43rd Senior National Rowing Championship 2026 concludes with success : पुणे येथील कॉलेज ऑफ मिलिटरी इंजिनिअरिंग अंतर्गत कार्यरत मिशन ऑलिम्पिक्स विंगच्या आर्मी रोइंग नोड येथे आयोजित करण्यात आलेली 43वी वरिष्ठ राष्ट्रीय रोइंग अजिंक्यपद स्पर्धा 2026 यशस्वीरीत्या पार पडली. 27 ते 31 जानेवारी 2026 या कालावधीत झालेल्या या स्पर्धेने भारतातील स्पर्धात्मक रोइंग क्षेत्रात आणखी एक महत्त्वाचा टप्पा गाठला. या अजिंक्यपद स्पर्धेदरम्यान देशभरातील राज्य संघ आणि सर्व्हिसेस संघांनी सहभाग नोंदवला. संपूर्ण स्पर्धेत उच्च दर्जाची स्पर्धा, उत्कृष्ट क्रीडा कौशल्य आणि अत्यंत शिस्तबद्ध आयोजन पाहायला मिळाले.
स्पर्धेच्या समारोप समारंभास दक्षिण कमांडचे जनरल ऑफिसर कमांडिंग-इन-चीफ, लेफ्टनंट जनरल धीरज सेठ प्रमुख पाहुणे म्हणून उपस्थित होते. यावेळी उपसेनाप्रमुख लेफ्टनंट जनरल विपुल सिंघल, इंजिनियर-इन-चीफ लेफ्टनंट जनरल विकास रोहिल्ला यांच्यासह भारतीय सेनेचे वरिष्ठ अधिकारी आणि रोइंग फेडरेशन ऑफ इंडियाचे अध्यक्ष श्री. बालाजी मरडपा यांसारखे मान्यवर नागरी व्यक्तिमत्त्व उपस्थित होते. या स्पर्धेतील विशेष आकर्षण ठरली पॅरा सिंगल स्कल स्पर्धा. ही स्पर्धा समावेशकता, जिद्द, आत्मविश्वास आणि क्रीडाक्षेत्रातील अदम्य मानवी इच्छाशक्तीचे प्रभावी प्रतीक ठरली.
अर्थसंकल्पात मोठी घोषणा; देशात उभारले जाणार 7 नवे हाय-स्पीड रेल कॉरिडोर
एकूण गुणतालिकेत सर्व्हिसेस स्पोर्ट्स कंट्रोल बोर्ड संघाने प्रथम क्रमांक पटकावला, तर आर्मी स्पोर्ट्स कंट्रोल बोर्ड संघाने द्वितीय क्रमांक मिळवला. विशेष बाब म्हणजे, या दोन्ही संघातील पदकविजेते खेळाडू हे आर्मी रोइंग नोडमध्ये प्रशिक्षित झालेले होते. यामुळे ARN हे भारतातील दर्जेदार रोइंग खेळाडू घडवणारे प्रमुख केंद्र असून मिशन ऑलिम्पिक्स संकल्पनेचा एक मजबूत आधारस्तंभ असल्याचे पुन्हा अधोरेखित झाले. यावेळी उपस्थितांना संबोधित करताना आर्मी कमांडरांनी स्पर्धेच्या उत्कृष्ट आयोजनाबद्दल ARN आणि CMEचे कौतुक केले. तसेच, देशाला राष्ट्रीय व आंतरराष्ट्रीय क्रीडांगणावर गौरव मिळवून देण्यासाठी भारतीय सेना जागतिक दर्जाचे खेळाडू घडवण्यास सदैव कटिबद्ध असल्याचे त्यांनी स्पष्ट केले.