Nagar Panchayat Election 2025 : राज्यात नगरपरिषद आणि नगरपंचायतीसाठी 2 डिसेंबर रोजी मतदान होणार असून 3 डिसेंबर रोजी निकाल जाहीर करण्यात येणार आहे. मोठ्या प्रतीक्षेनंतर होत असलेल्या निवडणुकीत कोण बाजी मारणार याकडे सर्वांचे लक्ष लागून आहे. तर दुसरीकडे आता एक मोठी बातमी समोर आली आहे. या बातमीनुसार, राज्यातील दोन ठिकाणी उच्च न्यायालयाने निवडणूक कार्यक्रम रद्द करण्याचे आदेश दिले आहे. त्यामुळे आता राज्यातील दोन नगरपरिषदेसाठी 2 डिसेंबर रोजी मतदान होणार नाही. राज्य निवडणूक आयोगाने दिलेल्या माहितीनुसार या दोन ठिकाणी आता 20 डिसेंबर रोजी मतदान होणार असून 23 डिसेंबर रोजी निकाल जाहीर होणार आहे.
राज्य निवडणूक आयोगाने दिलेल्या माहितीनुसार, फलटण (Phaltan) आणि महाबळेश्वर नगरपरिषद (Mahabaleshwar Nagar Parishad) निवडणूक रद्द करुन पुढे ढकलण्यात आली आहे. या दोन्ही ठिकाणी पुन्हा निवडणुकीचे कार्यक्रम घेण्याचे निर्देश उच्च न्यायालयाने (High Court) दिले आहे. त्यामुळे आता या ठिकाणी 20 डिसेंबर रोजी मतदान आणि 23 डिसेंबर रोजी निकाल जाहीर करण्यात येणार आहे.
नेमकं प्रकरण काय?
निवडणूक निर्णय अधिकारी यांनी उमेदवारांना आपला नामनिर्देशित पत्र माघारी घेण्यासाठी आवश्यक कालावधी न देता चिन्ह वाटप केले. या नियमांचा पालन न केल्याने आता उच्च न्यायालयाने फलटण आणि महाबळेश्वर नगरपरिषद निवडणूक रद्द करुन दोन्ही ठिकाणी पुन्हा एकदा नगरपरिषदेचे कार्यक्रम घेण्याचे निर्देश दिले आहेत. उच्च न्यायालायने दिलेल्या निर्देशांनुसार आता फलटण आणि महाबळेश्वर नगरपरिषदेसाठी 4 डिसेंबर रोजी निवडणूक कार्यक्रम जाहीर करण्यात येणार असून नामनिर्देशित पत्र 10 डिसेंबर दुपारी तीन वाजेपर्यंत मागे घेण्याचा अवधी देण्यात येणार असल्याची माहिती राज्य निवडणूक आयोगाने दिली आहे. तर या दोन्ही नगरपरिषदेसाठी 20 डिसेंबर रोजी मतदान होणार आणि 23 डिसेंबर रोजी निकाल जाहीर करण्यात येणार असल्याची माहिती राज्य निवडणूक आयोगाने दिली आहे.
India vs South Africa : आज मैदानावर उतरताच ‘रो-को’ रचणार इतिहास; मोडणार सचिन-द्रविडचा मोठा विक्रम
फलटण नगरपरिषदेसाठी रामराजे नाईक निंबाळकर यांचे पुत्र अनिकेतराजे नाईक निंबाळकर शिवसेनेकडून निवडणुकीच्या रिंगणात उतरले आहे. त्यांना भाजपचे माजी खासदार रणजितसिंह नाईक निंबाळकर यांचे बंधू समशेरसिंह नाईक निंबाळकर लढत देत आहे तर महाबळेश्वरमध्ये राष्ट्रवादी काँग्रेसकडून सुनील शिंदे आणि लोकमित्र जनसेवा आघाडीचे डी.एम. बावळेकर यांच्यात मुख्य लढत पाहायला मिळत आहे.