Nanded By Election : नांदेड लोकसभा पोटनिवडणुकीत (Nanded By Election ) काँग्रेसचे रवींद्र चव्हाण यांनी भाजपचे डॉ. संतुकराव हंबर्डे यांचा पराभव केलायं. चव्हाण यांचे वडील वसंतराव चव्हाण हे लोकसभेच्या सार्वत्रिक निवडणुकीत विजयी झाले होते. परंतु त्यांच्या निधनामुळे लोकसभेसाठी निवडणूक घेण्यात आली. त्यात ही जागा राखण्यात काँग्रेसला यश आले आहे. नांदेड लोकसभा पोटनिवडणुकीचा हा सामना अत्यंत चुरशीचा झाल्याचं पाहायला मिळालंय.
काँग्रेसचे उमेदवार रविंद्र चव्हाण यांना 5 लाख 86 हजार 788 मते मिळाली असून भाजपचे उमेदवार संतुकराव हंबर्डे यांना 5 लाख 85 हजार 331 मते मिळाली आहे. या चुरशीच्या लढतीत चव्हाण यांनी हंबर्डे यांचा 1 हजार 457 मतांनी पराभव केला आहे. या पोटनिवडणुकीसाठी पोस्टल मतदानाच्या आकडेवारीनंतर रविंद्र चव्हाण विजयी झालेले आहेत.
भाजपचे उमेदवार संतुकराव हंबर्डे यांना ईव्हिएम मशीनमधून 5 लाख 78 हजार 921 मते तर पोस्टल 6 हजार 410 मते मिळाली आहेत, तर काँग्रेसचे उमेदवार रविंद्र चव्हाण यांना 5 लाख 78 हजार 264 ईव्हिएम मशीनमधून तर पोस्टल मतदानातून 8 हजार 524 मते मिळाली आहेत.
