साधुग्रामच्या नावाखाली तपोवन उद्योगपतींच्या घशात घालू नका; मनसे अध्यक्ष राज ठाकरे यांची सरकारवर आगपाखड

Raj Thackrey Speaks On Tapovan Tree Cutting : नाशिकच्या तपोवनमध्ये होणाऱ्या कुंभमेळ्यावरून राज्याचं राजकारण चांगलाच तापल आहे. तपोवनमध्ये कुंभमेळा होणार असल्यानं 1800 झाड तोडण्याचा निर्णय सरकारनं घेतला. स्थानिक नागरिक आणि पर्यावरणप्रेमींनी ही झाडं तोडण्याचा विरोध केला आहे. काल शिवसेना ठाकरे गटाचे प्रमुख उद्धव ठाकरे यांनी घेतलेल्या पत्रकार परिषदेत देखील तपोवनचा मुद्दा मांडला. आता मनसे अध्यक्ष राज ठाकरे (Raj Thackrey) यांनी देखील या झाडं तोडण्याच्या निर्णयाला आपला विरोध असल्याचं स्पष्ट केलं. आपल्या X अकाऊंटच्या पोस्टमधून त्यांनी सरकारवर गंभीर आरोप देखील केले आहेत.

नाशिकमध्ये (Nashik) कुंभमेळा हा काही पहिल्यांदा होत नाहीये. महाराष्ट्र नवनिर्माण सेनेच्या (MNS) महापालिकेच्या सत्ताकाळात पण कुंभमेळा झाला. त्यावेळेला आम्ही भरपूर पायाभूत सुविधा उभारल्या. त्यावेळच्या नगरसेवकांचा आणि प्रशासनाचा उत्तम संवाद होता, त्यामुळे कामं करताना जनतेला काय हवं आहे, याचा विचार केला गेला. एकूणच नियोजन इतकं उत्कृष्ट होतं की तेव्हाच्या महापौरांचा,नगरसेवकांचे प्रतिनिधी म्हणून आणि तत्कालीन आयुक्तांचा, प्रशासनाचे प्रतिनिधी म्हणून, थेट अमेरिकेत (America) सत्कार झाला होता. आम्हाला या पायाभूत सुविधा उभ्या करताना कुठली झाडं तोडावी लागली नाहीत. मग आत्ता या कुंभमेळ्यासाठी झाडं का तोडावी लागत आहेत ? असा सवाल त्यांनी उपस्थित केला.

बरं ही झाडं तोडून त्याची भरपाई म्हणून दुसरीकडे झाडं लावली जातील, असली पोकळ आश्वासनं सरकारने देऊच नयेत. कारण असं कधी होत नाही. आणि सरकारकडे जर दुसरीकडे पाचपट झाडं लावायला जागा आहे तर मग तिकडेच साधुग्राम (Sadhugram) करा. सरकारने साधूंच्या नावाखाली उद्योगपतींच्या घशात काहीतरी टाकण्याचा संधिसाधूपणा करू नये. आणि काही कोटी झाडं लावल्याची घोषणा भाजप सरकारने काही वर्षांपूर्वी केली होती, जी झाडं कुठे दिसली नाहीत. असो.

आज कुंभमेळ्याचं कारण दाखवून झाडं तोडायची, साधूंच्या नावाने ती जमीन सपाट करून घ्यायची आणि मग नंतर पुढे ती आपल्या लाडक्या उद्योगपतीला दान करायची ! इतकाच विचार या सरकारचा असणार ! नाहीतरी सध्या महाराष्ट्रात (Maharashtra) दुसरं काय सुरू आहे ? जमिनी गिळणं नाहीतर उद्योगपतींचे दलाल म्हणून काम करणं. हेच सध्या सत्ताधारी मंत्री, आमदार, त्यांचे नातेवाईक आणि त्यांची वर्तुळं करताना दिसतायत !

नाशिककरांचा या वृक्षतोडीला (Tree Cutting) तीव्र विरोध आहे. नाशिकरांना माझं आवाहन आहे की तुम्ही ठाम रहा, तुमच्या पाठीशी महाराष्ट्र नवनिर्माण सेना उभी राहील. यामध्ये खरतर कोणतेच राजकारण नाही , या आत्ता होणाऱ्या निवडणुकांनंतर देखील आमचा या वृक्षतोडीला विरोधच राहील ! माझं सरकारला आवाहन आहे की उगाच संघर्ष वाढवू नका. लोकांचं काय म्हणणं आहे, त्याचा कधीतरी आदर राखला जाईल असं पहा. तरीपण सरकारने संघर्षाची भूमिका घेतली तर जनतेच्या बरोबर या लढ्यात महाराष्ट्र नवनिर्माण सेना आहेच आणि असेलच ! असं आश्वासन देखील त्यांनी यावेळी दिलंय.