तपोवनमधील वृक्षतोडीविरोधात सयाजी शिंदे मैदानात; राज्य सरकारला सुनावले खडे बोल

Sayaji Shinde Opposes Tree Felling : नाशिकच्या तपोवनमध्ये होणाऱ्या साधुग्रामवरून राजकीय वातावरण चांगलंच तापलंय. तपोवनमध्ये होणाऱ्या वृक्षतोडीला स्थानिकांनी केलेल्या विरोधानंतर. अनेक राजकीय नेते याविरोधात मैदानात उतरले. आता अभिनेते आणि सह्याद्री देवराई संघटनेचे सर्वेसर्वा सयाजी शिंदे (Sayaji Shinde) यांनी देखील तपोवनमधील वृक्षतोडीच्या निर्णयाला कडाडून विरोध केला. राज्याच्या मुख्यमंत्र्यांनी नाशिककरांची (Nashik) भावना समजून घेतली पाहिजे. झाडं ही आमची आई-बाप आहेत, आणि त्यांच्यावर कोणी हल्ला केला तर आम्ही गप्प बसणार नाही. तपोवनमध्ये काढण्यात आलेले टेंडर्स चुकीचे आहेत. तपोवनमधील झाडं वाचवण्यासाठी नाशिकमध्ये जे आंदोलन उभा राहिलंय, त्याला माझा पाठिंबा असल्याचं त्यांनी सांगितलं.

तपोवनमधील लहानात लहान झाड देखील तोडता कामा नये, अशी भूमिका त्यांनी घेतली. येथे साधू आले काय आणि गेले काय याने मला फरक पडत नाही. मात्र झाडं राहिली पाहिजे. याविषयी माझा अभ्यास नाही. मात्र झाडं गेली तर नाशिककरांच नुकसान होईल. अशी भूमिका त्यांनी मांडली. आपल्याच माणसांनी आपल्याला फसवलं तर त्यांना आपलं कस म्हणायचं. शासन आपलं आहे की, इंग्रजांचं राज्य आहे? असा सवाल त्यांनी उपस्थित केला. आपल्या देशाचा राष्ट्रीय वृक्ष असलेली सगळ्यात जास्त वडाची झाडं कोणी तोडली असतील तर ती या सरकारनं तोडली. आपल्याला झाडांची व्याख्याच माहिती नाही, तशी व्याख्या करणं महाराष्ट्र (Maharashtra) सरकारला जमलेलं नाही. जगात एकच सेलिब्रिटी आहे, ते म्हणजे झाड. त्यामुळे ही झाडं तोडू नका मला केव्हा पण बोलवा मी येईल. आज देखील मी नाशिककरांसाठी येथे आलो असल्याचं यावेळी सयाजी शिंदे यांनी सांगितलं.

तपोवनमध्ये एक्झिबिशन सेंटर उभारणार असल्याचं मला कालच समजलं. त्या अनुषंगानं पुढच्या 30-35 वर्षांसाठी टेंडर देखील काढण्यात आली आहेत. जलसंपदा मंत्री गिरीश महाजन (Girish Mahajan) यांनी या प्रश्नाच उत्तर दिलं पाहिजे. ते जबाबदार व्यक्ती आहेत. आपली काही वैयक्तिक दुश्मनी नाही, आणि झाली तरी मला काही फरक पडत नाही. 14 नोव्हेंबरला या एक्झिबिशन सेंटर संदर्भातली ऑर्डर काढण्यात आली. त्यात कुठलं साधुग्राम आणि कुठला कुंभमेळा आला. असा सवाल सयाजी शिंदे यांनी उपस्थित केलाय. चांगली माणसंच साधू संत असतात. त्यामुळे सगळ्या नाशिककरांनी या वृक्षतोडीविरोधात (Tree Felling) एकत्र आलं पाहिजे. एकही काडी येथून उचलून देऊ नका. मुख्यमंत्र्यांनी देखील जनभावना काय आहे हे लक्षात घेतलं पाहिजे असं ते यावेळी म्हणाले.