Russia ukraine war indian billionaire lakshmi mittal steel plant in Kyiv hit by Moscow missile : रशिया आणि युक्रेनमधील युद्धाची तीव्रता दिवसेंदिवस वाढत आहे. रविवारी रशियाने युक्रेनच्या विविध भागांवर केलेल्या क्षेपणास्त्र आणि ड्रोन हल्ल्यांमध्ये मोठी जीवितहानी झाली. या हल्ल्याचा फटका भारतीय उद्योगपती लक्ष्मी मित्तल यांच्या मालकीच्या आर्सेलरमित्तल क्रिव्ही रिह या युक्रेनमधील सर्वात मोठ्या पोलाद उत्पादक कंपनीलाही बसला. कंपनीच्या एका प्रकल्पावर झालेल्या क्षेपणास्त्र हल्ल्यात दोन जणांचा मृत्यू झाला असून १४ जण जखमी झाले आहेत.
लक्ष्मी मित्तल यांच्या कंपनीच्या प्रकल्पावर क्षेपणास्त्र हल्ला
रविवार, १६ ऑगस्ट रोजी मध्य युक्रेनमधील क्रिव्ही रिह शहरातील आर्सेलरमित्तल क्रिव्ही रिह या खाण आणि पोलाद निर्मिती प्रकल्पाला रशियन क्षेपणास्त्राने लक्ष्य केले. हल्ल्यानंतर कंपनीला आपले काही कामकाज तात्पुरते बंद करावे लागले. आर्सेलरमित्तल क्रिव्ही रिह ही जगातील दुसऱ्या क्रमांकाची पोलाद उत्पादक कंपनी असलेल्या आर्सेलरमित्तलची युक्रेनमधील प्रमुख शाखा आहे. भारतीय उद्योगपती लक्ष्मी मित्तल यांच्या नेतृत्वाखालील समूहाची या कंपनीवर मालकी आहे. कंपनीनेही आपल्या एका औद्योगिक ठिकाणाला रशियन क्षेपणास्त्र हल्ल्याचा फटका बसल्याची पुष्टी केली आहे. या हल्ल्यात कंपनीचे कर्मचारी आणि कंत्राटी कामगार जखमी झाल्याचे सांगण्यात आले.
युक्रेनच्या इतर भागांनाही फटका
रशियाच्या हल्ल्यांमध्ये युक्रेनमधील अनेक भागांचे मोठे नुकसान झाले. दक्षिणेकडील झापोरिझ्झिया भागात एका घरावर हल्ला झाल्यानंतर एक महिला आणि एका पुरुषाचा मृत्यू झाला. राजधानी कीव्हमध्येही रशियन हल्ल्यांमुळे अनेक ठिकाणी आग लागली. येथे सहा जण जखमी झाले. शहरातील पोचायना स्थानकाजवळील मोठ्या पुस्तक बाजारालाही या हल्ल्याचा फटका बसला. बाजारातील अनेक दुकानांना आग लागली आणि आकाशात काळ्या धुराचे मोठे लोट दिसून आले. युक्रेनचे राष्ट्राध्यक्ष व्होलोदिमिर झेलेन्स्की यांनी रशियावर नागरी पायाभूत सुविधांना लक्ष्य केल्याचा आरोप केला. त्यांच्या म्हणण्यानुसार, रशियाकडे ज्या ठिकाणी लांब पल्ल्याच्या क्षेपणास्त्रांनी पोहोचण्याची क्षमता आहे, त्या ठिकाणी हल्ले केले जात आहेत.
लष्करी ठिकाणांना लक्ष्य केल्याचा रशियाचा दावा
दरम्यान, रशियाच्या संरक्षण मंत्रालयाने नागरी ठिकाणांना लक्ष्य केल्याचा आरोप फेटाळून लावला आहे. क्रिव्ही रिह येथील पोलाद प्रकल्पासह कीव्हमधील काही लष्करी-औद्योगिक ठिकाणांवर हल्ले केल्याचे रशियाने म्हटले आहे. यामध्ये युक्रेनच्या ‘फ्लेमिंगो’ या लांब पल्ल्याच्या क्षेपणास्त्रांच्या निर्मितीशी संबंधित ठिकाणाचाही समावेश असल्याचा रशियाचा दावा आहे.
युक्रेनकडूनही रशियावर मोठा ड्रोन हल्ला
एकीकडे रशियाने युक्रेनवर हल्ले केले असतानाच युक्रेननेही रविवारी रशियावर आतापर्यंतच्या सर्वात मोठ्या हवाई हल्ल्यांपैकी एक केला. युक्रेनने रशियाच्या विविध भागांमध्ये शेकडो मानवरहित विमानांच्या माध्यमातून हल्ले केल्याचे वृत्त आहे. रशियाच्या संरक्षण मंत्रालयाने रात्रीच्या हल्ल्यात ८२२ युक्रेनियन ड्रोन नष्ट केल्याचा दावा केला आहे. यातील शेकडो ड्रोन मॉस्कोच्या दिशेने येत होते, असे रशियाचे म्हणणे आहे. मॉस्कोचे महापौर सर्गेई सोब्यानिन यांनी राजधानीजवळ सुमारे ६०० ड्रोन आढळल्याचा दावा केला. मॉस्को परिसरात एका घरावर युक्रेनियन ड्रोन आदळल्याने ८३ वर्षीय व्यक्तीचा मृत्यू झाला. तर पोडॉल्स्क येथील एका मोठ्या गोदामालाही ड्रोन हल्ल्यामुळे आग लागली.
युद्धाची तीव्रता वाढली
गेल्या काही दिवसांत दोन्ही देशांकडून लांब पल्ल्याची क्षेपणास्त्रे आणि ड्रोनच्या माध्यमातून होणाऱ्या हल्ल्यांमध्ये मोठी वाढ झाली आहे. युक्रेनकडून रशियातील लष्करी आणि ऊर्जा केंद्रांना लक्ष्य केले जात असताना रशियाकडून युक्रेनच्या औद्योगिक आणि पायाभूत सुविधांवर मोठे हल्ले केले जात आहेत. युक्रेनने अलीकडेच रशियाच्या समारा भागातील रॉकेट संशोधन आणि निर्मिती केंद्रावर ‘फ्लेमिंगो’ क्षेपणास्त्रांच्या मदतीने हल्ला केल्याचा दावा केला होता. हे ठिकाण युक्रेनच्या सीमारेषेपासून सुमारे ९०० किलोमीटर अंतरावर आहे. त्यामुळे युद्ध आता केवळ सीमावर्ती भागापुरते मर्यादित न राहता दोन्ही देशांच्या अंतर्गत भागांपर्यंत पोहोचल्याचे चित्र आहे.