Gopichand Padalkar On Jitendra Awhad : विधिमंडळाच्या लॉबीमध्ये भाजप आमदार गोपीचंद पडळकर (Gopichand Padalkar) आणि राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड (Jitendra Awhad) यांच्या कार्यकर्त्यांमध्ये बाचाबाचीनंतर हाणामारी झाल्याने एकच खळबळ उडाली असून या प्रकरणात कारवाई करण्यात यावी अशी मागणी विरोधकांकडून होत आहे. तर आता या प्रकरणानंतर भाजप आमदार गोपीचंद पडळकर यांनी दिलगिरी व्यक्त केली आहे. विधानसभेच्या प्रांगणामध्ये जी घटना घडलेली आहे, ती अत्यंत दुर्दैवी असून याचं अतीव दु:ख मला आहे. सगळ्या प्रकाराबद्दल मी दिलगिरी व्यक्त करतो असं माध्यमांशी बोलताना आमदार गोपीचंद पडळकर यांनी म्हटले आहे.
विधानभवन परिसरात घडलेल्या राड्यानंतर आमदार गोपीचंद पडळकर आणि आमदार जितेंद्र आव्हाड यांना महसूलमंत्री चंद्रशेखर बावनकुळे (Chandrashekhar Bawankule) यांनी बोलावून घेत त्यांच्यासोबत एकत्र चर्चा केली. यानंतर आमदार पडळकर यांनी माध्यमांशी बोलताना दिलगिरी व्यक्त केली.
माध्यमांशी बोलताना आमदार पडळकर म्हणाले की, विधानसभेच्या प्रांगणामध्ये जी घटना घडलेली आहे, ती अत्यंत दुर्दैवी असून याचं अतीव दु:ख मला आहे. सगळ्या प्रकाराबद्दल मी दिलगिरी व्यक्त करतो. असं गोपीचंद पडळकर म्हणाले. मात्र याबाबत आमदार पडळकर यांनी याबाबत अधिक बोलणे टाळले, तसेच माझ्या वरिष्ठ नेत्यांसोबत चर्चा केल्यानंतर मी अधिक प्रतिक्रिया देईन असेही यावेळी पडळकर म्हणाले.
तर दुसरीकडे या प्रकरणात माध्यमांशी बोलताना आमदार जितेंद्र आव्हाड यांनी संताप व्यक्त केला आहे. विधानसभेत जर तुम्ही गुंडांना प्रवेश देणार असाल आणि ते हल्ले करणार असतील तर आमचे जीव सुरक्षित नाहीत. मला आई- बहिणीवरुन शिव्या दिल्या आहेत. कुत्रा, डुक्कर अजून काय काय लिहिलं आहे. भाषण करुन बाहेर आलो होतो, मोकळी हवा खाण्यासाठी बाहेर गेलो होते. हे सगळे मलाच मारण्यासाठी आले होते. असं माध्यमांशी बोलताना आमदार जितेंद्र आव्हाड म्हणाले.
नेमकं प्रकरण काय?
राष्ट्रवादी काँग्रेस शरदचंद्र पवार पक्षाचे आमदार जितेंद्र आव्हाड यांनी विधान भवनाच्या परिसरात आमदार गोपीचंद पडळकर यांना मंगळसूत्र चोर म्हणून डिवचले होते. यानंतर बुधवारी पडळकर आणि आव्हाड आमने- सामने आले असता दोन्हीकडून एकमेकांना शिवीगाळ करण्यात आली होती. यानंतर आमदार आव्हाड यांनी मला जिवे मारण्याची धमकी देण्यात आली असल्याचा आरोप केला होता.
विधिमंडळाच्या लॉबीत हाणामारी, कारवाई करा अन् तुरुंगात टाका, सुधीर मुनगंटीवारांची मागणी
तर आता दोन्ही नेत्यांचे कार्यकर्ते विधान भवनाच्या आवारात एकमेकांना भिडले. सध्या या घटनेचा व्हिडिओ व्हायरल झाला असून विरोधकांकडून राज्य सरकारवर जोरदार हल्लाबोल केला आहे.
