“आपल्या डोक्यात हवा गेली होती…”; राशीचक्रकार शरद उपाध्येंनी निलेश साबळेंना सुनावलं…

Sharad Upadhye Criticized Dr. Nilesh Sable : प्रेक्षकांना खळखळून हसवणारा चला हवा येऊ द्या पुन्हा प्रेक्षकांच्या भेटीला येत आहे. या वेळी मात्र काही महत्वाचे बदल करण्यात आले आहेत. सर्वात मोठा बदल म्हणजे डॉ. निलेश साबळे या शोमधून बाहेर पडला आहे. त्याच्या जागी अभिजीत खांडकेकरची एन्ट्री झाली आहे. या घडामोडी घडत असतानाच प्रसिद्ध राशीचक्राकार शरद उपाध्ये यांची एक पोस्ट सोशल मीडियावर चर्चेत आहे. खरंतर ही पोस्ट निलेश साबळेबद्दलच आहे.

काही वर्षांपूर्वी शरद उपाध्य चला हवा येऊ द्या मध्ये आले होते. यावेळी त्यांना जी वागणूक मिळाली ती अतिशय त्रासदायक होती. हाच अनुभव त्यांनी फेसबूक पोस्टमधून शेअर केला आहे. त्यांची ही पोस्ट सोशल मीडियावर चांगलीच व्हायरल होत आहे.

काय आहे शरद उपाध्येंची पोस्ट

आपल्याला हवा येऊ द्या च्या दुसऱ्या पर्वातून डच्चू देऊन त्या जागी अभिजीत खांडकेकरना आणल्याची बातमी आज पेपरमध्ये वाचली. वाईट वाटले पण आश्चर्य नाही. मला तुम्ही एकदा बोलवले होते.त्याप्रमाणे मी 11 वाजता पोहोचलो पण 3 वाजेपर्यंत त्या रुममध्ये कोणीच फिरकले नाही. मला पाणी हवे होते पण एकादोघांना सांगूनही ते आणतो म्हणून गेले ते आलेच नाहीत. मला रुम सोडू नका असे सांगितले होते.

‘एक तिची गोष्ट’ नाटकाचा प्रीमियर सोहळा उत्साहात, उत्तम अभिनय अन् नृत्याची अदाकारी..

निलेश तुम्ही इतर कलावंतांच्या रुम मध्ये जाऊन गप्पा मारीत होतात पण माझ्या रुममध्ये डोकावलात ते थेट 4 वाजता. स्माईलही न देता स्टेजवर गेलात. इतरांचे शूटिंग खूप वेळ केलेत पण मला 6 वाजता बोलावून घाईघाईत 15 मिनिटांत सारे आटोपले. त्यावेळीही इतर कलावंत मधेमधे बोलत होते. माझा सारा दिवस फुकट गेला. एडिटींगमध्येही माझी उत्तरे गाळलीत. बाहेर आपली भेट झाली तेव्हा वडिलांच्या नात्याने काही सल्ले दिले.

पण कार्यक्रमाचे प्रमुख म्हणून आपल्या डोक्यात हवा गेली होती. दुसऱ्याच्या विषयाबद्दल आदर ठेवायचा असतो पण तुम्ही बेपर्वा होतात. त्याचवेळी मला वाटले की अहंकार अति वाईट. गर्विष्ट माणसाचे अध:पतन होते. एखादी पोस्ट मिळाली की ताठा येतो आणि सर्वनाश होतो. स्टेजवर तुम्ही साऱ्यांना आपलेसे केले नाही. आपले सादरीकरणही आकर्षक होत नव्हते. या साऱ्यांचा परिणाम म्हणजे तुम्हाला चॅनेलने बाहेर काढले.

निलेशजी स्वभाव मनमिळाऊ असावा. साऱ्यांना सांभाळून घ्यावे मग सारे एकजुटीने काम करून कार्यक्रमाची चर्चा होईल. अभिजीत खांडकेकर ही धुरा चांगली सांभाळतील. आपण अनुभवी आहात. त्यांना मार्गदर्शन करा. इंडस्ट्रीत आपल्याविषयी असलेले गैरसमज आपल्या चांगल्या कामाने दूर करा. आपल्याला ईश्वराची साथ लाभो ही विनंती, असे उपाध्ये यांनी पोस्टमध्ये म्हटले आहे.

खळखळून हसवणारा ‘चला हवा येऊ द्या’ कार्यक्रम लवकरच प्रेक्षकांच्या भेटीला, कोण करणार सूत्रसंचालन?