पुणे : पुण्यातील (Pune) नवले ब्रिज ते कात्रज-सातारा हायवेवर बनावट पोलिस बनून व्यापाऱ्यांना लुटणाऱ्या एका मोठ्या टोळीचा पर्दाफाश झाला आहे. एका स्टेशनरी व्यापाऱ्याच्या गाडीला दुचाकी आडवी लावली. “आम्ही पोलीस आहोत, तुम्ही 2 नंबरचा माल आणि एवढी मोठी रक्कम घेऊन कुठे चालला आहात? अशी तोतयागिरी करत आरोपींनी एक कोटी रुपयांची रोकड असलेली बॅग हिसकावून जबरीने लुटण्याचा प्रयत्न केला. पुढे चौकशीत धक्कादायक बाब पुढे आली. व्यापाऱ्याच्या स्वतःच्या कार ड्रायव्हरनेच या तोतया पोलिसांशी संगनमत करून हा एक कोटी रुपयांचा कट रचल्याचे समोर आले.
ही घटना शनिवारी (18 जुलै) रोजी दुपारी एक ते दोन वाजण्याच्या सुमारास घडली आहे. याप्रकरणी तळेगाव दाभाडे येथील स्टेशनरी व्यापारी यांनी फिर्याद दिली. त्यानुसार फिर्यादीचा कार ड्रायव्हर व मुख्य सूत्रधार विक्रम चाकणकर, तोतया पोलीस बनलेला आरोपी अमेय कार्ले, गणेश कदम, अनोळखी व्यक्तींवर गुन्हा दाखल करण्यात आला आहे. हर्षवर्धन पवार हे 18 जुलै रोजी दुपारी एक वाजेच्या सुमारास पवार हे त्यांचे सहकारी किरण आपटे यांच्यासोबत स्वतःच्या कारने नवले ब्रिज मार्गे कात्रज-सातारा हायवेने चालले होते. त्यांच्याकडे एक कोटी रुपयांची रोकड असलेली एक हिरवी कापडी बॅग आणि एक सॅक होती. गाडी त्यांचा ड्रायव्हर विक्रम चाकणकर चालवत होता.
कार नवले ब्रिज ओलांडून पुढे जात असताना, ब्रह्मा हॉटेलजवळ अचानक एका दुचाकीवरून आलेल्या आरोपींनी व्यापाऱ्याच्या कारला त्यांची दुचाकी आडवी मारून गाडी थांबवण्यास भाग पाडले. कार थांबताच आरोपी अमेय कार्ले आणि त्याचा अनोळखी साथीदार गाडीजवळ आले. अमेय कार्ले याने आम्ही पोलीस आहोत! तुम्ही दोन नंबरचा माल आणि एवढी मोठी रक्कम घेऊन चालला आहात हे आम्हाला माहीत आहे. गाडी बाजूला घ्या!” असा दम भरला.
तोतया पोलिसांनी कारचा दरवाजा उघडला आणि आत बसलेले फिर्यादी हर्षवर्धन पवार व किरण आपटे यांच्याजवळील एक कोटी रुपयांची रोकड असलेली हिरवी कापडी बॅग आणि सॅक जबरदस्तीने ओढून ती लुटण्याचा प्रयत्न केला. व्यापाऱ्याने प्रतिकार केल्याने आणि हायवेवर वर्दळ वाढल्याने आरोपींचा लुटण्याचा प्रयत्न फसला. घटना घडल्यानंतर पोलिसांनी सूत्रे हलवून कसून तपास सुरू केला. तपासादरम्यान पोलिसांना संशय आल्याने ड्रायव्हर विक्रम चाकणकर याला ताब्यात घेऊन विचारपूस केली असता धक्कादायक प्रकार उघडकीस आला.
व्यापाऱ्याच्या गाडीत एक कोटी रुपयांची एवढी मोठी रोकड आहे, ही टीप ड्रायव्हर विक्रम चाकणकर यानेच त्याचा साथीदार गणेश कदम आणि अमेय कार्ले यांना दिली होती. विक्रम चाकणकर, अमेय कार्ले आणि गणेश कदम या तिघांनी संगनमत करून हायवेवर तोतया पोलीस बनून एक कोटी लुटण्याचा हा संपूर्ण कट आखला होता.