Manoj Jarange launches a scathing attack on the government : मराठा आरक्षणाच्या मागणीसाठी मनोज जरांगे पाटील यांच्या आंदोलनाचा आज दुसरा दिवस आहे. आंदोलनाच्या दुसऱ्या दिवशी माध्यमांशी संवाद साधताना जरांगे पाटील यांनी आपली पुढील भूमिका स्पष्ट करत राज्य सरकारवर सडकून टीका केली. आता मैदानात उतरून आरपारची लढाई लढणार असल्याचा निर्धार त्यांनी यावेळी व्यक्त केला. तसेच मराठा समाजावर आणखी किती दिवस अन्याय करणार, असा सवाल उपस्थित करत केवळ चर्चा करून कोणताही फायदा होणार नसल्याचे त्यांनी म्हटले.
मैदानात उतरलोय, आता आरपारची लढाई
माध्यमांशी बोलताना मनोज जरांगे पाटील यांनी आंदोलनाबाबत आक्रमक भूमिका मांडली. मी मैदानात उतरून लढतोय. आता मैदानात उतरलो आहे आणि ही आरपारची लढाई आहे, असे त्यांनी स्पष्ट केले. मराठा समाजाच्या मागण्यांवर ठोस निर्णय होणे आवश्यक असून केवळ चर्चांच्या फेऱ्यांमधून प्रश्न सुटणार नसल्याचेही त्यांनी म्हटले.
किती दिवस मराठा समाजावर अन्याय करणार? नुसत्या चर्चा करून काही फायदा नाही. या सरकारला तोडगा काढायचा नाही, अशा शब्दांत जरांगे पाटील यांनी सरकारच्या भूमिकेवर नाराजी व्यक्त केली. आता कोणाकडूनही अपेक्षा ठेवायची नाही आणि समाजाच्या न्याय्य मागण्यांसाठी संघर्ष सुरूच ठेवायचा, अशी भूमिकाही त्यांनी मांडली.
एकनाथ शिंदे आणि संजय जाधव यांच्यावर टीका
यावेळी मनोज जरांगे पाटील यांनी एकनाथ शिंदे आणि संजय जाधव यांच्यावरही घणाघाती टीका केली. मराठा समाजाला देण्यात आलेल्या प्रमाणपत्रांच्या मुद्द्यावरून त्यांनी तीव्र शब्दांत नाराजी व्यक्त केली. मराठ्यांची प्रमाणपत्रे रद्द करून मराठा समाजावर अन्याय करण्याचा प्रयत्न केला जात असल्याचा आरोप त्यांनी केला. याच मुद्द्यावर बोलताना त्यांनी एकनाथ शिंदे आणि जाधव यांच्यावर निशाणा साधला.
‘भारतात एकही मुस्लीम नको’ असे हिंदूला वाटत असेल तर तो हिंदू नाही; मोहन भागवतांचं मोठं वक्तव्य
मराठ्यांचे प्रमाणपत्र रद्द करून मराठ्यांच्या उरावर नाचण्याचं काम केलं जात आहे, अशा शब्दांत त्यांनी संताप व्यक्त केला. मराठा समाजाच्या हक्कांशी तडजोड केली जाणार नाही आणि समाजाच्या मागण्या पूर्ण होईपर्यंत संघर्षाची भूमिका कायम राहणार असल्याचे त्यांनी स्पष्ट केले.
मुंबईतील आंदोलनासाठी परवानगीचा अर्ज
दरम्यान, मुंबईत आंदोलन करण्याच्या भूमिकेवरही जरांगे पाटील ठाम असल्याचे दिसून आले. मुंबईतील आंदोलनाच्या परवानगीसाठी यापूर्वीच अर्ज देण्यात आला असल्याची माहिती त्यांनी माध्यमांशी बोलताना दिली. त्यामुळे आगामी काळात आंदोलनाची दिशा मुंबईकडे वळणार का, याकडे आता सर्वांचे लक्ष लागले आहे.
एकीकडे आंदोलनाचा दुसरा दिवस सुरू असताना दुसरीकडे जरांगे पाटील यांनी सरकारविरोधातील आपली भूमिका आणखी आक्रमक केली आहे. चर्चा नको तर मराठा समाजाच्या मागण्यांवर ठोस तोडगा हवा, अशी भूमिका त्यांनी मांडली आहे. त्यामुळे सरकार या आंदोलनाची आणि जरांगे पाटील यांच्या मागण्यांची कशा पद्धतीने दखल घेते, हे पाहणे महत्त्वाचे ठरणार आहे.