WhatsApp आपल्या अब्जावधी वापरकर्त्यांसाठी आणखी एक महत्त्वाचं प्रायव्हसी फीचर घेऊन येत आहे. आता कोणाशीही संवाद साधण्यासाठी मोबाईल नंबर शेअर करण्याची गरज भासणार नाही. कारण WhatsApp ने ‘Username’ फीचर जाहीर केलं असून, याच्या माध्यमातून वापरकर्ते आपल्या युजरनेमद्वारे इतरांशी संपर्क साधू शकतील. कंपनीने या फीचरची घोषणा केली असून, युजरनेम आरक्षित (Reserve) करण्याची सुविधा सुरू झाली आहे. हे फीचर 2026 च्या अखेरीपर्यंत टप्प्याटप्प्याने सर्व वापरकर्त्यांसाठी उपलब्ध होणार आहे.
मोबाईल नंबरऐवजी आता Username
सध्या WhatsApp वर चॅट किंवा कॉल करण्यासाठी समोरच्या व्यक्तीचा मोबाईल नंबर आवश्यक असतो. मात्र नवीन फीचरमुळे तुमची ओळख मोबाईल नंबरऐवजी Username वरून होईल. त्यामुळे पहिल्यांदाच संपर्क करणाऱ्या व्यक्तीला तुमचा मोबाईल नंबर दिसणार नाही. यामुळे वापरकर्त्यांची गोपनीयता (Privacy) अधिक सुरक्षित राहणार आहे.
your phone number is personal and sometimes you want to connect without handing it over. that's why we're introducing usernames for WhatsApp.
starting this week, you can reserve a username to use later this year when we launch the feature. It takes just a few seconds, make sure…
— WhatsApp (@WhatsApp) June 29, 2026
आताच Username का बुक करावा?
WhatsApp चे जगभरात 3 अब्जांहून अधिक वापरकर्ते आहेत. त्यामुळे अनेकांना एकाच नावाचा Username हवा असण्याची शक्यता आहे. ही अडचण टाळण्यासाठी कंपनीने आधीच Username आरक्षित करण्याची सुविधा सुरू केली आहे. तसेच प्रसिद्ध व्यक्तींचे Username वेगळे राखून ठेवण्यात येणार आहेत, जेणेकरून त्यांचा गैरवापर होणार नाही.
Username कसा बुक कराल?
- WhatsApp चे लेटेस्ट व्हर्जन अपडेट करा.
- Settings मध्ये जा.
- Account पर्याय निवडा.
- Username वर टॅप करा.
- इच्छित Username टाका.
- तो उपलब्ध आहे की नाही, याची माहिती WhatsApp लगेच दाखवेल.
ही सुविधा सर्व देशांमध्ये टप्प्याटप्प्याने सुरू केली जाणार असल्याचं कंपनीने स्पष्ट केलं आहे.
प्रायव्हसीसाठी खास व्यवस्था
Instagram प्रमाणे WhatsApp वर Username शोधण्यासाठी सार्वजनिक सर्च लिस्ट उपलब्ध नसेल. त्यामुळे एखाद्याशी संपर्क साधण्यासाठी त्याचा अचूक Username माहित असणं आवश्यक असेल. याशिवाय WhatsApp ‘Username Key’ नावाचा एक पर्यायी सुरक्षा पर्यायही देणार आहे. वापरकर्त्यांना हवं असल्यास फक्त ही Key असलेल्या व्यक्तींनाच मेसेज पाठवण्याची परवानगी देता येईल. तसेच Username कधीही बदलता येईल किंवा हे फीचर बंदही करता येणार आहे.
वापरकर्त्यांसाठी मोठा फायदा
या नव्या फीचरमुळे अनोळखी व्यक्तींशी संवाद साधताना स्वतःचा मोबाईल नंबर उघड करण्याची गरज राहणार नाही. त्यामुळे वैयक्तिक माहिती अधिक सुरक्षित राहण्यास मदत होईल. विशेषतः व्यवसाय, ऑनलाइन व्यवहार किंवा नव्या ओळखी करताना हे फीचर वापरकर्त्यांसाठी अत्यंत उपयुक्त ठरणार आहे.