केंद्रीय माध्यमिक शिक्षण मंडळाने (CBSE) इयत्ता १२ वीच्या उत्तरपत्रिकांची पडताळणी आणि पुनर्मूल्यांकन करण्यासाठी अर्ज सादर करण्याची अंतिम मुदत एक दिवसाने वाढवून ७ जून केली. २ जून रोजी सुरू करण्यात आलेल्या सीबीएसईच्या पोर्टलवर उत्तरपत्रिका पाहताना आणि पडताळणी व पुनर्मूल्यांकनासाठी अर्ज करताना अनेक विद्यार्थ्यांना अडचणी येत असल्याचे निदर्शनास आल्यानंतर हा निर्णय घेण्यात आला आहे.
विद्यार्थ्यांच्या हिताचा विचार करून, सीबीएसईने इयत्ता १२ वीच्या बोर्ड परीक्षांसाठी पडताळणी आणि पुनर्मूल्यांकनाचे अर्ज सादर करण्याची अंतिम मुदत वाढवण्याचा निर्णय घेतला आहे; जेणेकरून विद्यार्थ्यांना ही प्रक्रिया पूर्ण करण्यासाठी अतिरिक्त वेळ आणि मदत मिळेल, असे मंडळाने ‘एक्स’ वरील एका पोस्टमध्ये म्हटले आहे. विद्यार्थ्यांनी सुधारित वेळापत्रकाची नोंद घ्यावी आणि त्यानुसार आपले अर्ज सादर करावेत, असं मंडळाने म्हटलं आहे.
बोर्डाच्या परीक्षेतील गुणदानाबाबत असमाधानी असलेल्या विद्यार्थ्यांसाठी, उत्तरपत्रिकांच्या स्कॅन केलेल्या प्रतींमधील त्रुटींची पडताळणी आणि उत्तरांचे पुनर्मूल्यांकन करण्यासाठी सीबीएसईने (CBSE) मंगळवारी ऑनलाइन पोर्टल सुरू केले होते. उत्तरपत्रिकांच्या स्कॅन केलेल्या प्रतींमधील त्रुटींच्या पडताळणीसाठी; उदा. पाने किंवा पुरवणी पत्रके (सप्लिमेंटरी शीट्स) गहाळ असणे, नकाशे किंवा आलेख नसणे, पाने अस्पष्ट असणे, चुकीची उत्तरपत्रिका असणे किंवा वेगळ्या प्रश्नपत्रिका संचाच्या आधारे केलेले मूल्यांकन, अशा समस्यांबाबत विद्यार्थी तक्रार करू शकतात, असे बोर्डाने यापूर्वीच स्पष्ट केले होते.
इयत्ता १२ वीच्या काही विद्यार्थ्यांनी असा दावा केला होता की, बोर्डाने अपलोड केलेल्या त्यांच्या उत्तरपत्रिकांच्या स्कॅन केलेल्या प्रती आणि त्यांची स्वतःची हस्ताक्षरे यात तफावत आहे. या प्रकारामुळे ‘ऑन-स्क्रीन मार्किंग’ (OSM) प्रणालीमधील संभाव्य त्रुटींविषयी चिंता निर्माण झाली असून सीबीएसई वादाच्या भोवऱ्यात सापडले आहे.सीबीएसईद्वारे OSM प्रणालीसाठी सेवांच्या खरेदी प्रक्रियेची चौकशी करण्यासाठी एका सदस्याच्या समितीची स्थापना करण्यात येत असल्याची घोषणा मंत्रिमंडळ सचिवालयाने केली आहे.