मित्तल कुटुंब आणि आदर पूनावाला यांनी (IPL) आयपीएल फ्रँचायझी राजस्थान रॉयल्स खरेदी केल्यानंतर काही दिवसांनी, अमेरिकेतील कल सोमानी ग्रुपने म्हटलं आहे की, त्यांनी फ्रँचायझीसाठीची आपली बोली मागे घेतलेली नाही आणि त्यांना विक्री प्रक्रियेतून वगळण्यात आलं आहे. मार्चमध्ये, कल सोमानी यांनी राजस्थान रॉयल्समधील १००% हिस्सा विक्रमी १.६३ अब्ज अमेरिकी डॉलर्समध्ये खरेदी करण्यास सहमती दर्शवल्याची माहिती समोर आली होती.
हा सौदा आयपीएल २०२६ नंतर पूर्ण होण्याची अपेक्षा होती. तथापि, रविवारी, लक्ष्मी एन. मित्तल आणि आदित्य मित्तल यांनी मनोज बदाळे आणि आदर पूनावाला यांच्या भागीदारीत राजस्थान रॉयल्स विकत घेण्यासाठी एक निश्चित करार झाल्याची घोषणा केली. कन्सोर्टियममधील चार गुंतवणूकदार काल सोमानी, रॉब आणि जॉर्डन वॉल्टन, आणि मायकल हॅम्प यांनी एक संयुक्त निवेदन जारी करून म्हटलं आहे की, राजस्थान रॉयल्सच्या मालकीचा भाग होऊ न शकल्याने आम्ही निराश आहोत. सहा महिने चाललेल्या या प्रक्रियेदरम्यान आम्ही सुरुवातीपासून शेवटपर्यंत प्रमुख बोली लावणारे होतो.
दीड महिन्यात राजस्थान रॉयल्स फ्रँचायजी दोनदा विकली; लक्ष्मी मित्तल आणि अदार पूनावाला नवे मालक
निवेदनात पुढे म्हटले आहे की, आमच्या संघाने NFL, MLB, EPL, ला लीगा आणि TGL मध्ये मालकीचा अनुभव असलेल्या नामांकित गुंतवणूकदारांचा एक गट एकत्र आणण्यासाठी कठोर परिश्रम घेतले. या गटामध्ये व्यावसायिक खेळांच्या सर्वोच्च स्तरावरील निवडक जागतिक सुपरस्टार्सचा समावेश होता. आयपीएलला नवीन आंतरराष्ट्रीय उंचीवर नेण्यास मदत करण्याच्या संधीने आम्ही सर्व प्रेरित झालो होतो.
संपूर्ण प्रक्रियेदरम्यान, आम्ही प्रत्येक टप्प्यावर सर्वात मजबूत गट होतो, आणि क्रीडा गुंतवणुकीतील काही सर्वात नामांकित गुंतवणूकदारांशी स्पर्धा करत होतो. अहवालांनुसार, सोमानी यांच्या नेतृत्वाखालील संघाने, ज्याने यापूर्वी RR विकत घेण्यासाठी यशस्वी बोली लावली होती, खरेदी पूर्ण करण्यासाठी निधीच्या अडचणींचा सामना केला आणि त्यांचा सौदा रद्द झाला.