Horrific accident on the Nagpur-Raipur highway : भंडारा जिल्ह्यातील नागपूर-रायपूर राष्ट्रीय महामार्गावर पिंपळगावजवळ आज पहाटे झालेल्या भीषण अपघाताने संपूर्ण जिल्हा हादरला आहे. पेट्रोल पंपावरून महामार्गावर येत असलेल्या ट्रकला भरधाव बोलेरो वाहनाने पाठीमागून जोरदार धडक दिली. या भीषण दुर्घटनेत तीन चिमुकल्यांसह महिला आणि इतर प्रवाशांचा दुर्दैवी मृत्यू झाला आहे. उपचारादरम्यान आणखी एका जखमीचा मृत्यू झाल्याने मृतांचा आकडा आता 9 वर पोहोचला आहे. एकाच अपघातात नऊ जणांचा जीव गेल्याने परिसरात शोककळा पसरली आहे.
मिळालेल्या प्राथमिक माहितीनुसार, बोलेरो वाहन नागपूर-रायपूर राष्ट्रीय महामार्गावर भरधाव वेगाने जात होते. त्याचवेळी पिंपळगाव परिसरातील पेट्रोल पंपावरून एक ट्रक महामार्गावर येत होता. याचदरम्यान बोलेरोने ट्रकला पाठीमागून जोरदार धडक दिली. धडकेची तीव्रता एवढी होती की बोलेरो वाहनाच्या पुढील भागाचा अक्षरशः चक्काचूर झाला. वाहनामध्ये असलेले अनेक प्रवासी गंभीर जखमी झाले आणि अपघातानंतर घटनास्थळी एकच गोंधळ उडाला.
अपघाताचा मोठा आवाज ऐकून परिसरातील नागरिकांनी घटनास्थळी धाव घेतली आणि मदतकार्य सुरू केले. त्यानंतर पोलीस आणि प्रशासनाची यंत्रणाही घटनास्थळी दाखल झाली. अपघातग्रस्त वाहनातील जखमींना बाहेर काढून तातडीने उपचारासाठी रुग्णालयात हलवण्यात आले. मात्र, या दुर्घटनेत तीन चिमुकल्यांसह महिला आणि इतर प्रवाशांचा मृत्यू झाला. गंभीर जखमी असलेल्या आणखी एका व्यक्तीचा उपचारादरम्यान मृत्यू झाल्याने मृतांची संख्या नऊवर गेली आहे.
धक्कादायक! बीड नवगण राजुरी मार्गावर भरधाव ट्रकची दुचाकीला जोरदार धडक; तीन मित्रांचा जागीच मृत्यू
विशेष म्हणजे या अपघाताच्या काही क्षण आधीची दृश्ये परिसरातील सीसीटीव्ही कॅमेऱ्यात कैद झाली आहेत. या फुटेजमध्ये बोलेरो वाहन महामार्गावरून जाताना दिसत असल्याची माहिती आहे आणि त्यानंतर काही क्षणांतच हा भीषण अपघात घडला. त्यामुळे दुर्घटना नेमकी कशी घडली, बोलेरोचा वेग किती होता आणि ट्रक महामार्गावर येत असताना परिस्थिती नेमकी काय होती, याचा उलगडा करण्यासाठी सीसीटीव्ही फुटेजची तपासणी केली जात आहे.
प्राथमिक अंदाजानुसार, बोलेरो वाहनाचा वेग अधिक असल्यामुळे चालकाचे वाहनावरील नियंत्रण सुटले आणि ट्रकला पाठीमागून जोरदार धडक बसली असावी. मात्र, अपघाताचे नेमके कारण अद्याप स्पष्ट झालेले नाही. चालकाची चूक, अतिवेग किंवा अन्य काही कारण या दुर्घटनेमागे होते का, याचा तपास पोलिसांकडून केला जात आहे.
तीन चिमुकल्यांसह नऊ जणांचा जीव गेल्याने या घटनेने भंडारा जिल्हा सुन्न झाला आहे. मृतांच्या कुटुंबीयांवर दुःखाचा डोंगर कोसळला असून परिसरात हळहळ व्यक्त केली जात आहे. अपघातातील जखमींची प्रकृती, मृतांची ओळख आणि दुर्घटनेचा संपूर्ण घटनाक्रम याबाबत अधिकृत माहितीची प्रतीक्षा असून, संबंधित पोलीस यंत्रणेकडून या भीषण अपघाताचा पुढील तपास सुरू आहे.