आई सोबत घरासमोर झोपलेल्या (Beed) मुलीचे तिच्या आजोळच्या तरुणाने एका पांढऱ्या रंगाच्या कारमधून अपहरण केल्याची घटना केज तालुक्यात घडली आहे. मुलीचे वडील नातेवाईकांच्या लग्नाला बाहेरगावी गेले असताना, रात्री आई, आजी आणि भावासोबत घरासमोर झोपलेल्या एका १७ वर्षीय अल्पवयीन मुलीचे तिच्या आजोळी राहत असलेल्या एका तरुणाने पांढऱ्या रंगाच्या कारमधून अपहरण केले.
त्या अल्पवयीन मुलीला तिच्या आजोळचा तरुण मोबाईलवरून संपर्क साधत होता आणि ती त्याला आवडत असल्याचे म्हणत असल्याची माहिती अल्पवयीन मुलीने तिच्या आईला दिली होती. या प्रकरणी मुलीच्या आईच्या तक्रारीवरून अमोल मिनीनाथ गिराम याच्या विरुद्ध केज पोलीस ठाण्यात अल्पवयीन मुलीच्या अपहरणाचा गुन्हा दाखल करण्यात आला आहे.
अपहरण करण्यात आलेल्या अल्पवयीन मुलीचे वय १७ वर्षे आहे. तिचा रंग-गोरा, उंची अंदाजे ४ फुट ६ इंच, अंगात गुलाबी रंगाचा पंजाबी ड्रेस व गुलाबी रंगाची पॅन्ट आणि पांढऱ्या रंगाची ओढणी, केस काळे व लांब असून ती मराठी भाषा बोलते. अशा वर्णनाची मुलगी कुणाला आढळून आल्यास किंवा तिची माहिती मिळाल्यास तपासी अधिकारी सहाय्यक पोलीस निरीक्षक महेश क्षीरसागर यांच्याशी संपर्क साधण्याचे आवाहन करण्यात आले आहे.