Ahilyanagar News : अहिल्यानगर उद्धव बाळासाहेब ठाकरे शिवसेनेचे शिवसैनिक आज एकनाथ शिंदे शिवसेनेमध्ये प्रवेश करणार आहेत अशी माहिती मिळते आहे. शहरातील ठाकरे गटाचे पदाधिकारी आज सकाळीत मुंबईला रवाना झाले आहेत. दरम्यान यामुळे ठाकरे गटाला मोठा धक्का बसला आहे. येणाऱ्या काळात स्थानिक स्वराज्य संस्थांच्या निवडणुका आहेत त्यापूर्वी या राजकीय उलथापालथी मुळे ठाकरे गटाला एक जोरदार धक्का बसला आहे.
अहिल्यानगर शहरातील उद्धव बाळासाहेब ठाकरे गटातील नाराज शिवसैनिक आज उपमुख्यमंत्री एकनाथ शिंदे यांच्या उपस्थितीमध्ये मुंबई या ठिकाणी शिंदे गट शिवसेनेमध्ये प्रवेश करणार आहेत. खासदार संजय राऊत यांच्या कार्यपद्धतीवर नाराज होऊन सर्व शिवसैनिकांनी उद्धव ठाकरे यांना सोडण्याचा निर्णय घेतला आहे. आठ दिवसांपूर्वी उपमुख्यमंत्री एकनाथ शिंदे यांच्याशी चर्चा केल्यानंतर आज अखेर प्रवेशाची तारीख ठरल्याची माहिती मिळाली. यानंतर आज सकाळीच शिवसैनिक मुंबईला रवाना झाले आहेत.
ठाकरेंना धक्का! अहिल्यानगरचे पदाधिकारी करणार जय महाराष्ट्र; मुहूर्तही ठरला
अहिल्यानगर शहरातील बहुतांश नगरसेवक व पदाधिकारी, माजी नगरसेवक पक्ष सोडणार असल्याचे उपमुख्यमंत्री एकनाथ शिंदे यांना भेटल्याचे समजताच ठाकरे सेनेच्या वरिष्ठांना जाग आली. संपूर्ण निवडणूक काळात नगरसेवक, पदाधिकाऱ्यांची दखल न घेणाऱ्या, भेट नाकारणाऱ्या वरिष्ठ नेत्यांकडून मनधरणी सुरू असल्याची चर्चा होती. यातच ठाकरे गटाचे आमदार अंबादास दानवे हे पुण्याकडे जात असताना ते नगरमधील शासकीय विश्रामगृह येथे थांबले होते. यावेळी त्यांनी काही पदाधिकाऱ्यांशी चर्चा देखील केली. मात्र नाराज सैनिक शिंदे गटाकडे जाणार असल्याच्या मतावर ठाम राहिले. त्यानंतर आज हे सर्व शिवसैनिक मुंबईला रवाना झाले आहेत.
अहिल्यानगर शहरातील या माजी नगरसेवकांच्या प्रवेशाने ठाकरे सेनेला चांगला धक्का बसला असून सेनेतील उर्वरित माजी नगरसेवक पदाधिकारी व कार्यकर्ते हे देखील लवकरच शिंदे यांच्या शिवसेनेत प्रवेश करणार असल्याचे जवळपास निश्चित मानले जात आहे. या सर्वांच्या प्रवेशाने आगामी स्थानिक स्वराज्य निवडणुकांमध्ये अहिल्यानगर महानगरपालिकेत ठाकरेंच्या सेनेऐवजी एकनाथ शिंदेंच्या सेनेचा झेंडा महानगरपालिकेत फडकण्यासाठी रणनीती तयार होत आहे.
लोकसभेला भाजपला पाठिंबा पण विधानसभेला नाही? राज ठाकरेंनी सांगितली ईडीची स्टोरी
