. सध्या ही कंपनी Dune: Part Three आणि ख्रिस्तोफर नोलन यांच्या The Odyssey या चित्रपटांवरही काम करत आहे.
धर्मेंद्र प्रधान राजीनामा देणार का? उपोषणानंतर सोनम वांगचुक स्पष्टच म्हणाले
नमित मल्होत्रा म्हणाले, “पिढ्यान्पिढ्या रामायण आपल्या मानवी मूल्यांमुळे आणि प्रेरणादायी संदेशामुळे लोकांना प्रेरित करत आले आहे. या अमूल्य वारशाचा सन्मान राखत तो जगभरातील प्रेक्षकांसाठी एका भव्य सिनेमॅटिक अनुभवाच्या रूपात सादर करण्याचा आमचा नेहमीच प्रयत्न राहिला आहे. DNEG च्या माध्यमातून आम्ही अनेक दशकांपासून जगातील आघाडीच्या चित्रपट निर्मात्यांची स्वप्ने साकार करण्यात योगदान दिले आहे. आता प्राइम फोकस स्टुडिओजच्या माध्यमातून त्याच समर्पणाने जगातील महान महाकाव्यांपैकी एक असलेल्या रामायणाला मोठ्या पडद्यावर आणत आहोत. सोनी पिक्चर्ससोबतची ही भागीदारी आम्हाला हे कालातीत कथा जगभरातील प्रेक्षकांपर्यंत पोहोचवण्याची मोठी संधी देत आहे.”