Major court order in the Ashok Kharat case : नाशिकमधील चर्चित अशोक खरात प्रकरणात आज जिल्हा आणि सत्र न्यायालयात महत्त्वपूर्ण सुनावणी पार पडली. या प्रकरणात न्यायमूर्ती एन. एल. मोरे यांनी आरोपी पक्षाला दिलासा देणारे आणि न्यायप्रक्रियेतील पारदर्शकता सुनिश्चित करणारे काही महत्त्वाचे आदेश दिले. न्यायालयाने आरोपींचे वकील राहुल कासलीवाल यांना जप्त करण्यात आलेल्या पेनड्राइव्हमधील व्हिडीओ पुरावे पाहण्याची परवानगी देण्याचे निर्देश दिले आहेत.
सुनावणीदरम्यान न्यायालयाने सरकारी पक्षाला पेनड्राइव्हसह या प्रकरणाशी संबंधित सर्व आवश्यक कागदपत्रे, पुरावे आणि तपासाशी निगडित माहिती बचाव पक्षाला उपलब्ध करून देण्यास सांगितले. मात्र, संवेदनशील स्वरूप लक्षात घेता व्हिडीओ पुराव्यांच्या प्रती आरोपी किंवा त्यांच्या वकिलांना देता येणार नाहीत, असे स्पष्ट करण्यात आले. हे व्हिडीओ केवळ न्यायालयाने निश्चित केलेल्या नियमांनुसार आणि सर्वोच्च न्यायालयाच्या मार्गदर्शक तत्त्वांचे पालन करूनच पाहता येतील, असे न्यायालयाने नमूद केले.
आजच्या सुनावणीसाठी मुख्य आरोपी अशोक खरात याला प्रत्यक्ष न्यायालयात हजर करण्यात आले होते. सुरक्षा कारणास्तव त्याच्या चेहऱ्यावर मास्क लावण्यात आला होता. न्यायालय परिसरात कडेकोट पोलीस बंदोबस्त ठेवण्यात आला होता. सुनावणीवेळी तपासी अधिकारी, विशेष सरकारी वकील उज्ज्वल निकम तसेच बचाव पक्षाचे वकील उपस्थित होते.
मोठी बातमी! MPSC’च्या सर्व परीक्षा पद्धतीत बदल; आंदोलक विद्यार्थ्यांशी चर्चा केल्यानंतर मुख्यमंत्र्यांची घोषणा
या प्रकरणात तपास यंत्रणांनी जप्त केलेले डिजिटल पुरावे, पेनड्राइव्हमधील व्हिडीओ आणि इतर कागदपत्रे महत्त्वाची मानली जात आहेत. त्यामुळे या पुराव्यांचा अभ्यास करण्याची संधी बचाव पक्षाला मिळाल्याने पुढील सुनावण्यांमध्ये महत्त्वाचे युक्तिवाद मांडले जाण्याची शक्यता आहे. न्यायालयाच्या या आदेशामुळे खटल्यातील पुराव्यांची छाननी अधिक सखोलपणे होणार असून दोन्ही पक्षांकडून जोरदार बाजू मांडली जाण्याची शक्यता व्यक्त केली जात आहे. विशेष म्हणजे, या प्रकरणातील डिजिटल पुरावे तपासाच्या दृष्टीने अत्यंत महत्त्वाचे मानले जात असल्याने पुढील सुनावणीदरम्यान अनेक महत्त्वाचे मुद्दे समोर येण्याची शक्यता आहे.
दरम्यान, अशोक खरातविरोधातील उर्वरित गुन्ह्यांची सुनावणी 8 ऑक्टोबर रोजी होणार आहे. तसेच त्याच्याविरोधातील पहिल्या गुन्ह्यात दाखल करण्यात आलेल्या जामीन अर्जावर न्यायालय 3 ऑक्टोबर रोजी निर्णय देणार आहे. त्यामुळे अशोक खरातला जामीन मिळणार की नाही, याकडे आता सर्वांचे लक्ष लागले आहे. जामीन अर्जावरील निर्णयानंतर या बहुचर्चित प्रकरणाच्या न्यायालयीन प्रक्रियेला कोणते वळण मिळते, याकडेही सर्वांचे लक्ष असणार आहे. या प्रकरणातील पुढील न्यायालयीन घडामोडी आणि जामीन अर्जावरील निर्णय महत्त्वाचा ठरणार असून त्यानंतर खटल्याच्या पुढील दिशेबाबत अधिक स्पष्टता येण्याची शक्यता आहे.