Abhijeet Dipke Grandmother Death: मुख्य निवडणूक आयुक्त ज्ञानेश कुमार (Gyanesh Kumar) यांच्याविरोधात आंदोलन करण्यासाठी दिल्लीला गेलेले कॉकरोच जनता पार्टीचे संस्थापक अभिजीत दिपके (Abhijeet Dipake) यांच्यावर दुःखाचा डोंगर कोसळला आहे. त्यांच्या आजी सावित्रीबाई शंकर दिपके यांचे शनिवारी (10 ऑक्टोबर) प्रदीर्घ आजाराने निधन झाले. त्या 85 वर्षांच्या होत्या. एकीकडे अभिजीत दिपके यांना दिल्ली पोलिसांनी विमानात शिरून ताब्यात घेतले तर, दुसरीकडे त्यांच्या आजीच्या निधनाचे वृत्त समोर आल्याने दिपके कुटुंबीयांवर दुःखाचा प्रसंग ओढवला आहे.
दिल्ली पोलिसांच्या ताब्यात असताना आजीच्या निधनाचे वृत्त
अभिजीत दिपके हे आज (10 ऑक्टोबर) सकाळी ज्ञानेश कुमार यांच्याविरोधातील आंदोलनासाठी दिल्लीला रवाना झाले होते. मात्र, त्यांचे विमान दिल्ली विमानतळावर उतरताच पोलिसांनी त्यांना ताब्यात घेतले. त्यानंतर अभिजीत दिपके, सौरव दास आणि आशुतोष रांका यांना अज्ञातस्थळी नेण्यात आल्याची माहिती समोर आली आहे. या कारवाईनंतर दिपके यांच्या आई-वडिलांनी केंद्र सरकार आणि दिल्ली पोलिसांवर नाराजी व्यक्त केली होती.
दरम्यान, हिंगोली जिल्ह्यातील संतूक पिंपरी हे दिपके कुटुंबीयांचे मूळ गाव आहे. अभिजीत यांच्या आजी सावित्रीबाई शंकर दिपके या गेल्या काही महिन्यांपासून आजारी होत्या. त्यांच्यावर रुग्णालयात उपचार सुरू होते. शनिवारी सकाळी त्यांची प्राणज्योत मालवली. त्यांच्या निधनाची बातमी समोर आल्यानंतर कुटुंबीयांना मोठा धक्का बसला आहे.
अभिजीत दिपके महाराष्ट्रात परतणार?
अभिजीत दिपके यांच्या आजीच्या अंत्यसंस्कारासाठी त्यांचे आई-वडील आणि इतर कुटुंबीय संतूक पिंपरी येथे जाण्याच्या तयारीत आहेत. मात्र, अभिजीत दिपके सध्या दिल्ली पोलिसांच्या ताब्यात असल्याने त्यांना आजीच्या अंत्यसंस्कारासाठी महाराष्ट्रात परतता येणार का, असा प्रश्न उपस्थित होत आहे.