उत्तरकाशी : उत्तराखंडमध्ये (Uttarakhand) निर्माणाधीन बोगद्यात अडकलेल्या 40 मजुरांना अद्यापही बाहेर काढण्यात यश आलेले नाही. बोगद्याच्या प्रवेशद्वारापासून सुमारे 200 मीटर अंतरावर हे मजूर अडकल्याची माहिती आहे. पण ज्या ठिकाणी कामगार अडकले आहेत, त्यांच्या समोरच 50 मीटरपेक्षा जास्त मोठा मातीचा आणि दगडांचा ढीग पसरला आहे. बोगद्याचा हा भाग अत्यंत कमकुवत असल्याने ढिगारा हटवल्यानंतरही आणखी ढिगारा खाली पडत आहे. त्यामुळेच मजुरांना बाहेर काढण्यात अडचण येत आहे. (40 laborers in an under-construction tunnel in Uttarakhand have not yet been rescued)
याबाबत अधिक माहिती अशी की, उत्तराखंडमधील उत्तरकाशी येथील चारधाम प्रकल्पांतर्गत ब्रह्मखाल-यमुनोत्री राष्ट्रीय महामार्गावरील सिल्क्यरा ते दंडलगाव दरम्यान निर्माणाधीन बोगद्यात 12 नोव्हेंबरच्या सकाळी अपघात झाला आहे. हा बोगदा चार धाम ऑल वेदर रोड प्रकल्पाचा भाग आहे. या बोगद्यात रविवारी सकाळी काम सुरु असताना बोगद्याच्या प्रवेशद्वारापासून सुमारे 200 मीटर अंतरावर अचानक 50 मीटर उंचीचा मातीचा आणि दगडांचा मोठा ढीग जमा झाला. यानंतर हे कामगार आतील बाजूस अडकले आहेत.
दरम्यान, आत्तापर्यंत ऑक्सिजन, पाणी, अन्न आणि औषधे पाठवून कामगारांशी संपर्क ठेवला जात आहे. सर्व कामगार सुरक्षित असल्याचे सांगण्यात येत आहे. दरम्यान, आता या 50 मीटरपेक्षा जास्त लांबीच्या ढिगाऱ्यामध्ये 800 मिमीचे स्टील पाइप टाकण्याचे काम सुरू होणार आहे. ढिगाऱ्याच्या पलीकडे स्टीलचे पाइप बनवण्याचा प्रयत्न असून आतून एक एक करून कामगारांना बाहेर काढण्याची योजना आहे. मिळालेल्या माहितीनुसार, नॅशनल डिझास्टर रिस्पॉन्स फोर्स (NDRF), स्टेट डिझास्टर रिस्पॉन्स फोर्स (SDRF) आणि 200 हून अधिक पोलिस कर्मचाऱ्यांचे बचाव पथक एकत्र काम करत आहेत. याशिवाय नॉर्वे आणि थायलंडच्या विशेष पथकांशी संपर्क साधण्यात आला आहे.
थायलंडच्या ज्या रेस्क्यू कंपनीने थायलंडमधील गुहेत अडकलेल्या मुलांची सुटका केली होती, त्यांना या कामगारांच्या सुटकेसाठी प्रशासनाकडून संपर्क साधण्यात आला आहे. याशिवाय बोगद्याच्या आतील ऑपरेशनमध्ये विशेष सूचना घेता याव्यात यासाठी नॉर्वेच्या एनआरआय एजन्सीशीही संपर्क साधण्यात आला आहे. सोबतच बोगद्याच्या आतील ऑपरेशनशी संबंधित सूचनाही दिल्ली मेट्रो आणि भारतीय रेल्वेच्या तज्ज्ञांकडून घेतल्या जात आहेत. सध्या 160 बचाव कर्मचारी ड्रिलिंग उपकरणे आणि उत्खनन यंत्रांच्या मदतीने अडकलेल्या मजुरांपर्यंत पोहोचण्याचा प्रयत्न करत आहेत.
एनएचआयडीसीएलचे संचालक अंशो मनीष खल्को म्हणाले की, बोगद्यात अडकलेल्या कामगारांना केव्हापर्यंत सुरक्षितपणे बाहेर काढता येईल याची कालमर्यादा सांगणे कठीण आहे. आमच्याकडे आधीच बॅकअप तयार होता. राज्य सरकार आम्हाला मदत करत आहे, परंतु अत्याधुनिक मशीन असलेले दुसरे मशीन येथे नव्हते आणि ते खूप अवजड मशीन आहे. 25 टन वजनाची मशीन आहे जी दिल्लीहून विमानाने आणली जात आहे. हे मशिन येथे आल्यानंतर काही तासांतच जोडले जाईल. भारतीय हवाई दलाच्या तीन विमानांमधून आम्हाला साहित्य मिळत आहे.
ते पुढे म्हणाले की, आमचे काम सुरू झाले आहे. आम्ही 800 मिमी पाईपमधून आत जाण्याचा प्रयत्न करत आहोत, ज्याला काही अडथळे येत आहेत. ती मशिन्स आल्यानंतर 3 ते 4 तासांनंतर, आम्ही आमचे काम सुरू करू, तोपर्यंत आपल्याला धीर धरण्याची गरज आहे. पहिल्या दिवशी आम्ही बोगद्यात 21 मीटर खोल गेलो, पण बोगद्यात जेवढ्या खोलवर जाऊ तेवढा ढिगारा कमकुवत होत आहे आणि तो पुन्हा परत येतो. अशा स्थितीत किती ढिगारा बाहेर आला हे सांगता येणार नाही. आम्ही स्टीलच्या पाईपमधून आत जाण्याचा प्रयत्न करत आहोत.
बोगद्यात अडकलेल्या लोकांशी वॉकीटॉकीद्वारे संपर्क साधण्यात आला असून आत सर्वजण सुरक्षित असल्याची माहिती सिल्क्यरा कंट्रोल रूमने दिली आहे. अडकलेल्या लोकांना ऑक्सिजन पुरविण्यात येत आहे. त्यांच्याकडून अन्नाची मागणी केली जात आहे. त्यांना पाईपद्वारे अन्न पाठवले जात आहे. ज्या राज्यातील कामगार बोगद्यात अडकले आहेत त्यात बिहारमधील 4, उत्तराखंडमधील 2, बंगालमधील 3, यूपीचे 8, ओरिसातील 5, झारखंडमधील 15, आसाममधील 2 आणि हिमाचल प्रदेशातील एक कामगाराचा समावेश आहे.
