Kairi marathi movie trailer launch : उन्हाळ्यात सिजनल फ्रुट म्हणून चाखायला मिळणारी कैरीचा आस्वाद आता हिवाळ्यात देखील घेता येणार आहे. हे ऐकून नक्कीच तुमच्या पायाखालची जमीन सरकली असेल. कारण ‘कैरी’ हा बिग बजेट आणि मल्टी स्टारर चित्रपट 12 डिसेंबरला प्रेक्षकांच्या भेटीला येणार आहे. पोस्टर लाँच केल्यानंतर या चित्रपटाच्या ट्रेलरची सर्वांनाच उत्सुकता लागली होती. त्यातच आता ‘कैरी’ चित्रपटाचा ट्रेलर समोर आला आहे. अनेक टर्न ट्विस्ट असलेला हा ट्रेलर चित्रपटाची उत्सुकता वाढवत आहे. नॅशनल अवॉर्ड विनिंग दिग्दर्शक शंतनू गणेश रोडे यांचा रोमँटिक थ्रिलर ‘कैरी’ हा सिनेमा येत्या 12 डिसेंबरला प्रदर्शित होणार आहे. या सिनेमातून रोमँटिक थ्रिलर असा नेमका कोणता प्रवास पाहायला मिळणार याची उत्सुकता ट्रेलरने वाढविली आहे.
ट्रेलरमधून समोर आलेलं कोकणातील नयनरम्य, हिरव्यागार वातावरण झालेलं हे ‘कैरी’ चित्रपटाचं शूट साऱ्यांचं लक्ष वेधून घेत आहे. ट्रेलरच्या सुरुवातीलाच शशांक आणि सायलीची लव्हेबल केमिस्ट्री पाहायला मिळत आहे. कोकणाच्या हिरव्यागार परिसरात त्यांचा रोमँटिक प्रवास खुलताना दिसत आहे. इतकंच नाहीतर कोकणातील लग्नाचा थाटमाटही चित्रपटात पाहायला मिळणार असल्याची झलक ट्रेलरमध्ये पाहायला मिळाली. आणि या जोडीच्या रोमँटिक प्रवासाला अचानक ब्रेक लागला. हो. ट्रेलरमध्ये मध्येच आलेला हा टर्न चित्रपटाच्या कथेची उत्सुकता वाढवत आहे. नवरा हरवला म्हणून पत्नीची सुरु असलेली घालमेल ट्रेलरमध्ये दिसत असून हा ट्विस्ट चित्रपटात काय रंगत आणणार याकडे लक्ष लागून राहिलं आहे.
ट्रेलरमध्ये सायली संजीव, सुबोध भावे, सिद्धार्थ जाधव, शशांक केतकर, अरुण नलावडे, सुलभा आर्या या कलाकारांचा अभिनय लक्षवेधी आहे. तर शूटिंगची ठिकाणही नजरा वळवणारी आहेत. विशेषतः कोकणातील शूट साऱ्यांच्या पसंतीस पडत आहे. ‘कैरी’ या चित्रपटाची निर्मिती ‘91 फिल्म स्टुडिओज’ अंतर्गत झाली आहे. ‘लोच्या झाला रे’ आणि ‘शेर शिवराज’ या दोन ब्लॉकबस्टर व्यावसायिक अशा मराठी चित्रपटांनंतर ते ‘कैरी’ हा तिसरा सिनेमा घेऊन आले आहेत. शिवाय ‘कैरी’ हा सिनेमा इन असोसिएशन विथ ‘अमेय विनोद खोपकर एंटरटेंमेंट’चा आहे. तर ‘कैरी’ चित्रपटाची निर्मिती नवीन चंद्रा, नंदिता राव कर्नाड, स्वाती खोपकर, निनाद नंदकुमार बत्तीन यांनी केली आहे. तसेच तबरेझ पटेल हे या चित्रपटाचे सहनिर्माते आहेत. ‘कैरी’चे लेखन स्वरा मोकाशी यांनी केले आहे. या चित्रपटाला निषाद गोलांबरे आणि पंकज पडघन यांनी संगीत दिलं आहे. तर पार्श्वसंगीताची जबाबदारी साई पियूष यांनी सांभाळली. तर चित्रपटाचे छायांकन प्रदीप खानविलकर यांचे आहे. आणि चित्रपटाच्या संकलनाची जबाबदारी मनीष शिर्के यांनी सांभाळली आहे. येत्या 12 डिसेंबरला हा सिनेमा संपूर्ण महाराष्ट्रात प्रदर्शित होणार आहे.