Contractor Gajanan Devkate dies amid pending bills: मुंबईत थकीत बिलांच्या प्रश्नाने एका कंत्राटदाराचा बळी गेल्याची धक्कादायक घटना समोर आली आहे. गजानन देवकाते (Gajanan Devkate) या कंत्राटदाराने आज (26 ऑगस्ट 2026) स्वतःचे जीवन संपवल्याची माहिती समोर आली आहे. वेळेत आणि नियमानुसार कामे पूर्ण करूनही त्यांची बिले मंजूर झाल्यानंतर प्रत्यक्ष देयकाची रक्कम मिळत नसल्याने ते आर्थिक अडचणींचा सामना करत असल्याची माहीती त्यांच्या पत्रातून समोर आली आहे. त्यांच्या या घटनेनंतर सरकारी विभागांकडून कंत्राटदारांची थकीत बिले वेळेत न मिळण्याचा मुद्दा पुन्हा चर्चेत आला आहे.
कोण होते गजानन देवकाते?
गजानन देवकाते हे व्यवसायाने कंत्राटदार होते. कंत्राटी काम सुरू केल्यानंतर ते नवी मुंबईतील उलवे परिसरात वास्तव्यास होते. सार्वजनिक बांधकाम विभाग तसेच शासनाच्या विविध अभियंता विभागांशी संबंधित छोटी-मोठी कामे ते घेत असल्याची प्राथमिक माहिती समोर आली आहे. मोठ्या कंपन्यांप्रमाणे आर्थिक पाठबळ नसलेल्या छोट्या कंत्राटदारांना काम पूर्ण केल्यानंतर देयके मिळण्यासाठी मोठ्या प्रमाणात पाठपुरावा करावा लागतो, अशी तक्रार यापूर्वीही त्यांच्याकडून करण्यात आली आहे.
अभिषेक बच्चन याने ETPL सुरुवातीचा केला श्री गणेशा ! “HERE WE GO! EUROPEAN T20 LEAGUE.”
देवकाते यांनी आपल्या आर्थिक अडचणींबाबत संबंधित अधिकाऱ्यांकडे यापूर्वीच दाद मागितली होती. जीवन संपवण्याच्या सुमारे वर्षभर आधी त्यांनी कार्यकारी अभियंत्यांना पत्र लिहून थकीत बिलांचा मुद्दा मांडला होता. काम पूर्ण केल्यानंतरही देयक मिळवण्यासाठी कार्यालयांमध्ये वारंवार फेऱ्या माराव्या लागत असल्याचे त्यांनी पत्रातून नमूद केले होते.
पत्रातून मांडली होती व्यथा
देवकाते यांच्या पत्रातील माहितीनुसार, काम पूर्ण केल्यानंतर त्याचे पैसे मिळवण्यासाठी अनेक वेळा संबंधित कार्यालयात जावे लागत असल्याची त्यांची नाराजी होती. वारंवार पाठपुरावा करूनही बिले प्रलंबित राहत असल्याचे त्यांनी अधिकाऱ्यांच्या निदर्शनास आणून दिले होते.
पुण्यात 200 हून अधिक गणेश मंडळांचा ‘डीजेमुक्त गणेशोत्सवा’ला पाठिंबा – पुनीत बालन
सरकारी पातळीवर निधी उपलब्ध असल्याचे सांगितले जात असतानाही प्रत्यक्ष देयके कंत्राटदारांपर्यंत पोहोचत नसल्याने आर्थिक नियोजन कोलमडत असल्याची व्यथा त्यांनी व्यक्त केली होती. छोट्या कंत्राटदारांसाठी कामाचे पैसे वेळेत मिळणे अत्यंत महत्त्वाचे असते. मात्र, देयकांना विलंब झाल्यास मजुरी, साहित्य, वाहतूक तसेच इतर खर्च भागवणे कठीण होत असल्याचेही या प्रकरणातून अधोरेखित झाले आहे.
जवळपास दोन कोटींच्या बिलाचा दावा
गजानन देवकाते यांचे जवळपास दोन कोटी रुपयांचे बिल थकीत असल्याची माहिती समोर आली आहे. हे देयक सुमारे वर्षभरापासून प्रलंबित असल्याचे सांगितले जात आहे. मात्र, त्यांच्या नावावर नेमकी किती रक्कम थकीत होती आणि ती कोणत्या विभागाकडून देय होती, याबाबत अद्याप संबंधित प्रशासनाकडून अधिकृत माहिती जाहीर करण्यात आलेली नाही.
पुण्यात गणेशोत्सवात डीजेचा दणदणाट नको, शहराबाहेरुनच मिरवणूक काढा’; एका पुणेकराची मागणी
त्यामुळे देवकाते यांच्या आर्थिक अडचणीमागे नेमकी कोणती कारणे होती, थकीत बिलाची प्रक्रिया कुठे अडली होती आणि संबंधित विभागाकडून त्यावर कोणती कार्यवाही करण्यात आली होती, याचा तपास महत्त्वाचा ठरणार आहे.
देवकातेच्या आत्महत्येला आमदार, अधिकाऱ्यांची टक्केवारी जबाबदार?
गजानन देवकाते यांच्या मृत्यूनंतर कंत्राटदार असोसिएशनचे अध्यक्ष मुकुंद काकड यांनी सरकार आणि प्रशासनावर गंभीर आरोप केले आहेत. सरकारकडून मोठ्या रकमेच्या कामांना मंजुरी दिली जाते; मात्र प्रत्यक्षात कंत्राटदारांना त्याप्रमाणात निधी मिळत नसल्याचा दावा त्यांनी केला. “200 कोटी रुपयांच्या कामाला मंजुरी दिली जाते आणि प्रत्यक्षात कंत्राटदाराला 15 ते 20 कोटी रुपये दिले जातात,” असा आरोप काकड यांनी केला. बिले काढण्यासाठी अधिकाऱ्यांना टक्केवारी द्यावी लागत असल्याचा गंभीर आरोपही त्यांनी केला. त्यामुळे भ्रष्टाचाराला प्रोत्साहन मिळत असल्याचे काकड यांनी म्हटले.
मराठा समाजाच्या मागण्यावर संबंधित विभागांनी तातडीने कार्यवाही करा, विखे पाटलांचे निर्देश!
गजानन देवकाते हे मेंटेनन्सची कामे करत होते आणि त्यांनी आपल्यालाही पेसे मिळत नसल्याचे पत्र पाठवले होते, असा दावा काकड यांनी केला. मागील दोन ते चार वर्षांत निधीची पुरेशी तरतूद न करताच कंत्राटदारांना कामे देण्यात आल्याचा आरोपही त्यांनी केला.
तसेच आदिवासी विभाग आणि सार्वजनिक बांधकाम विभागाकडून निघणारी कामे कोणत्या कंत्राटदारांना द्यायची, हे आमदारांकडून ठरवले जाते, त्यांना टक्केवारी द्यावी लागत असल्याचा आरोपही काकड यांनी केला. “सरकार कामाचे पैसेच देत नाही,” असा आरोप करत त्यांनी थकीत बिले तातडीने देण्याची मागणी केली.
कंत्राटदारांच्या थकीत बिलांचा प्रश्न पुन्हा ऐरणीवर
दरम्यान, राज्यातील कंत्राटदारांच्या थकीत देयकांचा मुद्दा गेल्या काही काळापासून चर्चेत आहे. कामे पूर्ण करूनही बिले वेळेत मिळत नसल्याच्या तक्रारी कंत्राटदार संघटनांकडून करण्यात येत आहेत. याच मागणीसाठी कंत्राटदारांनी मुंबईतील आझाद मैदानावर आंदोलनही केले होते.
या आंदोलनाच्या पार्श्वभूमीवर राज्यातील कंत्राटदारांची सुमारे 86 हजार कोटी रुपयांची देयके प्रलंबित असल्याचा दावा करण्यात आला होता. मात्र, या आकडेवारीबाबत शासनाची अधिकृत भूमिका आणि विभागनिहाय थकीत रकमेची स्थिती स्पष्ट होणे आवश्यक आहे.
घटनेनंतर कंत्राटदार संघटना आक्रमक
गजानन देवकाते यांच्या मृत्यूच्या घटनेनंतर कंत्राटदार संघटनांनी पुन्हा आक्रमक भूमिका घेतली आहे. थकीत बिलांचा प्रश्न तातडीने सोडवावा, अशी मागणी संघटनांकडून केली जात आहे. या घटनेच्या पार्श्वभूमीवर ठाण्यात सकाळी 11 वाजता पत्रकार परिषद घेऊन सरकारच्या भूमिकेचा निषेध करण्याची भूमिका कंत्राटदार संघटनांनी व्यक्त केली आहे.
नेपाळमधील महापुरामध्ये युपी-बिहारला अलर्ट! मुख्यमंत्री योगींचे प्रशासनाला सज्ज राहण्याचे निर्देश
दरम्यान, या घटनेवर सरकार किंवा संबंधित प्रशासनाकडून अद्याप सविस्तर अधिकृत प्रतिक्रिया समोर आलेली नाही. तसेच देवकाते यांच्या कुटुंबीयांकडूनही या प्रकरणाबाबत अधिकृत प्रतिक्रिया अद्याप देण्यात आलेली नाही.
कामे पूर्ण करूनही देयके मिळण्यास होणारा विलंब हा कंत्राटदारांसाठी गंभीर आर्थिक प्रश्न बनत असल्याचे या घटनेमुळे पुन्हा अधोरेखित झाले आहे. त्यामुळे गजानन देवकाते यांच्या प्रकरणाची सखोल चौकशी करून थकीत बिलांबाबतची वस्तुस्थिती स्पष्ट करण्याची मागणी आता जोर धरू शकते.