Delhi Assembly Elections 2025 : दिल्ली विधानसभा निवडणुकीचे निकाल हाती (Delhi Assembly Elections 2025) आले आहेत. दिल्लीतील आम आदमी पार्टीची सत्ता संपुष्टात आली आहे. अरविंद केजरीवाल (Arvind Kejriwal) यांना हॅटट्रीक काही करता आली नाही. भाजपाने जोरदार मुसंडी मारत दिल्लीची सत्ता आम आदमी पक्षाच्या हातातून अक्षरशः हिसकावून घेतली आहे. दिल्लीकरांच्या मनात नेमकं काय होतं याचा अंदाज अखेर समोर आला. आम आदमी पक्षाचे दिग्गज नेतेही या निवडणुकीत पराभूत झाले आहेत. यामध्ये आम आदमी पक्षाचे सर्वेसर्वा अरविंद केजरीवाल, मुख्यमंत्री अतिशी मार्लेना पिछाडीवर पडले आहेत. जंगपूरा मतदारसंघातून दिग्गज नेते मनिष सिसोदिया यांचा पराभव झाला आहे.
नवी दिल्ली मतदारसंघात अरविंद केजरीवाल यांच्या विरुद्ध भारतीय जनता पार्टीने माजी खासदार प्रवेश वर्मा यांना तिकीट दिले होते. या लढतीकडे सर्वांचे लक्ष लागले होते. दोन्ही उमेदवारांत अटीतटीची लढत झाली. सुरुवातीच्या मतमोजणीत केजरीवाल पिछाडीवर होते. नंतर मात्र त्यांनी आघाडी घेतली होती. परंतु, काही फेऱ्यांनंतर केजरीवाल पुन्हा पिछाडीवर पडले. नवव्या फेरीत केजरीवाल जवळपास 600 मतांनी पिछाडीवर होते. नंतर मात्र दोन्ही उमेदवारांतील अंतर वाढत गेले. अखेर प्रवेश वर्मा यांनी 3 हजार 186 मतांची आ आघाडी घेत अरविंद केजरीवाल यांचा पराभव केला.
अरविंद केजरीवाल यांचा पराभव आम आदमी पक्षासाठी मोठा धक्का मानला जात आहे. दिल्लीची सत्ता तर हातातून गेलीच शिवाय दिग्गज नेते देखील पराभूत झाले आहेत. त्यामुळे पक्षाची आगामी काळातील वाटचाल आणखी खडतर झाली आहे. अनेक मतदारसंघात पक्षाचे उमेदवार पिछाडीवर पडले आहेत. या निवडणुकीत मोठा विजय मिळवून दिल्लीत तब्बल 26 वर्षांनंतर भाजप सरकार स्थापन करणार हे आता निश्चित झालं आहे.
Delhi Election Results : मोठी बातमी! दिल्लीत ‘आप’ ला मोठा दिलासा , मुख्यमंत्री आतिशी विजय
दिल्लीचे माजी उपमुख्यमंत्री आणि अरविंद केजरीवाल यांचे निकटवर्तीय मनीष सिसोदिया यांनाही पराभवाचा धक्का बसला आहे. दिल्ली दारू घोटाळ्यात मनीष सिसोदिया यांच्यावर गंभीर आरोप झाले होते. त्यांनी तब्बल 17 महिने तुरुंगवासही भोगला होता. यानंतर निवडणुकीत मात्र त्यांनी मतदारसंघ बदलला होता. सिसोदिया यंदा जंगपुरा मतदारसंघातून मैदानात होते. या मतदारसंघात भारतीय जनता पार्टीच्या तरविंदरसिंग मारवाह यांनी मनीष सिसोदिया यांचा पराभव केला.
अरविंद केजरीवाल यांनी मुख्यमंत्रिपदाचा राजीनामा दिल्यानंतर त्यांच्या जागी अतिशी यांना मुख्यमंत्री करण्यात आले होते. निवडणुकीत त्यांना कालकाजी मतदारसंघातून तिकीट देण्यात आले. भाजपने या मतदारसंघात फायरब्रँड नेते रमेश बिधुडी यांना तिकीट दिले होते. या मतदारसंघात काँग्रेसने अलका लांबा यांना तिकीट दिले होते. मतमोजणीच्या सुरुवातील रमेश बिधुडी आघाडीवर होते. अतिशी पिछाडीवर पडल्या होत्या. मात्र नंतर अतिशी यांनी विजयी आघाडी घेतली. रमेश बिधुडी यांचा पराभव झाला तसेच काँग्रेसच्या अलका लांबा यांनाही विशेष काही करता आले नाही.
