Turkey Earthquake : तुर्कीमध्ये 6.2 इतक्या भीषण तीव्रतेचा भूकंप झाल्याचे वृत्त समोर आले आहे. या घटनेत नेमकं किती नुकसान किंवा जिवीतहानी झाली आहे याबद्दल अद्याप कोणतीही अधिकृत माहिती समोर आलेली नाही. भूकंपाचे परिणाम बल्गेरिया, ग्रीस आणि रोमानियापर्यंत जाणवले. मोठे नुकसान झाले नसले तरी काही इमारतींना भेगा पडल्या. बचाव पथके सतर्क आहेत.
याबाबत माहिती देताना तुर्कीच्या (Turkey Earthquake) गृहमंत्र्यांनी सांगितले की, भूकंपाचे धक्के केवळ इस्तंबूलमध्येच नव्हे तर आसपासच्या प्रांतांमध्येही जाणवले. तुर्कीच्या आपत्ती एजन्सीने सलग तीन भूकंपांची नोंद केली आहे. हे सर्व भूकंपाचे धक्के इस्तंबूलच्या बुयुकचेकमेस जिल्ह्यात झाले असल्याची माहिती देखील समोर आली आहे. भूकंपाच्या भीतीमुळे इस्तंबूलमध्ये लोक घराबाहेर पडले आहेत. अद्याप कोणत्याही जीवितहानीबद्दल माहिती नाही. लोक म्हणतात की इस्तंबूलमध्ये इतके तीव्र भूकंपाचे धक्के कधीच जाणवले नव्हते. दोन वर्षांपूर्वीही फेब्रुवारी महिन्यात तुर्कीला मोठा भूकंप झाला होता ज्यात तुर्की आणि सीरियामधील हजारो लोक मृत्युमुखी पडले होते.
तुर्कीच्या आपत्ती व्यवस्थापन प्रेसीडेंसीनुसार, पहिला भूकंप स्थानिक वेळेनुसार दुपारी 12.15 वाजता 3.9 तीव्रतेचा नोंदवला गेला. तर दुसरा भूकंप 6.2 तीव्रतेचा होता. तिसरा भूकंप, 4.4 रिश्टर स्केलचा, इस्तंबूलच्या बुयुकचेकमेस जिल्ह्यात स्थानिक वेळेनुसार 12:51 वाजता नोंदवण्यात आला. भूकंपानंतर नुकसान होऊ शकणाऱ्या इमारतींमध्ये प्रवेश करू नका असा इशारा इस्तंबूलचे अधिकारी देत आहेत. अत्यंत आवश्यक नसल्यास वाहन चालवणे किंवा फोन वापरणे टाळण्याचा सल्ला त्यांनी लोकांना दिला.
तुर्कीचे गृहमंत्री अली येरलिकाया यांनी सांगितले की, आपत्ती आणि आपत्कालीन व्यवस्थापन पथके भूकंपाच्या परिणामाचे मूल्यांकन करण्यास सुरुवात करत आहेत.
रायफल हिसकावण्याचा प्रयत्न अन्…, सय्यद हुसेन शाह पर्यटकांना वाचवण्यासाठी दहशतवाद्यांशी भिडला
भूकंप का झाला?
तुर्कीच्या भूकंपशास्त्रीय केंद्राने भूमध्यसागरीय प्रदेशात प्लेट हालचालीमुळे भूकंप झाल्याची पुष्टी केली आहे. विशेष म्हणजे भूकंपाची खोली अपेक्षेपेक्षा कमी होती, ज्यामुळे त्याचा परिणाम मोठ्या भागात जाणवला. ग्रीस आणि बल्गेरियातील काही शहरांमध्येही हलके भूकंपाचे धक्के जाणवले, तर रोमानियाच्या काही भागात लोकांनी फर्निचर हादरल्याची देखील माहिती समोर आली आहे.
