Deputy Chief Minister Ajit Pawar’s plane crashes : राज्याचे उपमुख्यमंत्री अजित पवार यांच्या विशेष विमानाला बारामती विमानतळावर लँडिंगदरम्यान भीषण अपघात झाल्याची धक्कादायक माहिती समोर आली आहे. या अपघातात अजित पवार यांच्यासह ६ जणांचा मृत्यू झाला असल्याची माहिती आहे. या घटनेमुळे संपूर्ण महाराष्ट्रात खळबळ उडाली असून राजकीय वर्तुळातून हळहळ व्यक्त केली जात आहे.
मिळालेल्या माहितीनुसार, अजित पवार आज सकाळी मुंबईहून विशेष विमानाने बारामतीकडे रवाना झाले होते. बारामतीत जिल्हा परिषद निवडणुकीच्या प्रचारासाठी त्यांच्या सभांचे आयोजन करण्यात आले होते. मात्र, विमान बारामती विमानतळाच्या धावपट्टीवर उतरत असताना अचानक तांत्रिक बिघाड झाल्याचे सांगितले जात आहे. या बिघाडामुळे वैमानिकाचा विमानावरील ताबा सुटून विमानाला अपघात झाल्याची प्राथमिक माहिती आहे.
अपघातानंतर विमानातून मोठ्या प्रमाणात धुराचे लोट उठताना दिसून आले. या दुर्घटनेत विमानाचे मोठे नुकसान झाले आहे. डीजीसीआयच्या माहितीनुसार, या अपघातात अजित पवार यांचा मृत्यू झाला असून त्यांच्या सोबत असलेले काही कर्मचारी आणि सुरक्षा रक्षकांचा देखील या अपघातात मृत्यू झाल्याची माहिती आहे. दरम्यान, प्रशासनाकडून नागरिकांना आणि कार्यकर्त्यांना संयम राखण्याचे आवाहन करण्यात आले आहे.
या विमान अपघाताचे नेमके कारण अद्याप स्पष्ट झालेले नाही. हा अपघात तांत्रिक बिघाडामुळे झाला की अन्य काही कारणांमुळे, याचा तपास करण्यासाठी नागरी विमान वाहतूक संचालनालयाकडून उच्चस्तरीय चौकशी होण्याची शक्यता वर्तवण्यात येत आहे.