बीड जिल्ह्यातील माजलगाव परिसरातून (Beed) एक अत्यंत धक्कादायक आणि संतापजनक प्रकार समोर आला असून, एका अल्पवयीन पीडित मुलीचा बेकायदेशीररीत्या गर्भपात केल्याप्रकरणी पोलिसांनी मोठी कारवाई केली आहे. आपल्याच अल्पवयीन चुलत भावाच्या अत्याचारामुळे गर्भवती राहिलेल्या या भोळसर मुलीला तिच्या वडिलांनी गर्भपातासाठी रुग्णालयात नेले होते.
कायद्याचे उल्लंघन करून हा गर्भपात घडवून आणल्यामुळे पोलिसांनी पीडितेच्या वडिलांना अटक केली असून, न्यायालयाने त्यांची रवानगी न्यायालयीन कोठडीत केली आहे. या घटनेमुळे संपूर्ण बीड जिल्ह्यात एकच खळबळ उडाली असून, नात्याला काळिमा फासणाऱ्या अत्याचारानंतर आता पोलिसांनी मोठी कारवाई केली आहे.
महिला डॉक्टरच्या अडचणीत वाढ; कोणत्याही क्षणी अटकेची शक्यता
या प्रकरणात केवळ पीडितेच्या वडिलांवरच नाही, तर ज्या डॉक्टरने हा बेकायदेशीर गर्भपात केला, त्या महिला डॉक्टरवरही पोलिसांनी गुन्हा दाखल केला आहे. माजलगावमधील फुलेनगर भागात असलेल्या या महिला डॉक्टरने नियमांना धाब्यावर बसवून हा गर्भपात केल्याचे तपासात निष्पन्न झाले आहे.
आयएएस अविनाश पाठक यांची कारकीर्दही वादग्रस्त…,कसा घडला बीडचा 241 कोटींचा घोटाळा?
गुन्हा दाखल झाल्यानंतर या महिला डॉक्टरला कोणत्याही क्षणी अटक केली जाऊ शकते. मात्र, अटकेच्या प्रक्रियेपूर्वीच संबंधित महिला डॉक्टरचा रक्तदाब (बीपी) अचानक वाढल्यामुळे तिला उपचारासाठी जिल्हा रुग्णालयात दाखल करण्यात आले आहे. पोलिसांनी या महिला डॉक्टरच्या भोवती कडक बंदोबस्त तैनात केला असून, प्रकृतीत सुधारणा होताच तिला अधिकृतपणे ताब्यात घेतले जाणार आहे.
मिळालेल्या माहितीनुसार, पीडित मुलगी ही भोळसर असून तिचा फायदा घेत तिच्याच अल्पवयीन चुलत भावाने तिच्यावर अत्याचार केले होते. या अत्याचारातून ती गर्भवती राहिल्यानंतर हे प्रकरण दाबण्यासाठी आणि बदनामी टाळण्यासाठी वडिलांनी तिला चोरट्या मार्गाने गर्भपातासाठी नेले होते. वैद्यकीय निकषांची आणि कायदेशीर प्रक्रियेची कोणतीही पूर्तता न करता हा गर्भपात करण्यात आला, जे तपासादरम्यान उघड झाले. पोलिसांनी या संपूर्ण साखळीचा तपास केला असून, ज्या क्रूरतेने हे सर्व घडवून आणले गेले, त्याबद्दल स्थानिक नागरिकांमधून तीव्र संताप व्यक्त केला जात आहे.
माजलगाव पोलिसांनी या प्रकरणात अत्यंत तत्परता दाखवत पीडितेच्या वडिलांना जेरबंद केले असून, आता महिला डॉक्टरवर कायदेशीर टांगती तलवार आहे. जिल्हा रुग्णालयात उपचार सुरू असलेल्या डॉक्टरच्या प्रकृतीवर पोलीस लक्ष ठेवून आहेत. अल्पवयीन मुलीच्या आरोग्याशी खेळणाऱ्या आणि बेकायदेशीर गर्भपात करणाऱ्या अशा प्रवृत्तींविरुद्ध कडक पावले उचलली जातील, असे संकेत पोलीस प्रशासनाकडून देण्यात आले आहेत. या प्रकरणातील इतर दुवे आणि या कटात आणखी कोणाचा सहभाग आहे का, याचा शोध आता पोलीस घेत आहेत.