Manoj Jarange Patil’s health has deteriorated : मनोज जरांगे पाटील यांची अचानक प्रकृती बिघडल्याची माहिती समोर आली आहे. मराठा आरक्षण आंदोलनाचे प्रमुख नेते असलेल्या जरांगे यांना अशक्तपणा, चक्कर येणे, ताप आणि मळमळ यांचा त्रास वाढल्याने उपचारासाठी छत्रपती संभाजीनगर येथील गॅलेक्सी रुग्णालयात दाखल करण्यात येत आहे. प्रकृतीत बिघाड झाल्यानंतर त्यांच्या सहकाऱ्यांनी तातडीने त्यांना छत्रपती संभाजीनगरला हलवले असून रुग्णालयात त्यांच्यावर पुढील वैद्यकीय उपचार आणि आवश्यक तपासण्या करण्यात येणार आहेत.
मिळालेल्या माहितीनुसार, गेल्या काही दिवसांपासून सुरू असलेल्या धावपळीच्या दौऱ्यांचा आणि अपुऱ्या विश्रांतीचा त्यांच्या आरोग्यावर परिणाम झाल्याची शक्यता व्यक्त केली जात आहे. मनोज जरांगे पाटील यांनी नुकताच पश्चिम महाराष्ट्राचा व्यापक दौरा पूर्ण केला आहे. या दौऱ्यात त्यांनी धाराशिव, सोलापूर, सांगली, सातारा यांसह अनेक जिल्ह्यांमध्ये इशारा सभा, बैठका आणि संवाद कार्यक्रम घेत मराठा आरक्षणाच्या प्रश्नावर जनजागृती केली. गावोगावी जाऊन त्यांनी समाजबांधवांशी संवाद साधला आणि आरक्षणासंदर्भातील आपली भूमिका स्पष्ट केली. अनेक ठिकाणी रात्री उशिरापर्यंत कार्यक्रम सुरू असल्याने आणि सतत प्रवास करावा लागत असल्याने त्यांना पुरेशी विश्रांती मिळाली नसल्याची माहिती आहे. सलग बैठका, कार्यकर्त्यांशी चर्चा आणि मोठ्या प्रमाणावर झालेला प्रवास यामुळे त्यांचा शारीरिक थकवा वाढल्याचे सांगितले जात आहे.
कैलास पाटील ‘ऑपरेशन टायगर 2’ चा भाग; प्रताप सरनाईकांच्या दाव्याने मोठी खळबळ
दरम्यान, कुणबी प्रमाणपत्र रद्द करण्याच्या मुद्द्यावरून मनोज जरांगे पाटील अलीकडच्या काळात आक्रमक भूमिका घेत आहेत. पश्चिम महाराष्ट्र दौऱ्यात त्यांनी राज्य सरकारवर जोरदार टीका करत मराठा समाजाच्या मागण्यांकडे दुर्लक्ष होत असल्याचा आरोप केला होता. तसेच काही मंत्र्यांवरही त्यांनी थेट निशाणा साधत सरकारने मराठा समाजाला दिलेली आश्वासने पूर्ण करावीत, अशी मागणी केली होती. आगामी काळात मराठा आरक्षणाच्या प्रश्नावर आंदोलनाची दिशा ठरवण्यासाठी त्यांनी विविध भागांमध्ये बैठका घेण्याची तयारीही सुरू केली होती.
जरांगे यांच्या प्रकृतीबाबतची बातमी समोर आल्यानंतर मराठा समाजातील कार्यकर्ते आणि समर्थकांमध्ये चिंतेचे वातावरण निर्माण झाले आहे. राज्यातील विविध भागांतून त्यांच्या प्रकृतीची विचारपूस केली जात असून अनेक कार्यकर्ते आणि पदाधिकाऱ्यांनी त्यांच्या लवकर बरे होण्यासाठी प्रार्थना व्यक्त केल्या आहेत. सध्या त्यांच्यावर वैद्यकीय पथकाकडून उपचार सुरू असून डॉक्टरांकडून त्यांच्या प्रकृतीवर बारकाईने लक्ष ठेवले जात आहे. तपासण्यांचे अहवाल आल्यानंतर त्यांच्या प्रकृतीविषयी अधिकृत माहिती समोर येण्याची शक्यता आहे.
मनोज जरांगे पाटील हे मराठा आरक्षण आंदोलनातील महत्त्वाचे नेतृत्व मानले जात असल्याने त्यांच्या प्रकृतीच्या बातमीने राज्यभरातील मराठा समाजाचे लक्ष वेधले आहे. त्यांच्या प्रकृतीत लवकर सुधारणा व्हावी, अशी अपेक्षा समर्थकांकडून व्यक्त केली जात असून पुढील काही तास त्यांच्या आरोग्याच्या दृष्टीने महत्त्वाचे मानले जात आहेत.