Jarange launches a scathing attack on the government : मराठा आरक्षणाच्या प्रश्नावर पुन्हा एकदा आक्रमक भूमिका घेत मराठा आंदोलनाचे नेते मनोज जरांगे पाटील यांनी पश्चिम महाराष्ट्राच्या दौऱ्यापूर्वी तुळजापूर येथे जाऊन आई तुळजाभवानीचे दर्शन घेतले. यावेळी त्यांनी राज्य सरकारवर मराठा समाजावर अन्याय केल्याचा आरोप करत सरकारला सद्बुद्धी देण्याची प्रार्थना देवीकडे केली. दर्शनानंतर प्रसारमाध्यमांशी संवाद साधताना मनोज जरांगे पाटील यांनी मराठा आरक्षण, कुणबी नोंदी आणि जात प्रमाणपत्रांच्या पडताळणी प्रक्रियेवरून राज्य सरकारवर जोरदार टीका केली. सरकारकडून मराठा समाजाची प्रमाणपत्रे रद्द करण्याचे काम सुरू असून त्यामुळे हजारो कुटुंबांवर अन्याय होत असल्याचा आरोप त्यांनी केला.
यावेळी त्यांनी तुळजाभवानीच्या दरबारात मराठा आरक्षणाशी संबंधित काही प्रमाणपत्रे आणि कागदपत्रे दाखवत सरकारच्या कारभाराविरोधात नाराजी व्यक्त केली. अनेक नागरिकांकडे वैध आणि ऐतिहासिक पुरावे असतानाही त्यांची प्रमाणपत्रे रद्द केली जात असल्याचा दावा त्यांनी केला. काही ठिकाणी अधिकारी नागरिकांकडून पैशांची मागणी करत असल्याच्या तक्रारी समोर येत असून, अशा मागण्यांची नोंद लेखी स्वरूपात केली जात असल्याचाही गंभीर आरोप जरांगे पाटील यांनी केला.
सरकारच्या धोरणांवर टीका करताना त्यांनी महसूलमंत्री चंद्रशेखर बावनकुळे यांनी बीड जिल्ह्यातील अधिकाऱ्यांना पाठविल्याचा दावा केलेले पत्र पुन्हा एकदा माध्यमांसमोर दाखवले. या पत्राचा संदर्भ देत प्रशासनावर दबाव टाकण्याचा प्रयत्न होत असल्याचा आरोप त्यांनी केला. मनोज जरांगे पाटील यांनी पुढे आरोप केला की, राज्य सरकार मराठा समाजातील 58 लाख नोंदी रद्द करण्याच्या दिशेने काम करत असून यासाठी समाजामध्ये संभ्रम आणि भीतीचे वातावरण निर्माण केले जात आहे. या प्रक्रियेमुळे मराठा समाजाच्या आरक्षणाशी संबंधित अपेक्षांवर परिणाम होऊ शकतो, अशी भीती त्यांनी व्यक्त केली.
कोणता मुख्यमंत्री जास्त चांगला? प्रश्नावर तुकाराम मुंढेंचे मिश्किल उत्तर; पोस्टिंगबाबतही व्यक्त केली भूमिका
मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी या प्रकरणात तातडीने हस्तक्षेप करून प्रमाणपत्र रद्दीकरणाची प्रक्रिया थांबवावी, अशी मागणीही त्यांनी केली. मराठा समाजाला न्याय देण्याऐवजी त्यांच्यावर अन्याय होत असल्याचा आरोप करत सरकारने आपली भूमिका स्पष्ट करावी, असेही ते म्हणाले. याचवेळी त्यांनी सरकारवर आणखी गंभीर आरोप करत मराठा आंदोलन दडपण्याचा प्रयत्न सुरू असल्याचे म्हटले. आंदोलनकर्त्यांवर कारवाई करण्यासाठी आणि दबाव निर्माण करण्यासाठी विविध प्रकारचे आदेश व पत्रव्यवहार होत असल्याचा दावा त्यांनी केला.
अटक करा, लाठीहल्ला करा अशा स्वरूपाच्या सूचनांचा उल्लेख करत त्यांनी सरकारवर षड्यंत्र रचल्याचा आरोप केला. सरकारमध्ये हिंमत असेल तर थेट चर्चा करावी, लपूनछपून कारवाया करू नयेत, असे आव्हानही मनोज जरांगे पाटील यांनी दिले. मराठा समाजाच्या हक्कांसाठी आंदोलन सुरूच राहील आणि आरक्षणाचा प्रश्न सुटत नाही तोपर्यंत लढा सुरू ठेवला जाईल, असा निर्धार त्यांनी यावेळी व्यक्त केला. दरम्यान, पश्चिम महाराष्ट्र दौऱ्याच्या पार्श्वभूमीवर जरांगे पाटील यांच्या या विधानांमुळे राज्यातील मराठा आरक्षणाच्या प्रश्नावर पुन्हा एकदा राजकीय वातावरण तापण्याची शक्यता व्यक्त केली जात आहे.