लातूरमध्ये देशमुख पॅटर्न कायम! जिल्हा बँकेवर धीरज देशमुखांची बाजी, निलंगेकरांच्या पॅनेलचा सुपडा साफ

Latur Bank Election : लातूर बँकेच्या निवडणुकीचा निकाल जाहीर झाला असून, या निकालातून पुन्हा निलंगेकर देशमुख संघर्ष समोर आला.

News Photo   2026 11 16T163208.540

Latur District Central Cooperative Bank Election

Latur District Central Cooperative Bank Election : लातूर जिल्ह्याच्या सहकार आणि राजकारणावर कोणाचे वर्चस्व राहणार, याचा फैसला करणाऱ्या जिल्हा मध्यवर्ती सहकारी बँकेच्या निवडणुकीत पुन्हा एकदा देशमुख घराण्याने आपली ताकद सिद्ध केली आहे. माजी मुख्यमंत्री दिवंगत विलासराव देशमुख यांचा बालेकिल्ला असलेल्या लातूरमध्ये माजी आमदार धीरज देशमुख यांच्या नेतृत्वाखालील सहकार पॅनेलने 19 पैकी तब्बल 14 जागा जिंकत बँकेवरील आपले वर्चस्व कायम राखले. दुसरीकडे भाजप नेते संभाजी पाटील निलंगेकर आणि आमदार रमेश कराड यांच्या नेतृत्वाखालील परिवर्तन पॅनेलला पाच जागांवर समाधान मानावे लागले. या निकालाने लातूरच्या राजकारणात देशमुखांची पकड कायम असल्याचे पुन्हा अधोरेखित झाले असून, भाजपच्या दिग्गज नेत्यांना अपेक्षित यश मिळवता आले नाही.

या निवडणुकीतील सर्वाधिक चर्चेचा सामना निलंगा मतदारसंघात रंगला. संभाजी पाटील निलंगेकर यांच्या कुटुंबातील काकी-पुतण्याच्या लढतीत अरविंद पाटील निलंगेकर यांनी संगीता अशोक पाटील निलंगेकर यांचा पराभव केला. या विजयामुळे अरविंद पाटील यांनी प्रथमच जिल्हा बँकेत प्रवेश केला आहे. दुसरीकडे आमदार रमेश कराड यांचे पुत्र ऋषिकेश कराड यांनी काँग्रेसचे ज्येष्ठ नेते अशोक गोविंदपुरकर यांना पराभूत करत सहकार पॅनेलला धक्का दिला. मात्र, या दोन महत्त्वाच्या विजयांनंतरही परिवर्तन पॅनेलला बँकेची सत्ता मिळवता आली नाही. त्यामुळे निलंगेकर आणि कराड यांच्या राजकीय ताकदीची चर्चा असतानाच धीरज देशमुख यांनी संख्याबळाच्या जोरावर बाजी मारली.

सहकार पॅनेलच्या विजयात धीरज देशमुख यांच्यासह अनेक महत्त्वाच्या उमेदवारांनी योगदान दिले. स्वतः धीरज देशमुख यांनी विजय मिळवला, तर उदगीर सोसायटी मतदारसंघातून दिवंगत माजी आमदार चंद्रशेखर भोसले यांच्या कन्या प्रीती भोसले यांनी अवघ्या दहा मतांनी विजय मिळवला. राज्याचे सहकार मंत्री बाबासाहेब पाटील यांचे जावई हेमंत जाधव यांनीही विजय मिळवत पॅनेलचे संख्याबळ वाढवले. मत्स्य व हाउसिंग मतदारसंघातून जयेश विश्वंभर माने यांनी 45 पैकी 35 मते मिळवत एकतर्फी विजय नोंदवला. 19 पैकी चार जागा यापूर्वीच बिनविरोध झाल्या होत्या, तर उर्वरित 15 जागांसाठी झालेल्या मतदानात 999 पैकी 993 मतदारांनी मतदान केले होते. तब्बल 99.4 टक्के मतदानामुळे या निवडणुकीतील चुरस स्पष्ट झाली होती.

Letsupp दिवाळी अंक २०२६ महाराष्ट्रात कुठेही मागवण्यासाठी या लिंकवर क्लिक करा.

विजयानंतर धीरज देशमुख यांनी लातूरच्या राजकारणात सकारात्मक विचारांना मतदारांनी पसंती दिल्याचे सांगितले. लोकशाहीत विरोधकांची भूमिकाही महत्त्वाची असून त्यांनी आपले काम करावे, असे मत त्यांनी व्यक्त केले. सहकार मंत्री बाबासाहेब पाटील यांनी विरोध झुगारून सहकार सर्वप्रथम या भूमिकेतून साथ दिली, असे सांगत त्यांनी त्यांचे आभार मानले. निवडणुकीच्या जाहीरनाम्यात दिलेली सर्व आश्वासने आगामी काळात पूर्ण करण्याचा निर्धारही त्यांनी व्यक्त केला. या निकालातून सहकार क्षेत्रातील जनाधार आणि संघटनात्मक ताकद दाखवून दिल्याची चर्चा राजकीय वर्तुळात सुरू झाली आहे.

दुसरीकडे परिवर्तन पॅनेलचे अरविंद पाटील निलंगेकर यांनी निकालानंतर सत्ताधाऱ्यांवर आरोप करत आपली भूमिका स्पष्ट केली. निवडणुकीत आमचे 29 उमेदवारी अर्ज अवैध ठरवण्यात आले, असा आरोप त्यांनी केला. केवळ 15 मतदारांच्या बळावर निवडणुकीला सामोरे जाऊनही पाच जागांवर विजय मिळवला, असे सांगत त्यांनी या निकालाला संघर्षातील यश असल्याचे म्हटले. मतदारांची संख्या विरोधकांकडे असली तरी मतदारांच्या मनात आम्ही आहोत, असा दावाही त्यांनी केला. त्यामुळे जिल्हा बँकेच्या निवडणुकीचा निकाल जाहीर झाला असला तरी आरोप-प्रत्यारोपांमुळे लातूरमधील राजकीय वातावरण तापण्याची चिन्हे आहेत.

या निवडणुकीत सहकार पॅनेलकडून हेमंत जाधव, प्रीती भोसले, आशिष पाटील राजूरकर, संतोष पाटील, धीरज देशमुख, जगन्नाथ पाटील, जयेश माने, सर्जेराव मोरे, विवेक सिरसाठ, अविनाश जाधव, शेषेराव हाके, चंद्रशेखर दंडीमे, शितल पाटील आणि गीतांजली लांडगे यांनी विजय मिळवला. तर परिवर्तन पॅनेलकडून अरविंद पाटील निलंगेकर, अतुल गंभीरे, भगवानराव पाटील तळेगावकर, ऋषिकेश कराड आणि शोभा पवार विजयी झाले. अशा प्रकारे 14 विरुद्ध 5 अशा निकालाने धीरज देशमुख यांच्या नेतृत्वाखालील सहकार पॅनेलने सत्ता कायम राखली असून, निलंगेकर-कराड यांच्या परिवर्तन पॅनेलला सत्तेपासून दूर राहावे लागले आहे.

विजयी उमेदवार

सहकार पॅनेल – 14 जागा

हेमंत जाधव

प्रीती भोसले

आशिष पाटील राजूरकर

संतोष पाटील

धीरज देशमुख

जगन्नाथ पाटील

जयेश माने

सर्जेराव मोरे

विवेक सिरसाठ

अविनाश जाधव

शेषेराव हाके

चंद्रशेखर दंडीमे

शितल पाटील

गीतांजली लांडगे

परिवर्तन पॅनेल – 5 जागा

अरविंद पाटील निलंगेकर

अतुल गंभीरे

भगवानराव पाटील तळेगावकर

ऋषिकेश कराड

शोभा पवार

Exit mobile version