Nature Of iPhone Users : हातात आयफोन, सोशल मीडियावर आकर्षक फोटो आणि प्रत्येक नव्या मॉडेलची उत्सुकता. आजच्या काळात आयफोन हा केवळ फोन राहिलेला नाही, तर अनेकांसाठी स्टेटस, आवड आणि स्वतःची ओळख दाखवण्याचं एक साधन बनला आहे. मात्र, आयफोन वापरणारी व्यक्ती म्हणजे श्रीमंत, हौशी किंवा स्वतःचं वेगळं स्थान जपणारीच असते का? एखाद्या व्यक्तीच्या हातात असलेल्या फोनवरून तिच्या स्वभावाचा अंदाज बांधता येतो का? आणि सगळ्या महत्वाचं म्हणजे आयफोन वापरणाऱ्यांचा स्वभाव कसा असतो? त्याबद्दल जाणून घेऊया…
मानसशास्त्र आणि ग्राहकांच्या वर्तनाचा अभ्यास या प्रश्नाकडे वेगळ्या नजरेने पाहतो. आपण कोणता फोन निवडतो, त्यासाठी किती पैसे खर्च करतो आणि तो इतरांना दाखवण्याची किती इच्छा असते, या गोष्टींमागे तंत्रज्ञानाची आवड, ब्रँडविषयीची धारणा, सामाजिक प्रतिष्ठा आणि वैयक्तिक पसंती अशी अनेक कारणं असू शकतात. मात्र, केवळ आयफोन वापरतो म्हणून एखादी व्यक्ती अहंकारी, श्रीमंत किंवा दिखाऊ आहे, असा निष्कर्ष काढता येत नाही.
आयफोन वापरणाऱ्यांच्या स्वभावाबाबत संशोधन काय सांगतं?
1. स्वतःची वेगळी ओळख जपण्याची इच्छा : काही ग्राहकांना इतरांपेक्षा वेगळं दिसणं आणि स्वतःची स्वतंत्र ओळख निर्माण करणं महत्त्वाचं वाटतं. 2021 मध्ये Journal of Consumer Behaviour मध्ये प्रसिद्ध झालेल्या एका संशोधनात चीनमधील आयफोन खरेदीच्या निर्णयाचा अभ्यास करण्यात आला. त्यात सामाजिक तुलना, वेगळेपणाची इच्छा आणि उत्पादनाच्या गुणवत्तेबाबतची जागरूकता या घटकांचा आयफोन खरेदी करण्याच्या इच्छेशी संबंध आढळला.
2. स्टेटस दाखवण्याची इच्छा असू शकते : काही लोकांसाठी आयफोन हे केवळ तंत्रज्ञानाचं साधन नसून सामाजिक प्रतिष्ठेचं प्रतीकही असू शकतं. 2016 मध्ये प्रसिद्ध झालेल्या एका संशोधनात आयफोन वापरणाऱ्यांना त्यांच्या फोनकडे इतर लोक कसं पाहतात, याची तुलनेने अधिक काळजी असण्याचा संबंध आढळला. मात्र, याचा अर्थ प्रत्येक आयफोन वापरकर्ता स्टेटससाठीच फोन घेतो, असा होत नाही.
3. महागड्या ब्रँडपेक्षा गुणवत्तेला प्राधान्य : काही जण आयफोनचा कॅमेरा, ऑपरेटिंग सिस्टीम, सुरक्षितता, इतर उपकरणांशी असलेली सुसंगतता किंवा वापरण्याची सवय यामुळे तो निवडतात. त्यामुळे आयफोन खरेदी करण्यामागे केवळ प्रतिष्ठेची भावना नसून तांत्रिक आवड आणि वैयक्तिक सोयही असू शकते.
4. आयफोन वापरणारे अधिक अहंकारी असतात का? : याचं उत्तर सरसकट ‘हो’ असं देता येत नाही. 2017 मध्ये PLOS ONE या संशोधन नियतकालिकात प्रसिद्ध झालेल्या दोन अभ्यासांमध्ये iPhone आणि Android वापरणाऱ्यांच्या व्यक्तिमत्त्वाची तुलना करण्यात आली. व्यक्तिमत्त्वातील बहुतांश फरक अत्यंत कमी असल्याचं आणि सामाजिक-लोकसंख्याशास्त्रीय घटकांचा विचार केल्यानंतर अनेक फरक नगण्य ठरत असल्याचं संशोधकांना आढळलं.
मग आयफोन वापरणाऱ्यांचा स्वभाव नेमका कसा असतो? असा प्रश्न तुम्हाला पडला असेल तर, आयफोन वापरणाऱ्या व्यक्तीला तंत्रज्ञानाची आवड असू शकते, तिला ब्रँडची प्रतिष्ठा महत्त्वाची वाटू शकते किंवा तिला विशिष्ट सुविधांसाठी हा फोन योग्य वाटत असू शकतो. काही जणांसाठी तो स्टेटस सिम्बॉल असतो, तर काहींसाठी तो रोजच्या वापरातील सोयीचा पर्याय असू शकतो. त्यामुळे फोनवरून व्यक्तिमत्त्व ठरवण्यापेक्षा तो फोन निवडण्यामागचं कारण समजून घेणं अधिक योग्य ठरतं. कारण, शेवटी, व्यक्तीचा स्वभाव तिच्या फोनच्या ब्रँडपेक्षा तिचं वागणं, निर्णय, नाती आणि इतरांशी ती कशी वागते, यावरून अधिक चांगल्या प्रकारे समजतो.
डिस्क्लेमर : वरील विश्लेषण सामान्य माहितीवर आधारित आहे. यातून कोणत्याही व्यक्तीला दुखावण्याचा लेट्सअप मराठीचा मानस नाही.