Pune Vidhan Parishad Election : पुण्यातील स्थानिक स्वराज्य संस्था विधान परिषद निवडणुकीच्या पार्श्वभूमीवर रंगलेला हायव्होल्टेज राजकीय ड्रामा अखेर संपुष्टात आला आहे. राष्ट्रवादी काँग्रेसचे ज्येष्ठ नेते सुनील टिंगरे यांनी आपली तीव्र नाराजी बाजूला ठेवत अखेर माघार घेतली आहे. सुनेत्रा पवार यांच्या ‘जिजाई’ या निवासस्थानी पार्थ पवार यांनी केलेल्या यशस्वी मध्यस्थीनंतर टिंगरे यांनी आपला अर्ज मागे घेण्याचा निर्णय घेतला आहे. टिंगरे यांच्या माघारीमुळे महायुतीचे अधिकृत उमेदवार विक्रम काकडे यांच्या मार्गातील मोठा अडथळा आता दूर झाला आहे. मात्र, अजितदादांचे खंदे समर्थक मानल्या जाणाऱ्या सुनील टिंगरेंनी ऐनवेळी बंडखोरीचे अस्त्र उपसूनही अखेर माघार का घेतली याची प्रमुख 5 कारणं जाणून घेऊया?
विक्रम काकडे हेच अधिकृत उमेदवार मग, टिंगरेंनी अर्ज का भरला?; वळसे पाटलांनी सांगितलं ‘राजकारण’
सुनील टिंगरेंच्या माघारीची 5 प्रमुख कारणे
1. पार्थ पवारांची यशस्वी ‘शिष्टाई’ आणि पवारांचा शब्द
विक्रम काकडे यांना उमेदवारी जाहीर झाल्यानंतर सुनील टिंगरे कमालीचे नाराज झाले होते आणि त्यांनी पक्षाच्या भूमिकेविरोधात जात अर्ज दाखल केला होता. ही बंडखोरी मिटवण्यासाठी खुद्द सुनेत्रा पवार यांचे चिरंजीव पार्थ पवार यांनी पुढाकार घेतला. ‘जिजाई’ बंगल्यावर टिंगरे यांच्यासोबत झालेल्या प्रदीर्घ बैठकीत पार्थ यांनी पक्षांतर्गत शिस्त आणि भविष्यातील राजकीय पुनर्वसनाचे आश्वासन दिल्याचे समजते. पवार कुटुंबाकडून मिळालेल्या या थेट शब्दामुळे टिंगरे यांनी माघार घेणे पसंत केले. Why Sunil Tingre Backout from Pune Vidhan Parishad Election
2. महायुतीमधील ‘बंडखोरी’ रोखण्याचे मोठे आव्हान
पुण्याच्या या जागेवर केवळ राष्ट्रवादीतच नव्हे, तर भाजपमध्येही नाराजी नाट्य सुरू होते. भाजपच्या प्रदीप कंद यांनीही अर्ज दाखल केला होता. जर टिंगरे आणि कंद दोघांनीही बंडखोरी कायम ठेवली असती, तर महायुतीच्या मतांचे विभाजन होऊन त्याचा थेट फायदा विरोधकांना (महाविकास आघाडीला) झाला असता. महायुतीमधील बिघाडी टाळण्यासाठी आणि मित्रपक्षांमधील समन्वय राखण्यासाठी टिंगरे यांच्यावर माघार घेण्यासाठी पक्षाच्या वरिष्ठ पातळीवरून मोठा दबाव होता.
3. ‘काकडे’ पॅटर्न आणि पक्षाची नवी रणनीती
माजी राज्यसभा खासदार संजय काकडे यांचे सुपुत्र विक्रम काकडे यांना राष्ट्रवादीने अचानक पक्षात प्रवेश देऊन उमेदवारी दिली. या निर्णयामागे पार्थ पवार यांची मोठी भूमिका असल्याचे बोलले जाते. काकडे यांच्या रूपाने पुण्याच्या स्थानिक राजकारणात एक नवे समीकरण बांधण्याचा पक्षाचा प्रयत्न आहे. अशा वेळी पक्षाच्या नव्या रणनीतीला सुरुंग लावणे टिंगरे यांना राजकीयदृष्ट्या परवडणारे नव्हते.
पुण्याच्या राजकारणात मोठा भूकंप! फडणवीसांचे ‘संकटमोचक’ संजय काकडेंचा राष्ट्रवादीत प्रवेश
4. आगामी विधानसभा निवडणुकीचे गणित
सुनील टिंगरे हे पुणे जिल्ह्यातील एक महत्त्वाचे नेते आहेत. जर त्यांनी विधान परिषदेसाठी बंडखोरी केली असती, तर पक्षाकडून त्यांच्यावर शिस्तभंगाची कारवाई झाली असती. परिणामी, आगामी विधानसभा निवडणुकीत पक्षाची अधिकृत उमेदवारी मिळण्यात त्यांना मोठ्या अडचणी आल्या असत्या. त्यामुळे ‘आज दोन पावले मागे घेऊन उद्याची मोठी लढाई सुरक्षित ठेवणे’ हा व्यावहारिक विचार टिंगरेंनी केल्याचे दिसते.
5. जय पवार आणि वरिष्ठ नेत्यांकडून समजूत
टिंगरे यांच्या नाराजीवर त्यांचे सहकारी आणि अजित पवारांचे दुसरे सुपुत्र जय पवार यांनीही नरमाईची भूमिका घेतली होती. “पक्षातील निष्ठावंतांची नाराजी दूर केली जाईल आणि योग्य समन्वय साधला जाईल,” अशी ग्वाही जय पवारांनी दिली होती. पक्षाचे इतर वरिष्ठ नेते जसे की दिलीप वळसे पाटील यांनीही हे बंड नसून घरातील अंतर्गत नाराजी असल्याचे सांगत टिंगरेंची समजूत काढण्यात यश मिळवले.